ގަދަ ފިނިން ސަލާމަތްވާނެ ގޮތެއް ނެތި، އަފްޣާނިސްތާނުގައި އެތައް މަރެއް!

މިއަދު އެއީ ދުނިޔޭގައި އެންމެ ހާލުގައި ޖެހިފައި އޮތް ޤައުމު ކަމުގައިވެސް ދެންނެވިދާނެއެވެ. މި ދައްކަނީ، މުޅި ބައިނަލްއަޤްވާމީ މުޖުތަމަޢުން އެކަހެރިކޮށްފައި އޮތް އަފްޣާނިސްތާނުގެ ވާހަކައެވެ. ޤައުމުގެ ކޮންޓްރޯލްގައި ކޮންމެ ފަދަ ބަޔަކު ބާރާއި ނުފޫޒު ހިންގަމުން ދިޔަ ކަމުގައި ވީ ނަމަވެސް، ދުނިޔެއަށް ކުރިމަތިލާން ޖެހޭ ކޮންމެ ކާރިޘާއަކާ، ޚުދު އެ ޤައުމުވެސް ކުރިމަތިލާން ޖެހެއެވެ. އަޑު ހަރުކޮށް އެކަމެއްގެ ވާހަކަ، އެންމެންވެސް ދައްކަމުންދާ މޫސުމީ ނޭދެވޭ ބަދަލުތަކާއި އެކަމުގެ ހިތި އަސަރުތައްވެސް އަފްޣާނިސްތާނުގެ ރައްޔިތުން ދަނީ  ތަޖުރިބާ ކުރަމުންނެވެ.

މި ދުވަސްވަރަކީ އަފްޣާނިސްތާނަށް ފިނި މޫސުމުގެ ދުވަސްވަރެވެ. މި ފަހަރުގެ ފިނި މޫސުމަކީ، އިންތިހާއަށް ގަދަ ފިންޏާ ކުރިމަތި ކުރުވި މޫސުމެއް ކަމަށް މައުލޫމާތު ލިބެއެވެ. އަފްޣާނިސްތާނުގެ ކަމާ ބެހޭ ފަރާތްތަކުން ޖެނުއަރީ 26 ވަނަ ދުވަހު ހާމަ ކޮށްފައި ވާ ގޮތުގައި، މި ހިނގާ ޖެނުއަރީ މަހުގެ ތެރޭގައި އެކަނިވެސް، މޫސުމީ ކާރިޘާތަކާ ގުޅޭ 160 މަރެއް ވަނީ ރެކޯޑް ކޮށްފައެވެ. ކަން މިހެން އޮތް އިރު، އާންމުން ދަނީ، ގެތަކުގައި ހޫނު ހިފަހައްޓަން ހަކަތަ ގަންނާނެ ތަނަވަސްކަން އަތުގައި ނެތް ކަމުގެ ޝަކުވާ ކުރަމުންނެވެ. އާންމުން ދިރިއުޅޭ ގެތަކުގެ ފިނިހޫނުމިން ހުންނަނީ ގަނޑުވެއޭ ބުނާ މިންވަރަށްވުރެ ފިނިގަދަކޮށެވެ.

ހަތިޔާރު އެޅި ހަނގުރާމަވެރި ޠާލިބާން ޖަމާޢަތުން އަފްޣާނިސްތާނުގައި ވެރިކަން ހިންގަމުން ދާ ކާބުލްގައި ސްނޯ ބޯވެފައި ވާ ސަރަޙައްދުގައި ޖަމާވެފައިވާ ކުނިތައް ހޭވުމުގަ އަވަދިނެތި އުޅެމުން ދިޔައީ ކުޑަކުޑަ ކުދިންތަކެކެވެ. އެ ކުދިންގެ މަސައްކަތަކަށްވީ، ގޭގައި ހޫނު ހިފެހެއްޓުމަށްޓަކާ، ހަކަތައިގެ ގޮތުގައި އަންދާނެ ޕްލާސްޓިކް ކުނިބުނި ހޮވުމެވެ. އެކުދިންގެ ޢާއިލާތަކަކީ ދަރާއި ބޯޓުދެލި ފަދަ އެއްޗެހި ގަތުމުގެ ތަނަވަސްކަން ނެތް ޢާއިލާތަކުގެ ކުދިންނެވެ.

މާ ދުރު ނޫން ހިސާބެއްގައި، ޢުމުރުން 30 އަހަރުގެ ސޭޓު، އާޝޫރު ޢަލީ، އޭނާގެ 5 ދަރިންނާއެކު ދިރިއުޅެމުންދަނީ ކޮންކުރީޓް ބިންގަރާހެއްގައެވެ. ހުރިހާ ދަރިންވެސް ތިބީ، ވާ ފިނިން ތުރުތުރު އަޅައަޅައެވެ.

ފިހާރައިން ލިބޭ ކުޑަ އާމްދަނީއިން ތެލާއި ކާބޯތަކެތި ގަންނަންވެސް ފުދޭ މިންވަރު ނުވާކަމަށް ޢަލީ ބުންޏެވެ. އޭނާގެ ދަރިންކޮޅު ތިބީ ބަނޑަށެވެ. ކަރު ހިއްކައިގެންފައެވެ.

އަފްޣާނިސްތާނަށް މިހާރު ކުރިމަތިވެފައިވާ މިނި މޫސުމަކީ، މިދިޔަ 15 އަހަރު ދުވަހުގެ ތެރޭގައި އެ ޤައުމަށް ކުރިމަތިލާން ޖެހުނު އެންމެ ގަދަ ފިނީގެ ދުވަސްވަރެވެ. ބައެއް ފަހަރު، މައިނަސް 34 ޑިގްރީ ސެލްސިއަސްއަށްވެސް ފިނިހޫނުމިން ދަށަށް ގޮސްފައި އެބަހުއްޓެވެ.

މި ހުރިހާ ކަމަކާ އަފްޣާނިސްތާނުގެ ރައްޔިތުންނަށް ކުރިމަތިލާން ޖެހިފައި މި ވަނީ، އިޤްތިޞާދީ ކާރިޘީ އަނދަވަޅެއްގެ ތެރޭގައި ނޭވާ ނުލެވި، އިނދަޖެހެމުން ދަނިކޮށެވެ.

އަންހެން މަސައްކަތްތެރިންނާ ދެކޮޅަށް ޠާލިބާނުން ދާދި ފަހުން ނެރުނު ޢަމުރާ ގުޅިގެން، ބައިނަލްއަޤުވާމީ އެހީދޭ ގިނަ ގުރޫޕުތަކަކުން ވަނީ އަފްޣާނިސްތާނުގައި ހިންގާ އޮޕަރޭޝަންތައް މެދުކަނޑާލާފައެވެ. ހުރިހާ ވޭނަކާއި ހިތްދަތި ކަމެއް ތަހައްމަލު ކުރަން ޖެހޭ ބަޔަކަށް ވެފައި ވަނީ އަފްޣާނިސްތާނުގެ ނިކަމެތި އާންމު ރައްޔިތުންނެވެ.