ބްރޯޑްކޮމްގެ މެމްބަރުކަމަށް ކުރިމަތިލުމަށް ހުޅުވާލައިފި

ބްރޮޑްކާސްޓިންގ ކޮމިޝަން (ބްރޯޑްކޮމް)ގެ މެމްބަރުކަމަށް ކުރިމަތިލުމަށް ހުޅުވާލައިފިއެވެ.

އެކަމަށްޓަކާ ރައީސް އޮފީހުން އާއްމުކުރި އިއުލާނެއްގައި ބުނެފައިވަނީ، ބްރޯޑްކޮމްގެ މެމްބަރުކަމަށް ކުރިމަތިލުމަށް ހުޅުވާލާފައި ވަނީ އެ ކޮމިޝަންގައި މިހާރު ތިބި މެމްބަރުންގެ ދައުރު ހަމަވާތީ އެކަމާ ގުޅިގެން ކަމަށެވެ. ކޮމިޝަންގެ މެމްބަރުކަމަށް ކުރިމަތިލާ ފަރާތްތަކުން ފޯމް ހުށަހެޅުމަށް ހުޅުވާލާފައިވަނީ އަންނަ މަހުގެ 5 އަދި 6 ވަނަ ދުވަހު ކަމަށެވެ. ފޯމް ބަލައިގަތުމަށް ހަމަޖެހިފައިވަނީ ހެނދުނު 09:30އާ 12:30އާ ދެމެދު، ރައީސް އޮފީހުން ކަމަށްވެސް އެ އޮފީހުން ވަނީ ބުނެފައެވެ.

މީގެ ކުރިން ބްރޮޑްކާސްޓިންގ ކޮމިޝަންގެ މެމްބަރުކަމަށް ކުރިމަތިލުމަށް މި ޖަނަވަރީ މަހުގެ 12 ވަނަ ދުވަހުވެސް އިއުލާން ކުރިއެވެ. އޭރު ބްރޯޑްކޮމްއަށް ކުރިމަތިލުމަށް ހުޅުވާލީ އެ ކޮމިޝަންގެ ނައިބު ރައީސް އަހުމަދު ގައިސް މަގާމުން އިސްތިއުފާ ދެއްވުމާ ގުޅިގެން، އެ މަގާމު ހުސްވެފައި ވާތީއެވެ.

މިހާރު ބްރޯޑްކާސްޓިންގ ކޮމިޝަންގެ މެމްބަރުންގެ ގޮތުގައި ތިއްބެވީ 6 މެމްބަރުންނެވެ. އެއީ ކޮމިޝަންގެ ރައީސް މަރިޔަމް ވަހީދާއާއި އަމްޖަދު ވަހީދާއި އަލީ ޔޫސުފާއި އާމިނަތު އަމީނާއާއި މުހައްމަދު ފަޒީންގެ އިތުރުން ޝިފްލާ އިބްރާހީމެވެ.