އަޙުމަދިއްޔާ ބަލިކޮށް ތާޖުއްދީނަށް ރަނގަޅު ފެށުމެއް
ގްރޫޕް ބީ ގައި ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ތާޖުއްދީން އިން ކާމިޔާބުކުރީ 3-0 އިން
އިންޓަ ސްކޫލްގެ ތެރެއިން
އިންޓަ ސްކޫލް 17 އަހަރުން ދަށުގެ ފުޓުބޯޅަ މުބާރާތުގައި އަޙުމަދިއްޔާ އިންޓަނޭޝަނަލް ސްކޫލް ބަލިކޮށް ތާޖުއްދީން ސްކޫލް އިން ރަނގަޅު ފެށުމެއް ހޯދައިފި އެވެ.
ގްރޫޕް ބީގައި ހޯމަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ތާޖުއްދީން އިން ކާމިޔާބުކުރީ 3-0 އިންނެވެ. މެޗުގެ ފުރަތަމަ ހާފުގައި ވެސް ތާޖުއްދީން އިން ވަނީ ދެ ލަނޑު ޖަހައި ލީޑު ހޯދައިފަ އެވެ. ތާޖުއްދީން އަށް މެޗުގެ 10 ވަނަ މިނެޓުގައި ލީޑު ނަގައިދިނީ ޔޫސުފް ނައްޔާން މުސްތަފާ އެވެ. އެ ޓީމުގެ ލީޑު އިތުރަށް ފުޅާކޮށްދިނީ މެޗުގެ 28 ވަނަ މިނެޓުގައި އަޙުމަދު އަނާން އިމާދު އެވެ. ތާޖުއްދީންގެ ތިން ވަނަ ލަނޑަކީ ދެ ވަނަ ހާފުގެ 42 ވަނަ މިނެޓުގައި ޢަބްދުﷲ ރިޒާން މުޙައްމަދު ޖަހައިދިން ލަނޑެކެވެ. މި މޮޅާއެކު ތާޖުއްދީން ވަނީ މި ގްރޫޕްގެ އެއް ވަނަ އަށް ވެސް ޖެހިލައިފަ އެވެ. އެއީ ތިން ޕޮއިންޓާއެކު އެވެ.
މި ގްރޫޕްގައި ހިރިޔާ ސްކޫލް އާއި ޢަރަބިއްޔާ ސްކޫލް ބައްދަލުކުރި މެޗު ނިމުނީ ދެ ޓީމު އެއްވަރުވެގެންނެވެ. މުބާރާތުގެ ކުޅުން އަންގާރަ ދުވަހު ވެސް ކުރިއަށްދާނެ އެވެ. އަންގާރަ ދުވަހު ކުރިއަށް ދާނީ ގްރޫޕް ސީގެ މެޗުތަކެވެ. ފުރަތަމަ މެޗުގައި ބައްދަލުކުރާނީ އިސްކަންދަރު ސްކޫލާއި ގުރައިދޫ ސްކޫލް އެވެ. ދެ ވަނަ މެޗުގައި ބައްދަލުކުރާނީ އަމީނިއްޔާ ސްކޫލާއި ހުރަވީ ސްކޫލް އެވެ.
