ފިސްތޯލައާ ބެހޭ މައުލޫމާތު ނާޒިމަށް އެނގިވަޑައެއް ނުގަންނަވާނެ: އަދީބު
30 ޖޫން 2017 | ހުކުރު 09:16އެކަމުގައި ބައިވެރިވި މީހުންނާއި ރޭވި ގޮތް އެނގޭ ކަމަށް އަދީބު ވިދާޅުވި
ކާނަލް ނާޒިމް އާއި އަހްމަދު އަދީބު
ކުރީގެ ޑިފެންސް މިނިސްޓަރ ކާނަލް (ރޓޑ.) މުޙައްމަދު ނާޒިމްގެ ގެއިން ފެނުނުކަމަށް ބުނާ ފިސްތޯލައާ ނާޒިމްއާ އެއްވެސް ގުޅުމެއް ނެތް ކަމަށް ކުރީގެ ނައިބު ރައީސް އަހްމަދު އަދީބު ވިދާޅުވެއްޖެއެވެ.
ފިސްތޯލައިގެ މައްސަލައިގަ ނާޒިމްގެ މައްޗަށް 11 އަހަރުގެ ޖަލު ހުކުމެއް އިއްވާފައިވާ އިރު އެ ފިސްތޯލައިން ނާޒިމް އަދި އެ އެޕާޓްމަންޓްގައި އުޅޭ އެއްވެސް މީހެއްގެ ފިންގަޕްރިންޓް ފެނިފައި ނުވެއެވެ. ފުލުހުން ކުރި ތަހުގީގުތަކަށް ފަހު ބުނެފައި ވަނީ އެ ފިސްތޯލައިން ފެނިފައި ވަނީ އަދީބުގެ ފިންގަޕްރިންޓް ކަމަށެވެ. ނާޒިމްގެ މައްޗަށް ކުރި ހުކުމު އިސްތިއުނާފީ މައްސަލައިގައި ގޮތެއް ކަނޑައެޅުމުގެ ކުރިން ސުޕްރީމް ކޯޓަށް އެކަން އެންގި ނަމަވެސް އެކަމަށް ބެލުމެއް ނެތި ސުޕްރީމް ކޯޓުން ނިންމާފައި ވަނީ ކްރިމިނަލް ކޯޓާއި އަދި ހައި ކޯޓުން ކުރި ހުކުމުގައި މައްސަލައެއް ނެތް ކަމަށެވެ.
ނާޒިމްގެ އެޕާޓްމަންޓުން ފެނުނީ ނާޒިމާ ގުޅުންހުރި ފިސްތޯލަ އާއި ތިން ވަޒަން ނޫން ކަމަށް އަދީބު ވިދާޅުވެފައި ވަނީ ސުޕްރީމް ކޯޓަށް ހުށަހެޅުއްވި ސިޓީއެއްގައެވެ. މި ވަގުތު 33 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ އަދީބު ސުޕްރީމް ކޯޓަށް ހުށަހެޅުއްވީ ނާޒިމްގެ ކުށެއް ނެތްކަން ސާބިތުކޮށްދެއްވުމަށެވެ. އެ ސިޓީގައި ވަނީ އެކަން ހިނގައިދިޔަ ގޮތް އެނގިވަޑައިގަންނަވާ ކަމަށާއި އެކަން އޮޅުން ފިލުވައިދެއްވުމަށް ތައްޔާރަށް ހުންނެވި ކަމަށެވެ.
"ފިސްތޯލަ އާއި ތިން ވަޒަން، މުހައްމަދު ނާޒިމް ދިރިއުޅުއްވާ އެޕާޓްމަންޓުން ފެންނަންޖެހުނު ގޮތެއް މުހައްމަދު ނާޒިމަށް އެނގިފައިނުވާނެ ކަމުގެ ކަށަވަރުކަން އިއްޒަތްތެރި އުއްތަމަ ފަނޑިޔާރަށް އަޅުގަނޑު މިއަރުވަނީ، އެ ހާދިސާ އެގޮތަށް ހިނގަން މެދުވެރިވި ސަބަބާއި، އެރޭވުން ފެށިގެން އައި ގޮތާއި އެކަމުގައި ބައިވެރިވި މީހުންނާއި އެކަން ނިމިގެންދިޔަ ގޮތް ނުހަނު ރަނގަޅަށް ދެނެހުރި މީހެއްގެ ހައިސިއްޔަތުނނެވެ،" ސުޕްރީމް ކޯޓަށް ޖޫން 20ގައި އަދީބު ފޮނުއްވި ސިޓީގައި ވެއެވެ.
އަދީބު ވިދާޅުވެފައި ވަނީ އެ ތަކެއްޗަކީ ނާޒިމްގެ ތަކެތި ނޫންކަން އަދި އެތަކެއްޗާ ބެހޭ މައުލޫމާތު ނާޒިމަށް އެއްވެސް އިރެއްގައި އެނގިވަޑައިގެންފައި ނުވާނެކަން ޝަރުއީ ހަމަތަކުގެ މަތިން ސާބިތުކޮށްދޭނެ ކަމުގެ ޔަގީންކަން އަރުވާ ކަމަށެވެ.
