އަޅުގަނޑު ހިތުން ފިލައިގެން ނުދޭ، އެދުވަހުގެ ބިރުވެރިކަމާއި މާޔޫސްކަމާއި، ރައީސް އަޅުގަނޑުމެނަށް ދެއްވި ހިތްވަރު. ކޯވިޑު 19 އިން އަރައިގަތުމަށް ކުރި މަސައްކަތަކީ އަޅުގަނޑު ރައީސަށް ތާއީދު ކުރަން ނިންމި އެއް ސަބަބުމަބްރޫކް އަޒީޒް
ރައީސް އޮފީހުގެ ކުރީގެ ތަރުޖަމާން މަބްރޫކް އަޒީޒް އާއްމުންނަށް ފާހަގަވި މޫނަކަށްވީ ކޮވިޑް-19 ގައި ސަރުކާރުގެ މޫނުބަލާ ލޯގަނޑުގެ ގޮތުގައި އާއްމުންނާއި ކުރިމަތިލެއްވި ހިސާބުންނެވެ. ކޮންމެ ރެއަކު އާއްމުންނާއި ކޮވިޑްގެ އަޕްޑޭޓްތަކާއި އެކު ބައްދަލުކުރެއްވި މަބްރޫކް އަކީ އެންމެ ކައިރިން ރާއްޖޭގެ ކޮވިޑްގެ ހާލަތު ދެކިލެއްވި އެއް ބޭފުޅަކަށް ވާނެއެވެ. ހުކުރު ދުވަހުގެ ރޭ ބޭއްވި ރައީސް ޞާލިހު ގެ ކެމްޕެއިން ޖަލްސާގައި މަބްރޫކް ވަނީ ކޮވިޑްގެ ދުވަސްވަރު ރައީސް ދެއްކެވި ހިއްވަރާއި ހިންގުންތެރިކަމަށް ތައުރީފްކުރައްވާފައެވެ.
މުޅި ދުނިޔެ ގަޑުބަޑުކޮށްލި ކޮވިޑްގެ ބަލިމަޑުކަމާއި ކުރިމަތިލެއްވުމުގައި ގައުމު ފުރަބަންދުކުރުން ފަދަ ދަތި އުނދަނގޫ ނިންމެވުންތައް ރައީސް ނިންމެވީ އުނދަނގުލާއި އެކު ވެސް އާއްމުންގެ ކުރިމަގު އިސްކުރައްވައިގެންކަން މަބްރޫކް ވަނީ ފާހަގަކުރައްވާފައެވެ. ކޮވިޑް-19ގެ ކަންތަކުން އިރާދަކުރެއްވިއްޔާ އަރައިގަނެވި މިއަދާ ހަމައަށް އައުމުގައި ރައީސް އެ ދުވަހު ނިންމެވި ހައްސާސް ނިންމުންތައް އަދާކުރާ މުހިންމު ދައުރު އޭނާ ވަނީ ފާހަގަކުރައްވާފައެވެ. އެ ދުވަހު ޤައުމު ފުރަބަންދު ނުކުރި ނަމަ ރާއްޖޭގެ އަވަށްޓެރި އެހެން ޤައުމުތައް ފަދައިން މިއަދު އޮންނަން ޖެހޭނީ އިގްތިސާދީ ހީނަރުކަމެއްގެ ތެރޭގައި ކަމަށް ވެސް މަބްރޫކް ވިދާޅުވިއެވެ. އެހެންކަމުން އަވަށްޓެރި ގައުމުތައް އޮތް ހާލަށް ބަލާއިރު، ރާއްޖެ ކަހަލަ ގައުމަކަށް ކޮވިޑުން އަރައިގަނެވިފައިވަނީ އިއްތިފާގަކުން ނޫންކަމަށް މަބްރޫކް ފާހަގަކުރެއްވިއެވެ.
ކޮންމެ ރެއަކު ކެބިނެޓްގެ ބޭފުޅުންނާއި ކޮވިޑްގެ އޮޕަރޭޝަންގައި ހަރަކާތްތެރިވި ބޭފުޅުންނާއި ސިލްސިލާކޮށްބޭއްވި ބައްދަލުވުންތަކުން ރައީސް ދެއްކެވީ ހިއްވަރާއި ކެތްތެރިކަން ކަަމަށް މަބްރޫކްގެ ވާހަކަތަކުން ފާހަގަވިއެވެ. ކޮންމެ ރެއަކުމެ ވަރުބަލިކަމެއް ނެތި އެ އަޑުތައް އެއްސެވީ ރައްޔިތުންގެ ކުރިމަގު އިސްކުރައްވާ ގައުމު އާރާސްތުކުރެއްވުމުގައި ވަރުބަލިކަމެއް ނެތި ކުރެއްވި މަސައްކަތުގެ ސަބަބުން ކަމަށް ވެސް މަބްރޫކްގެ ވާހަކަތަކުން އެނގުނެވެ. އެ ހާލަތުގައި ރައީސް ދެއްކެވި ހިއްވަރު ސިފަކުރައްވާ މަބްރޫކް ވިދާޅުވީ " ރައީސަކީ ޓީމް ކެޕްޓަނެއް" ކަމަށެވެ. އެކުގައި މަސައްކަތް ކުރާ މީހުންގެ އަޑު އެެއްސެވުމާއި ހިއްވަރުދިނުމުގައި އެމަނިކުފާނު ދައްކަވާ ނަމޫނާ މަބްރޫކް ފާހަގަކުރެއްވީ ފަޚުރުވެރިކަމާއި އެކުގައެވެ.
މީގެ އިތުރުން މަބްރޫކް ވަނީ މަޝްވަރާކުރުމުގެ ރިވެތި ސިފަ އަކީ ރައީސްގެ އެންމެ ކަމުދާ ސިފަކަމަށް ފާހަގަކުރައްވާފައެެވެ. އަދި ރައީސް އަށް ތާއީދުކުރައްވަން ނިންމެވީ އެމަނިކުފާނަކީ އެންމެންނާއި އެކުގައި މަސައްކަތްކުރުމުގެ ޤާބިލްކަން ހުރި ބޭފުޅަކަށްވުމުން ކަަމަށް ވެސް މަބްރޫކް ވަނީ ފާހަގަކުރައްވާފައެވެ. މީގެ އިތުރުން ރައީސް އިބްރާހިމް މުހައްމަދު ޞާލިހުގެ އެންމެ ކަމުދާ ސިފަޔަކީ ޚިޔާލު ތަފާތުވިޔަސް ވާ އަހުދުތައް ފުއްދާދިނުން ކަމަށް އޭނާ ވަނީ ވިދާޅުވެފައެވެ.
މަބްރޫކް ވަނީ ރައީސް ޞާލިހު އަށް ވަރަށް ބޮޑަށް ތައުރީފްކުރައްވާފައެވެ. އެގޮތުން ރައީސް އަކީ ބަހުގެ އިތުބާރު ހިފޭ ބޭފުޅެއް ކަމަށާއި ވައުދެއް ވެއްޖެ ނަމަ އެކަން ރައީސް ފުއްދަވާދެއްވާނެ ކަމުގެ ޔަގީންކަން އޮތް ކަމަށް މަބްރޫކް ވިދާޅުވިއެވެ. ރައީސް އަކީ އަޑު އައްސަވާ ކެތްތެރި ބޭފުޅެއް ކަަމަށް ވެސް އޭނާ ވަނީ ވިދާޅުވެފައެވެ. މީގެ އިތުރުން ރައީސް ޞާލިހުގެ އެންމެ ކަމުދާ އަނެއް ސިފަޔަކީ އެމަނިކުފާނަކީ ޓީމް ލީޑަރެއް ކަަމަށް ވުން ކަމަށާއި އެމަނިކުފާނަކީ ޓީމް ކެޕްޓަން ކަމަށް މަބްރޫކް ވަނީ ސިފަކުރައްވާފައެވެ.
