އުމުރުން 42 އަހަރު ވަންދެން ޕެޕޭ ފުޓުބޯޅަ ކުޅޭނެ

ޕޯޓޯ އަށް ކުޅެމުން އަންނަ ޕޯޗުގަލްގެ ޑިފެންޑަރު ޕެޕޭ އުމުރުން 42 އަހަރު ވަންދެން ފުޓުބޯޅަ ކުޅޭނެ ކަމަށް ރިޕޯޓުތައް ބުނެފި އެވެ.

މިހާރު އުމުރުން 39 އަހަރުގެ ޕެޕޭ އަށް، އަންނަ ފެބްރުވަރީ މަހު 40 އަހަރު ފުރޭނެ އެވެ. އޭނާ ވަނީ މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕް މުބާރާތުގައި ޕޯޗުގަލަށް ކުޅެފަ އެވެ. އެ މުބާރާތުގައި ވެސް ޕެޕޭ ވަނީ ޕޯޗުގަލްގެ ޑިފެންސްގައި މޮޅު ކުޅުމެއް ދައްކައިފަ އެވެ. ޕޯޓޯގައި ވެސް ޕެޕޭ އަންނަނީ ޤަވާއިދުން އެ ޓީމުގެ ޑިފެންސްގައި ކުޅެމުންނެވެ. ލީގުގައި ޕޯޓޯ އަށް އެންމެ ފަހުން ކުޅެދިން 16 މެޗުގެ ތެރެއިން އަށް މެޗުގައި ޕެޕޭ ވަނީ ފުރަތަމަ 11 ގައި ހިމެނިގެން ކުޅެފަ އެވެ. މީގެ އިތުރުން ޔުއެފާ ޗެމްޕިއަންސް ލީގުގައި ކުޅުނު ހަ މެޗުގެ ތެރެއިން ތިން މެޗުގައި ވަނީ ފުރަތަމަ 11 ގައި ހިމެނިގެން ކުޅެފަ އެވެ.

ޕޯޓޯއާއެކު މިހާރު ޕެޕޭ ހަދާފައިވާ އެއްބަސްވުމުގެ މުއްދަތު ހަމަވާނީ މި ސީޒަންގެ ނިޔަލަށެވެ. ނަމަވެސް ޕޯޓޯގެ ކޯޗު ސާޖިއޯ ކޮންސެއިސާއޯ ބޭނުންވަނީ ޕެޕޭ އެ ޓީމުގައި މަޑުކުރަން ކަމަށް މީޑިއާ ރިޕޯޓުތައް ބުނެ އެވެ. އަންނަ ފެބްރުވަރީ މަހު ޕެޕޭގެ އުމުރުން 40 އަހަރު ފުރޭ ނަމަވެސް، އޭނާ ޤަބޫލު ކުރާ ގޮތުގައި ފިޓްނަސް ހިފަހައްޓައި، ކުރިއަށް އޮތް ސީޒަންގައި ކުޅެވޭނެ ކަމުގެ އިތުބާރު ޕެޕޭ އަށް އޮތް ކަމަށް ރިޕޯޓުތައް ބުނެ އެވެ. އަދި ޕޯޗުގަލްގެ މީޑިއާ ރިޕޯޓުތައް ބުނާ ގޮތުން ޕޯޓޯ އިން އަންނަނީ ޕެޕޭ އަށް އެއްބަސްވުން އިތުރު ކުރުމަށް ހުށަހަޅަން ތައްޔާރުވަމުންނެވެ. އެގޮތުން ޕޯޓޯ އިން ބޭނުންވަނީ 25-2024 ވަނަ ސީޒަންގެ ނިޔަލަށް ޕެޕޭ އެ ޓީމުގައި މަޑުކުރަން ކަމަށާއި ޕޯޓޯ އިން ޕެޕޭ އަށް އައު އެއްބަސްވުމެއް ހުށަހަޅައި، ކުލަބުގައި މަޑުކުރަން އެދިއްޖެ ނަމަ އޭނާ އެކަން ޤަބޫލު ކުރާނެ ކަމަށް ވެސް ރިޕޯޓުތައް ބުނެ އެވެ.

ޕޯޗުގަލްގެ ޤައުމީ ޓީމަށް މިހާތަނަށް 133 މެޗު ކުޅެދީފައިވާ ޕެޕޭ ބޭނުންވަނީ ޤައުމީ ޓީމާއެކު މިއަހަރު އޮންނަ ޔޫރޯ މުބާރާތުގައި ވެސް ޕޯޗުގަލާއެކު ކުޅެން ކަމަށެވެ. ޕެޕޭ ވަނީ މިހާތަނަށް ޕޯޗުގަލާއެކު 2016 ވަނަ އަހަރުގެ ޔޫރޯ މުބާރާތާއި، 19-2018 ވަނަ އަހަރުގެ ޔުއެފާ ނޭޝަންސް ލީގު ވެސް ކާމިޔާބުކޮށްފަ އެވެ.