މިއަދު އެއީ ދުނިޔޭގައި އެންމެ ހާލުގައި ޖެހިފައި އޮތް ޤައުމު ކަމުގައިވެސް ދެންނެވިދާނެއެވެ. މި ދައްކަނީ، މުޅި ބައިނަލްއަޤްވާމީ މުޖުތަމަޢުން އެކަހެރިކޮށްފައި އޮތް އަފްޣާނިސްތާނުގެ ވާހަކައެވެ. ޤައުމުގެ ކޮންޓްރޯލްގައި ކޮންމެ ފަދަ ބަޔަކު ބާރާއި ނުފޫޒު ހިންގަމުން ދިޔަ ކަމުގައި ވީ ނަމަވެސް، ދުނިޔެއަށް ކުރިމަތިލާން ޖެހޭ ކޮންމެ ކާރިޘާއަކާ، ޚުދު އެ ޤައުމުވެސް ކުރިމަތިލާން ޖެހެއެވެ. އަޑު ހަރުކޮށް އެކަމެއްގެ ވާހަކަ، އެންމެންވެސް ދައްކަމުންދާ މޫސުމީ ނޭދެވޭ ބަދަލުތަކާއި އެކަމުގެ ހިތި އަސަރުތައްވެސް އަފްޣާނިސްތާނުގެ ރައްޔިތުން ދަނީ ތަޖުރިބާ ކުރަމުންނެވެ.
މި ދުވަސްވަރަކީ އަފްޣާނިސްތާނަށް ފިނި މޫސުމުގެ ދުވަސްވަރެވެ. މި ފަހަރުގެ ފިނި މޫސުމަކީ، އިންތިހާއަށް ގަދަ ފިންޏާ ކުރިމަތި ކުރުވި މޫސުމެއް ކަމަށް މައުލޫމާތު ލިބެއެވެ. އަފްޣާނިސްތާނުގެ ކަމާ ބެހޭ ފަރާތްތަކުން ޖެނުއަރީ 26 ވަނަ ދުވަހު ހާމަ ކޮށްފައި ވާ ގޮތުގައި، މި ހިނގާ ޖެނުއަރީ މަހުގެ ތެރޭގައި އެކަނިވެސް، މޫސުމީ ކާރިޘާތަކާ ގުޅޭ 160 މަރެއް ވަނީ ރެކޯޑް ކޮށްފައެވެ. ކަން މިހެން އޮތް އިރު، އާންމުން ދަނީ، ގެތަކުގައި ހޫނު ހިފަހައްޓަން ހަކަތަ ގަންނާނެ ތަނަވަސްކަން އަތުގައި ނެތް ކަމުގެ ޝަކުވާ ކުރަމުންނެވެ. އާންމުން ދިރިއުޅޭ ގެތަކުގެ ފިނިހޫނުމިން ހުންނަނީ ގަނޑުވެއޭ ބުނާ މިންވަރަށްވުރެ ފިނިގަދަކޮށެވެ.
މީގެ ކުރީ ފިނި މޫސުންތަކުގައި 50 ޕަސެންޓް ގޮންޖެހުންތަކާ ކުރިމަތިލީވިއްޔާ، މި ފަހަރު މި ކުރިމަތިލަނީ އަނެއް 50 ޕަސެންޓާ. އެހެންވީމަ، ޖުމުލަ 100 ޕަސެންޓް ގޮންޖެހުންތަކާ ކުރިމަތިލަމުން މި ދަނީ. މީހުން އެހާ ފަޤީރު. އުނދުނެއް، ދަރެއް ގަންނާނެ ފައިސާއެއް އަތަކު ނުހުރޭ.ރަޖަބު ޢަލީ؛ އުނދުން ހަދާ މީހެއް
ހަތިޔާރު އެޅި ހަނގުރާމަވެރި ޠާލިބާން ޖަމާޢަތުން އަފްޣާނިސްތާނުގައި ވެރިކަން ހިންގަމުން ދާ ކާބުލްގައި ސްނޯ ބޯވެފައި ވާ ސަރަޙައްދުގައި ޖަމާވެފައިވާ ކުނިތައް ހޭވުމުގަ އަވަދިނެތި އުޅެމުން ދިޔައީ ކުޑަކުޑަ ކުދިންތަކެކެވެ. އެ ކުދިންގެ މަސައްކަތަކަށްވީ، ގޭގައި ހޫނު ހިފެހެއްޓުމަށްޓަކާ، ހަކަތައިގެ ގޮތުގައި އަންދާނެ ޕްލާސްޓިކް ކުނިބުނި ހޮވުމެވެ. އެކުދިންގެ ޢާއިލާތަކަކީ ދަރާއި ބޯޓުދެލި ފަދަ އެއްޗެހި ގަތުމުގެ ތަނަވަސްކަން ނެތް ޢާއިލާތަކުގެ ކުދިންނެވެ.
މި ފަހަރުގެ ފިނި މޫސުން ވަރަށް ފިނި، އެހެން ފަހަރުތަކާ އަޅާ ބަލާއިރު. މީހުން އަތަކު ފައިސާއެއްވެސް ނެތް ދަރާއި، ބޯޓު ދެއްޔާއި އުނދުން ގަނެ ހަދާކަމަށް. މީހުންނަށް ވަނީ ގިނަ މައްސަލަތަކަކާ ކުރިމަތިލާން ޖެހިފަ. އެހެން އަހަރުތަކާ އަޅާ ބަލާއިރު، މި ފަހަރު ވަރަށް ފިނި.ޢާމިރު މުޙައްމަދު؛ ދަރު ވިއްކާ އަފްޣާން މީހެއް
މާ ދުރު ނޫން ހިސާބެއްގައި، ޢުމުރުން 30 އަހަރުގެ ސޭޓު، އާޝޫރު ޢަލީ، އޭނާގެ 5 ދަރިންނާއެކު ދިރިއުޅެމުންދަނީ ކޮންކުރީޓް ބިންގަރާހެއްގައެވެ. ހުރިހާ ދަރިންވެސް ތިބީ، ވާ ފިނިން ތުރުތުރު އަޅައަޅައެވެ.
ނިކަން ބަލާބަލަ އަހަރަމެން މި އުޅޭ ހާލު. އަހަރަމެން ބޮޑެތި މީހުންނަށްވެސް މި ފިނީގަ ކެތްކޮށް ނުލެވޭއިރު، ދެން ކިހިނެއް މި ކުދިންނަށް ވާނީ؟ ފިނިގަދަވެގެން ގޮސް، ނިދަންވެސް ނޯވެވިގެން އެކުދިން އެބަހޭލާ. ރޭގަނޑު ހޭލެވޭ ގޮތަށް، ހެނދުނު ވާއިރުވެސް ރުއިން ހުއްޓާ ނުލާ. ހުރިހާ ކުދިންހެންވެސް ތިބީ ބަލިވެފަ.އާޝޫރު ޢަލީ؛ އަފްޣާނިސްތާނުގެ ރައްޔިތެއް
ފިހާރައިން ލިބޭ ކުޑަ އާމްދަނީއިން ތެލާއި ކާބޯތަކެތި ގަންނަންވެސް ފުދޭ މިންވަރު ނުވާކަމަށް ޢަލީ ބުންޏެވެ. އޭނާގެ ދަރިންކޮޅު ތިބީ ބަނޑަށެވެ. ކަރު ހިއްކައިގެންފައެވެ.
މޫސުން ވަރަ ފިނި. މަށަކަށް ބޯޓުދެއްޔެއް ނުގަނެވުނު. ފަތިސް ނަމާދުން ފައިބައިގެން އަހަރެން ދަނީ ބައެއް ކަހަލަ ސާމާނު ހޮވާލަން. ހޫނު ކުރަން އަންދަންވެގެން، ޕްލާސްޓިކާއި އެކަހަލަ ކުނިބުނި އެއްކުރަން ދަނީ. މީ އަހަރަމެންނަށް މިއަދު ދިރިއުޅެން ޖެހިފަ އޮތް ހާލު. އަހަރަނެގް ދަރިންކޮޅު އެތިބެނީ ބަނޑަށް. ކަރުހިއްކައިގެންފަ. ކޮންމެވެސް ގޮތަކުން ލާރިކޮޅެއް ހޯދައިގެން ފުށް ބަސްތާއެއް ގަނެވުނަސް، ހަފުތާއެއްހާ ދުވަހުވެސް އަހަރަމެންނަކަށް އެއަކުން ނުވާނެ.އާޝޫރު ޢަލީ؛ އަފްޣާނިސްތާނުގެ ރައްޔިތެއް
އަފްޣާނިސްތާނަށް މިހާރު ކުރިމަތިވެފައިވާ މިނި މޫސުމަކީ، މިދިޔަ 15 އަހަރު ދުވަހުގެ ތެރޭގައި އެ ޤައުމަށް ކުރިމަތިލާން ޖެހުނު އެންމެ ގަދަ ފިނީގެ ދުވަސްވަރެވެ. ބައެއް ފަހަރު، މައިނަސް 34 ޑިގްރީ ސެލްސިއަސްއަށްވެސް ފިނިހޫނުމިން ދަށަށް ގޮސްފައި އެބަހުއްޓެވެ.
އަހަރެންގެ ދަރިންކޮޅު އެ ތިބެނީ ގޭގަ، ފިންޏާއެކީ ގަނޑުވެފަ. ހަށިގަނޑު ހޫނު ކުރަން ލާނެ ހެދުމެއް އެކުދިން އަތަކު ނެތް. ކަން ދިމާ ކުރި ގޮތުން، މިފަހަރުގެ ފިނި މޫސުމުގެ ފިނި ވަރަށް ގަދަ. ޖުމުލަ ގޮތެއްގަ ބުނަންޏާ، އަހަރަމެންގެ ހާލަތަކު ވަރަށް ގޯސްކޮށް އުޅެނީ.އާޝޫރު ޢަލީ؛ އަފްޣާނިސްތާނުގެ ރައްޔިތެއް
މި ހުރިހާ ކަމަކާ އަފްޣާނިސްތާނުގެ ރައްޔިތުންނަށް ކުރިމަތިލާން ޖެހިފައި މި ވަނީ، އިޤްތިޞާދީ ކާރިޘީ އަނދަވަޅެއްގެ ތެރޭގައި ނޭވާ ނުލެވި، އިނދަޖެހެމުން ދަނިކޮށެވެ.
އަހަރަމެންނަކީ އިންތިހާ ފަޤީރުކަން ތަހައްމަލު ކުރަމުންދާ ބައެއް. މި ޕްލާސްޓިކްތައް އެއްކޮށްގެން އަހަރެން ގެންދަނީ ގެއަށް. މި ގަދަ ފިނީގަ، ގޭގަ ހޫނު ހިފަހައްޓަންވެގެން، މި އަންދަންވެގެން.މުޙައްމަދު ޤުއްދޫސް؛ ކުނި ހޮވަން ހުރި އަފްޣާން ރައްޔިތެއް
އަންހެން މަސައްކަތްތެރިންނާ ދެކޮޅަށް ޠާލިބާނުން ދާދި ފަހުން ނެރުނު ޢަމުރާ ގުޅިގެން، ބައިނަލްއަޤުވާމީ އެހީދޭ ގިނަ ގުރޫޕުތަކަކުން ވަނީ އަފްޣާނިސްތާނުގައި ހިންގާ އޮޕަރޭޝަންތައް މެދުކަނޑާލާފައެވެ. ހުރިހާ ވޭނަކާއި ހިތްދަތި ކަމެއް ތަހައްމަލު ކުރަން ޖެހޭ ބަޔަކަށް ވެފައި ވަނީ އަފްޣާނިސްތާނުގެ ނިކަމެތި އާންމު ރައްޔިތުންނެވެ.
