ޕްރައިމަރީގައި ބަލަންވީ ޕާޓީގެ އަމިއްލަ ވިސްނުން މަޑުޖައްސާލައިފައި، ގައުމަށް ވާނީ ކިހިނެތްތޯ: ރައީސް
23 ޖެނުއަރީ 2023 | ހޯމަ 12:51މި ސަރުކާރުން މަޝްރޫއުތައް ކުރިއަށްގެންދަނީ ވަރަށް ރޭވުންތެރިކަމާއެކު އެއްވެސް ރަށެއް ބާކީ ނުކޮށް
ރައީސުލްޖުމްހޫރިއްޔާ އިބްރާހިމް މުހައްމަދު ސާލިހް ތޮއްޑޫގައި
މި މަހުގެ 28ގައި އޮންނަ އެމްޑީޕީގެ ޕްރައިމަރީގައި ބަލަންވީ ޕާޓީގެ އަމިއްލަ ވިސްނުން މަޑުޖައްސާލައިފައި، ގައުމަށް ވާނީ ކިހިނެތްތޯ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެއެވެ.
ޕްރައިމަރީ ކެމްޕޭނަށް ތޮއްޑޫއަށް ވަޑައިގެން ރައީސް ވިދާޅުވީ މި ސަރުކާރުން މަޝްރޫއުތައް ކުރިއަށްގެންދަނީ ވަރަށް ރޭވުންތެރިކަމާއެކު އެއްވެސް ރަށެއް ބާކީ ނުކޮށް ކަމަށެވެ. އަދި އޭގެ ފައިދާ ރައްޔިތުންނަށް ވެސް ލިބޭނެ ކަމަށާއި ކުރިއަށް އޮތް ޕްރައިމަރީ އިންތިޚާބުގައި ވިސްނުން ގެންގުޅެންވީ އެކަންކަމަށް ވިސްނައިގެން ކަމަށް ރައީސް ފާހަގަކުރެއްވިއެވެ.
ރައީސް ވިދާޅުވީ ޕްރައިމަރީއަކީ ޕާޓީގެ އެތެރޭގެ އިންތިޚާބަކަށްވީ ނަމަވެސް އެކަން ގުޅިފައިވަނީ ޤައުމުގެ ކުރިމަގާ ކަމަށެވެ. އެހެންކަމުން ޕްރައިމަރީގައި ވޯޓުލާއިރު ޤައުމީ ވިސްނުމެއް ގެންގުޅެން ޖެހޭ ކަމަށް އެމަނިކުފާނު ވިދާޅުވިއެވެ.
ރައީސް ފާހަގަކުރެއްވި ގޮތުގައި އެމަނިކުފާނު މިހާތަނަށް ވަޑައިގެންނެވި ހުރިހާ ރަށަކުން ވެސް ފެންނަނީ އެމްޑީޕީއާއެކު މި ސަރުކާރުން ފެށި ދަތުރުގައި ބައިވެރިވެ، ކުރިއަށްދާތަން ކަމަށެވެ. އެހެންކަމުން 28 ވަނަ ދުވަހު އޮންނަ ޕްރައިމަރީ ބޮޑުތަނުން ކާމިޔާބު ކުރެއްވޭނެ ކަމުގެ ޝައްކެއް ނެތް ކަމަށް އެމަނިކުފާނު ވިދާޅުވިއެވެ.
އެމްޑީޕީގެ ޕްރައިމަރީއާއެކު ކުރިއަށް އޮތް ރިޔާސީ އިންތިޚާބު ވެސް ފަސޭހަ ކަމާއެކު ކާމިޔާބު ކުރެވޭނެ ކަމުގެ ޔަގީންކަން އެބައޮތް ކަމަށް ވެސް ރައީސް ވިދާޅުވިއެވެ. ރައީސް ވަނީ މިފަހަރުގެ އިންތިޚާބުގައި އެންމެންވެސް ވަރަށް ވިސްނުންތެރިކަމާއެކު ކުރިއަށް އޮތް ރިޔާސީ އިންތިޚާބާ މެދު ވިސްނައިގެން ވޯޓު ދިނުމަށް އެދިވަޑައިގެންފައެވެ.
އެމްޑީޕީގެ ރިޔާސީ ޕްރައިމަރީ މި މަހުގެ 28 ގައި ބާއްވަން ނިންމާފައިވާއިރު މިފަހަރު ޕްރައިމަރީ އިންތިޚާބުގައި އެމްޑީޕީގެ 57،255 މެންބަރުންނަށް ވޯޓު ލެވޭނެއެވެ. ވޯޓުލުން އޮންނާނީ މި ހިނގާ ޖެނުއަރީ މަހުގެ 28 ވަނަ ދުވަހު ހެނދުނު 9:00 އިން ހަވީރު 5:00 އަށެވެ.
މި އިންތިޚާބުގައި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުއާ ވާދަކުރައްވަނީ އެމްޑީޕީގެ ރައީސް އަދި ކުރީގެ ރައީސް މުޙައްމަދު ނަޝީދުއެވެ.
