ކ. މާލެ
|
25 ޖެނުއަރީ 2023 | ބުދަ 07:36
ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު ސިލްވާ
ޗެލްސީ އަށް ކުޅެމުން އަންނަ ބްރެޒިލްގެ ޑިފެންޑަރު ސިލްވާ
ރޮއިޓާރސް
ޗެލްސީ
ތިއާގޯ ސިލްވާ އަށް އައު އެއްބަސްވުމެއް ހުށަހަޅަން ޗެލްސީން ތައްޔާރުވަނީ
 
ޗެލްސީގެ ކޯޗުކަމާ އަލަށް ހަވާލުވި ގްރަހަމް ޕޮޓާ ވެސް ބޭނުންވަނީ ސިލްވާ ކުލަބުގައި މަޑުކުރަން

ޗެލްސީ އަށް ކުޅެމުން އަންނަ ބްރެޒިލްގެ ކެޕްޓަން ތިއާގޯ ސިލްވާ އަށް އައު އެއްބަސްވުމެއް ހުށަހަޅަން އެ ކުލަބުން ތައްޔާރުވަމުން އަންނަ ކަމަށް މީޑިއާ ރިޕޯޓުތައް ބުނެފި އެވެ.

އުމުރުން 38 އަހަރުގެ ޑިފެންޑަރު ޗެލްސީ އަށް ބަދަލުވީ 2020 ވަނަ އަހަރު އެވެ. ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ދޫކޮށް، އޭނާ ޗެލްސީ އަށް ބަދަލުވީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވުމުން ޗެލްސީން ބޭނުންވެގެން އޭނާގެ އެއްބަސްވުން 2022 ވަނަ އަހަރާ ހަމަ އަށް ވަނީ އައުކޮށްފަ އެވެ. އޭގެ ފަހުން މިދިޔަ އަހަރު ވަނީ މިހާރު ކުރިއަށްދާ ސީޒަންގެ ނިޔަލަށް އެއްބަސްވުން އައުކޮށްފަ އެވެ. މި ސީޒަންގެ ނިޔަލަށް އޭނާގެ އެއްބަސްވުން ހަމަވާއިރު، ޗެލްސީން އަދިވެސް ބޭނުންވަނީ އޭނާ ކުލަބުގައި ބަހައްޓަން ކަމަށް ރިޕޯޓުތައް ބުނެ އެވެ. ޚާއްސަކޮށް ޗެލްސީގެ ކޯޗުކަމާ އަލަށް ހަވާލުވި ގްރަހަމް ޕޮޓާ ވެސް ބޭނުންވަނީ ސިލްވާ ކުލަބުގައި މަޑުކުރަން ކަމަށް ރިޕޯޓުތައް ބުނެ އެވެ. އެގޮތުން ޗެލްސީން މިހާރު އަންނަނީ އެކަމުގެ މަޝްވަރާތައް ސިލްވާއާ ކުރަމުން ކަމަށާއި، އެކަމާމެދު ވަރަށް އަވަހަށް ގޮތެއް ނިންމާނެ ކަމަށް ވެސް ރިޕޯޓުތައް ބުނެ އެވެ.

ޗެލްސީ އަށް ބަދަލުވެ ސިލްވާ ވަނީ މިހާތަނަށް އެ ޓީމަށް ކުޅެދިން 105 މެޗުގައި ފަސް ލަނޑު ޖަހައިފަ އެވެ. އޭނާ ވަނީ ޗެލްސީއާއެކު ތިން ތައްޓެއް ކާމިޔާބުކޮށްފަ އެވެ. އޭގެ ތެރޭގައި ޔުއެފާ ޗެމްޕިއަންސް ލީގައި، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ހިމެނެ އެވެ. މީގެ އިތުރުން ސިލްވާ ވަނީ ޗެލްސީއާއެކު އެފްއޭ ކަޕްގެ ފައިނަލްގައި ދެ ފަހަރު އަދި ކަރަބޯ ކަޕްގެ ފައިނަލްގައި ކުޅެފަ އެވެ.

ބްރެޒިލްގެ ޤައުމީ ޓީމަށް ވެސް ކުޅެމުން އަންނަ ސިލްވާ ވަނީ މިހާތަނަށް ޤައުމީ ޓީމަށް ކުޅެދިން 113 މެޗުގައި ހަތް ލަނޑު ޖަހައިފަ އެވެ. ބްރެޒިލާއެކު ސިލްވާ ވަނީ 2013 ވަނަ އަހަރުގެ ކޮންފަޑެރޭޝަން ކަޕާއި، 2019 ވަނަ އަހަރުގެ ކޮޕާ އެމެރިކާ މުބާރާތް ކާމިޔާބުކޮށްފަ އެވެ.

Advertisement
އެންމެ ފަހުން އަޕްޑޭޓް ކުރީ: 2 ހަފްތާ ކުރިން
ރިވިއު ކުރީ: މަރްޔަމް ދާނިޝް ނަޝީދު
100%
0%
0%
0%
0%
0%
ކޮމެންޓް