ސަރުކާރުގައި ކަތުރުފަނި އަޅާއިރުވެސް ތިޔަ ހުންނަވަނީ ކީއްވެތޯއެވެ.

ނޫސްތަކުގެ ސުރުހީތަކަށް ބަލާލުމުން ބަޔަކު ހައިރާން ވާހާ ވަރުވެއެވެ. އަޅުގަނޑުމެންގެ ފަހުރުވެރި މި ދިވެހިރާއްޖޭގައި ކަންކަން ހިނގަމުންމިދާ ގޮތާއި މެދު ވިސްނާލުމުން ލަނދުން ބޯހަލާކުވާހާވެއެވެ.

އެންވަޔަރަމަންޓް މިނިސްޓްރީގެ މުވައްޒަފުން ޝަކުވާ ކުރަނީ މުޅި މިނިސްޓްރީގައި ކަތުރު ފަނި އަޅައިގެންނެއެވެ. އޮފީސް ނިންމާފައި ގެއަށްދާއިރު ހެދުމުގަޔާއި ބުރުގާގައިވެސް ހުންނަ ކަތުރުފަނި ގެއަށްވެސް ދާތީއެވެ. އަނދާހުލިވެގެން ބަދަލުކުރި ދެ މިނިސްޓްރީގެ މުވައްޒަފުން ޝަކުވާކުރަނީ އަދިވެސް އެމީހުންނަށް މަސައްކަތްކުރާނެ ސިސްޓަމެއް ނުލިބިގެންނެއެވެ. އަމިއްލަ ލެޕްޓޮޕް ހިފައިގެންގޮސް އޮފީހުގައި އޮފީސް މަސައްކަތް ކުރަން ޖެހޭތީއެވެ. އިންފޮމޭޝަން ކޮމިޝަންގެ އޮފީހުގެ މުވައްޒަފުން މަސައްކަތް ކުރާނެ ތަނެއް ނެތި ގޭގައި މަސައްކަތްކުރަނީއެވެ. ބްރޯޑްކޮމްގެ މުވައްޒަފުން އޮފީހުގައި މަސައްކަތްކުރާނެ މާހައުލެއް ނެތިގެން މަސައްކަތް ހުއްޓާފައި ގެއަށްދަނީއެވެ. މައުލޫމާތު ނުލިބިގެން ހުށަހަޅާއަޅާ އާރްޓިއައި ތަކަށް ޖަވާބު ނުދީގެން ނޭވާއަކު ދެކޮޅު ރައީސް އޮފީސް އައިކޮމްއަށް ހާޒިރުކުރަނީ އެވެ. މިހާރުގެ ހައުސިން މިނިސްޓްރީގެ މުވައްޒަފުން އުޅެނީ ކުރީގެ އެނދި ހައުސިން މިނިސްޓްރީގައި ހުރި ފާއިސާގެ ހިސާބުތަކާއި ގުޅޭ ލިޔެކިޔުން ނުލިބިގެންނެއެވެ.

މިއީ ހައްތަހާވެސް ނޫސްތަކުން ފެންނަން ހުރި ސުރުހީތަކެއެވެ. ދާދި މިދާކަށް ދުވަހައި ހަމައަށް ހަމަ ރަނގަޅަށް ހިނގަމުންދިޔަ ސަރުކާރުގެ އިދާރާތަކުގެ އިދާރީ ހިންގުމަށް މިއަދު ކުރިމަތިވެފައި އޮތް ނިކަމެތި ހާލަތެއެވެ.

ނަމަވެސް މިއިން އެއްވެސް ކަމެއް ރައީސް މުއިއްޒަށް އެނގިވަޑައިގަންނަވާ ހެނެއް ހިޔެއް ނުވެއެވެ. ޖަލްސާތަކާއި ރަސްމިއްޔާތު ތަކުގައި ރައީސް އުޅުއްވަނީ އަވަދި ނެތިއެވެ. ރައީސްގެ ޖަލްސާތަކާއި ރަސްމިއްޔާތުތައް ފަޅު ފިލުވައި ދިނުމުގައި ވަޒީރުން އުޅުއްވަނީ ނޭވާ ނޭފަތުން ނުލެވިގެންނެއެވެ. ގައުމަކާއި ގައުމެކެވެ. ސަރުކާރަކާއި ސަރުކާރެކެއެވެ. އަގުބޮޑު ކޯޓުތައް ތުރުކުރައްވައިގެން ޕޯޑިއަމްތައް ކައިރީގައި ހުންނަވައިގެން ބާއިސާ ކެނޑުއްވުން ނޫން ކަމެއް ރައީސް ކުރައްވާތީ އެއް ނުފެނެއެވެ. މަޝްރޫއުތަކުގެ އަދަދު ހަތްސަތޭކައިން އަށްސަތޭކައިން އިއުލާންކުރައްވަމުން ގެންދަވާއިރު، ދެއަހަރު ތެރޭގައި ފެއްޓެވެނު ހަމައެންމެ ކަމެއްވެސް ނެތެއެވެ.

މިހާ ހިސާބުން އުދެފޭ ސުވާލަކީ މިގައުމުގައި މިއޮތީ ސަރުކާރެއްތޯއެވެ. ރައީސް ކަމުގެ މަގާމަށް މީހަކު ހޮވައިގެން މިއުޅެނީ ކީއްކުރަންތޯއެވެ. ރައްޔިތުންގެ ޓެކްސް ފާއިސާއިން މުސާރަދީ ކާންބޯންދީ އުޅޭނެ ތަންދީ ސެކިއުރިޓީ ދީ ފުޓްސެލް ކުޅޭނެ ދަނޑުދީ، ޕިކްނިކް ދާނެ ރަށްދީ، ފަތާނެ ފަތާ ފެންގަނޑުދީ، އިއްޒަތާއި ޝަރަފާއި ދީގެން މީހަކަށް ރައީސުލްޖުމްހޫރިއްޔާ ކިޔައިގެން މިގެންގުޅެނީ ކޮން ބޭނުމަކުތޯއެވެ. އޮފީހެއްގެ މުވައްޒަފަކަށް މަސައްކަތެއް ކުރެވޭނެ ގޮތެއް މަސައްކަތެއް ކުރެވޭނެ މާހައުލެއް ނެތި، މުޅި ސަރުކާރު ފުނޑު ފުނޑުވެ މުޅި ނިޒާމް ކުދި ކުދިވެ ގައުމު އެފުށް މިފުށަށްޖެހި ހަލާކުވެދާއިރު، މިއިން އެއްވެސް ކަމެއް އެނގިވަޑައިނުގަންވާ ނަމަ، ރައީސުލްޖުމްހޫރިއްޔާގެ ނަމުގައި މީހަކު ބަހައްޓައިގެން މިތިބެނީ ކީއްކުރަންތޯއެވެ.

ޤަބޫލުފުޅުކުރައްވާށެއެވެ. އުނދުޅިއަށް ދަނޑި ލައްވަނީވެސް ބޭނުންކުރާ މީހާއަށް ފަސޭހައަކަށެއެވެ. އަތައް ވެދާނެ ހޫނަކުން ސަލާމަތްވުމަށެއެވެ. ހަމަ ބީދައިން އެތައް ހަރަދެއްކޮށްގެން ގައުމުގައި ރައީސަކު ބަހައްޓަނީވެސް ރައްޔިތަކަށް ކޮންމެވެސް ވަރެއްގެ ޙިދުމަތެއް ކޮށްދިނުމުގެ ބޭނުމުގައެވެ. އެކަމަކު މިއިން ހަމަ އެއްވެސް ކަމެއް ކޮށްނުދެއްވޭ ނަމަ ތިޔަ ހުންނަވަނީ ކީއްކުރައްވަންތޯއެވެ. ރައްޔިތުންނަށް ހައްދަވަން ތިޔަ އުޅުއްވަނީ ކިހިނެއްތޯއެވެ. ގައުމު ތިޔަ ގެންދަވަނީ ކޮން ދިމާލަކަށްތޯއެވެ. މަނިކުފާނަށް ތާއީދުކޮށް ވޯޓްލާ، ވެރިކަމަށް ގެނައުން އެއީ ދިވެހިންނަށް ކުރެވުނު ކުށެއްތޯއެވެ. އެއީ ކުށެއް ނަމަ، ތިޔަ ދެއްވަނީ އެކަމުގެ އަދަބުތޯއެވެ.