އެމްއެންޔޫގެ "ފަހި ސުފުރާ" ގައި ބައިވެރިވުމުގެ ފުރުސަތު ހުޅުވާލައިފި
18 ފެބްރުއަރީ 2023 ވާ ހޮނިހިރު ދުވަހުގެ 14:00 ގެ ކުރިން ފޯމު ހުށަހަޅަން ޖެހޭ
ދިވެހިރާއްޖޭގެ ގައުމީ ޔުނިވަރސިޓީ
ދިވެހިރާއްޖޭގެ ޤައުމީ ޔުނިވަރސިޓީ (އެމްއެންޔޫ) އިން އިންތިޒާމްކޮށްގެން ހިންގާ ދިވެހީންގެ ތެރެއިން ކާބޯތަކެތި އުފައްދާ މީހުންނާއި ވިއްކާ މީހުންނާއި ގަންނަ މީހުންގެ ބާޒާރު، "ފަހި ސުފުރާ" ގައި ބައިވެރިވާން ބޭނުންވާ ފަރާތްތަކަށް ފުރުސަތު ހުޅުވާލައިފިއެވެ.
އެމްއެންޔޫއިން މައުލޫމާތު ދޭ ގޮތުގައި މި ބާޒާރު ކުރިއަށް ދާނީ އަންނަ މާޗް މަހުގެ 1-2 އަށް ކޮންމެ ދުވަހެއްގެ ހެނދުނު 10:00 ން ރޭގަނޑު 22:00 އަށް ޔުނިވަރސިޓީގެ އިދާރީ މަރުކަޒުގައެވެ.
މި ބާޒާރަކީ ދިވެހީންގެ ތެރޭގައި ތިބި ކާބޯތަކެތި އުފެއްދުންތެރިން އެ ފަރާތްތަކުގެ ހުނަރު އާންމުންނަށް ދައްކާލެވޭނޭ ފުރުޞަތު ތަނަވަސްކޮށްދިނުމަށް އެމްއެންޔޫއިން އިންތިޒާމުކޮށްގެން ހިންގާ ހަރަކާތެކެވެ. މި ބާޒާރުގައި އާންމުންނާއި ހިސާބަށް އެހާ ބޮޑަށް ފޯރުކޮށްނުދެވިހުރި އައު ކާބޯތަކެތީގެ ބްރޭންޑްތަކާއި ވައްތަރުތައް އާންމުންނާ ހަމައަށް ގެނެސް ދެވޭނެ މާޙައުލެއް އަދި ކާބޯތަކެތި ވިއްކުމަށް ބޭނުންވާ ދިވެހި އުފެއްދުންތެރިންނަށް އެފުރުސަތު ފަހި ކޮށްދެވޭނެ ކަމަށް އެމްއެންޔޫއިން ބުނެއެވެ.
މި ބާޒާރުގައި ބައިވެރިވުމަށް އެދޭ ފަރާތްތަކުން 18 ފެބްރުއަރީ 2023 ވާ ހޮނިހިރު ދުވަހުގެ 14:00 ގެ ކުރިން ފޯމު ހުށަހަޅަން ޖެހޭނެއެވެ.
މި ބާޒާރުގައި ބައިވެރިވާ ފަރާތްތަކުގެ އަތުން އެމްއެންޔޫއިން އެއްވެސް ފީއެއް ނުނެގޭނެއެވެ. އަދި ސްޓޯލްތައް ހަމަޖެހޭނީ ހަމަކުރަންޖެހޭ ހުރިހާ ތަކެއްޗެއް ހަމަކޮށް ފޯމު ފުރާ ތަރުތީބުން ކަމަށް އެމްއެންޔޫއިން ބުންޏެވެ.
އެމްއެންޔޫއިން މިދިޔަ އަހަރު ބޭއްވި ފަހި ސުފުރާ ހަރަކާތަށް ވެސް ބޮޑު ތަރުހީބެއް ލިބިގެންދިޔައެވެ.
