އެއް ރަށް އަނެއް ރަށާ ގުޅުވާލެވިގެން މެނުވީ ހަޤީޤީ އިޤްތިސާދީ ކުރިއެރުން ނުލިބޭނެ: ރައީސް
ސަރުކާރުގެ ހުރިހާވެސް އަމާޒަކީ ރައްޔިތުންނަށް އުފާ ފާގަތިކަން ގެނެސްދިނުން
ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު
އެއް ރަށް އަނެއް ރަށާ ގުޅުވާލެވިގެން މެނުވީ ހަޤީޤީ އިޤްތިސާދީ ކުރިއެރުން ނުލިބޭނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ރައީސް ވިދާޅުވީ، ރާއްޖެ ތަރައްޤީ ކުރުމަށް މި ސަރުކާރުން ގެންގުޅޭ ޕްލޭނަކީ ކުޑަ ރަށެއް ބޮޑު ރަށެއް ތަފާތު ނުކުރުން ކަމަށާއި، ށ އަތޮޅުގެ ރަށްތަކަކީވެސް މީގެ ކުރިން މުޅިން އެކަހެރިކޮށް ދޫކޮށްލެވިފައިވާ ރަށްތަކެއް ކަމަށެވެ.
އެ ދާއިރާގެ ހުރިހާ ރަށެއްގައިވެސް ފެނާއި ނަރުދަމާގެ މަސައްކަތްތައް ކުރެވެމުންދާކަން ފާހަގަކުރައްވައި ރައީސް އިތުރަށް ވިދާޅުވީ، މާލެއާއި ބޮޑެތި ރަށްތަކެކޭ އެއްގޮތަށް ކުދި ރަށްތަކަށްވެސް އެ ޚިދުމަތްތައް ބޭނުންވާނެ ކަމަށެވެ.
އެއް ރަށް އަނެއް ރަށާ ގުޅުވާލެވިގެން މެނުވީ ހަގީގީ އިޤްތިސާދީ ކުރިއެރުން ނުލިބޭނެ ކަމަށާއި، އެކަން ކުރަމުން މިދަނީ މި ސަރުކާރުން ކަމަށް ރައީސް ވިދާޅުވިއެވެ. މިއަދު މި ސަރުކާރުން އެ މަސައްކަތްތައް ކުރަމުންދަނީ ރަނގަޅު ޕްލޭނަކާއެކުކަން ރައީސް ފާހަގަ ކުރެއްވިއެވެ.
ރައީސް އިތުރަށް ވިދާޅުވީ، ސަރުކާރުން ވެފައިވާ ވައުދުތަކާ އެއްގޮތަށް މި ދާއިރާގެ މަސައްކަތްތައްވެސް ކުރިއަށް ގެންދަވާނެ ކަމަށެވެ.
މި ވޭތުވެދިޔަ 4 އަހަރުގެ ތެރޭގައި 168 މިލިއަން ރުފިޔާ އެ އަތޮޅުގެ 5 ރަށަށް ޚަރަދު ކުރެވިފައިވާކަން ފާހަގަ ކުރައްވައި ރައީސް ވިދާޅުވީ، މިއީ ވޭތުވެދިޔަ 15 އަހަރު ތެރޭގައި އެ ރަށްތަކަށް ކޮށްފައިވާ ޚަރަދާ ނުބައްދަލު އަދަދެއް ކަމަށެވެ. އެއީ ކޮވިޑުގެ އާލަމީ ވަބާގެ ތެރޭގައި ހޭދަވި 2 އަހަރު ކެނޑުމުން ދެން ވޭތުވެދިޔަ މުއްދަތުގައި ކުރެވިފައިވާ ޚަރަދުތަކެވެ.
ރައީސް ވިދާޅުވި ގޮތުގައި ސަރުކާރުގެ ހުރިހާވެސް އަމާޒަކީ ރައްޔިތުންނަށް އުފާ ފާގަތިކަން ގެނެސްދިނުމެވެ.
ރައީސް ވަނީ ކޮވިޑުގެ ދަތިކަމުން އަރައިގަތުމަށް އެހީތެރިވެދީފައިވާ ފަރާތްތައް ފާހަގަ ކުރައްވައި އެކަމަށް ޝުކުރު އަދާ ކުރައްވާފައެވެ.
އޭގެ އިތުރުން، ކުރިއަށް އޮތް ޕްރައިމަރީގައި ވޯޓުލާއިރު، ހުރިހާ ކަމަކަށްވެސް ވިސްނުމަށްފަހު ވޯޓުލުމަށް ރައީސް ވަނީ އެދިވަޑައިގަންނަވާފައެވެ. އެގޮތުން 2008 އަދި 2009 ގައި ކުރިމަތިވި މާލީ ދަތިކަމުގައި އޭރުގެ ސަރުކާރުން ޚަރަދު ކުޑަ ކުރުމުގެ ނަމުގައި ކުރި ކަންކަމުގެ ނުރަނގަޅު އަސަރު ވަކިވަކި ފަރުދުންގެ ދިރިއުޅުމަށް ބޮޑުތަނުން ކުރިކަމަށް ރައީސް ވިދާޅުވިއެވެ.
އެހެންނަމަވެސް، ކޮވިޑުގެ ދަތި ޙާލަތުގައިވެސް ސަރުކާރުން އިސްކޮށްފައިވާނީ ރައްޔިތުންކަން ރައީސް ފާހަގަ ކުރެއްވިއެވެ.
ރައީސް ވަނީ ކުރީގެ ރައީސް އަބްދުﷲ ޔާމީނުގެ ސަރުކާރުގެ އަނިޔާވެރިކަމުގެ މައްޗަށްވެސް އަލިއަޅުވާލައްވާފައެވެ. އެ ދުވަހުގެ އަނިޔާވެރިކަމަކީ ނުވާ ކަމެއްކަމަށް މިއަދު ބައެއް ފަރާތްތަކުން ދެކުނު ނަމަވެސް، އެއީ ނުހިނގާ ކަމެއްކަމަށް ހަދައި، އެ އަނިޔާވެރި ކަމުގެ ތެރެއަށް ދާންވީތޯ މިއީ ވިސްނަން ޖެހޭ ކަމެއްކަމަށް ރައީސް ވިދާޅުވިއެވެ.
ރައީސް ވަނީ އެ އަނިޔާވެރިކަމުގެ ތެރެއަށް ވެރިކަން އަނެއްކާވެސް ފުރޮޅިގެން ދިއުމަށް ރައްޔިތުން ނޭދޭކަމަށް ވިދާޅުވެފައެވެ. އެގޮތުން ކެމްޕޭން ދަތުރުތަކުގައިވެސް އެކަންކަން ފެންނަމުންދާކަމަށް ރައީސް ވިދާޅުވިއެވެ.
