ގައުމީ ޔުނިވަރސިޓީގެ "ފަހި ދުވަސް" ބުރާސްފަތި ދުވަހު
މި ހަރަކާތް ކުރިއަށްދާނީ ބުރާސްފަތި ދުވަހުގެ ހަވީރު 4:00ން 6:00ށް، އަދި ރޭގަނޑު 8:00ން 10:00ށް
އެމްއެންޔޫ
ދިވެހިރާއްޖޭގެ ގައުމީ ޔުނިވަރސިޓީގެ ކޯސްތަކާގުޅޭ މައުލޫމާތު ހިއްސާކުރުމަށް ކުރިއަށްގެންދާ "ފަހި ދުވަސް" އަންނަ ބުޜާސްފަތި ދުވަހު ބާއްވަން ތާވަލުކޮށްފިއެވެ.
ގައުމީ ޔުނިވަރސިޓީން ބުނެފައިވާގޮތުގައި މި ހަރަކާތް ކުރިއަށްދާނީ ބުރާސްފަތި ދުވަހުގެ ހަވީރު 4:00ން 6:00ށް، އަދި ރޭގަނޑު 8:00ން 10:00ށެވެ. މި ހަރަކާތުގައި ޔުނިވަރސިޓީގެ ހުރިހާ ފެކަލްޓީއަކާއި ސެންޓަރުތަކާ ބެހޭ މައުލޫމާތާއި، ކޯސްތަކާ ބެހޭ މައުލޫމާތު ލިބެން ހުންނާއެވެ.
މި އިވެންޓުގެ ތެރޭގައި، އޭލެވެލް އަދި އެހެނިހެން ނަތީޖާ ލިބިފައިވާ ދަރިވަރުންނަށް ޔުނިވަރސިޓީގެ ކޯސްތަކަށް ކުރިމަތިލުމަށް ފޯމު ބަލައިގަތުންވެސް ކުރިއަށްދާނެ ކަމަށް ގައުމީ ޔުނިވަރސިޓީން ބުނެއެވެ.
ދިވެހިރާއްޖޭގެ ގައުމީ ޔުނިވަރސިޓީއަކީ ފަންނީ، ގާބިލް ލެކްޗަރަރއިންނާއެކު، ތަފާތު އެތައް ދާއިރާތަކުން ތައުލީމާއި ތަމްރީން ޕްރޮގްރާމްތަކެއް ހިންގަމުންގެންދާ ޔުނިވަރސިޓީއެކެވެ. ޔުނިވަރސިޓީގެ ފަންނީ ދާއިރާތަކުގެ ލެކްޗަރަރއިން، އެ ފަރާތްތަކުން ދާއިރާތަކުން މަތީ ތައުލީމު ހާސިލުކުރުމަށް ހުރި ފުރުސަތުތަކާ ބެހޭ މައުލޫމާތުތަކާއި، މަތީ ތައުލީމު ހާސިލުކުރުމަށް ވާންޖެހޭ ތައްޔާރީތަކުގެ މައުލޫމާތު، "ފަހި ދުވަސް" ހަރަކާތުގައި ބައިވެރިވާ ފަރާތްތަކާ ހިއްސާކުރައްވާނެއެވެ.
ފަހި ދުވަހުގައި މައުލޫމާތު ފޯރުކޮށްދެވޭ ދާއިރާތަކުގެ ތެރޭގައި،; ބަހާއި އިންސާނީ އިލްމުތަކުގެ ދާއިރާ، ތައުލީމީ ދާއިރާ، އިންޖިނިއަރިންގ ދާއިރާ، ސިއްހީ ދާއިރާ، ފަތުރުވެރިކަމާއި މެހެމާންދާރީގެ ދާއިރާ، ދީނީ އިލްމުގެ ދާއިރާ، ސައިންސްގެ ދާއިރާ، ޝަރީއަތާއި ގާނޫނުގެ ދާއިރާ، ވިޔަފާރީގެ ދާއިރާ، ނިޔަމިކަމުގެ ދާއިރާ، އަދި ފައުންޑޭޝަން ކޯސްތައް ހިމެނެއެވެ.
ގައުމީ ޔުނިވަރސިޓީން މިއަހަރު ހުޅުވާލާފައިވާ ފުރުސަތުގެ ދަށުން، ކޯސްތަކުގައި ބައިވެރިވުމަށް އެދި ފޯމު ހުށަހެޅުމުގެ ސުންގަޑި މި މަހުގެ 26 ވާ ބުރާސްފަތި ދުވަހުގެ މެންދުރުފަހު 2:00ގެ ނިޔަލަށް ހަމަވާނެއެވެ.
