ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު އަކީ ތަންދޮރު ނުދަންނަ ބޭފުޅެއް ކަަމަށް ދޭހަވާ މޭރުމަކުން އެމްޑީޕީގެ ރިޔާސީ ޕްރައިމަރީގައި ރައީސް ޞާލިހު އާއި ވާދަކުރައްވާ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުންނެވެ. އެ ބައްދަލުވުމުގައި ނަޝީދު ވަނީ ކުރީގެ ރައީސް އަބްދުﷲ ޔާމީން އަށް ތައުރީފްކުރައްވާފައެވެ. އެގޮތުން ރައީސް ޞާލިހު އަށް ވުރެ ޔާމީންއަށް ތާއީދު އޮތްކަމަށް ރައީސް ނަޝީދު ވަނީ ސިފަކުރައްވާފައެވެ. މި މޭރުމުން ވާހަކަދައްކަވަމުން ނަޝީދު ވިދާޅުވީ ޔާމީން އަކީ ކިޔަވައިގެން ހުރި، ތަންދޮރު ދަންނަ ގާބިލު ބޭފުޅެއް ކަމަށެވެ. އެހެންނަމަވެސް އެފަދައިން ރައީސް ޞާލިހު އާއި މެދު ދެންނެވެން ނެތްކަމަށް އެމަނިކުފާނު ވަނީ ވިދާޅުވެފައެވެ. އަދި ޕީޕިއެމް އާއި ޔާމީނާއި މެދު އޮތް ހަމައެކަނި ހިޔާލު ތަފާތުވުމަކީ "އިންޑިއާ އައުޓް" ކެމްޕެއިން ކަމަށް ވެސް ރައީސް ނަޝީދު ވިދާޅުވިއެވެ.

ރައީސް ނަޝީދު ވަނީ ރާއްޖޭގެ މާލީ ހާލަތު ރަނގަޅުކުރަން އެޅި ފިޔަވަޅުތަކަށް ވެސް ފާޑު ވިދަޅުވެފައެވެ. "އިކޮނޮމިކް އަދި އެކެޑެމިކް" ބޭފުޅުންނަށް އެމަނިކުފާނު ދައްކަވާ ވާހަކަ ފަހުމުވާނެ ކަމަށް ވިދާޅުވެ ނަޝީދު ވަނީ ރައީސް ޞާލިހު އަށް ފާޑު ވިދާޅުވެފައެވެ. ރައީސް ޞާލިހު އިގްތިސާދު ކުރިއަށް ގެންދަވަނީ މިނިސްޓަރ އިބްރާހިމް އަމީރު އެދިލެއްވި ގޮތަކަށް ހެން ހީފުޅުވާކަމަށް ވަނީ ވިދާޅުވެފައެވެ. ރާއްޖޭގެ އިގްތިސާދު އޮތީ ދަރަނި ބޮޑުވާ ގޮތަަށް ކަމަށާއި ޓެކްސް ބޮޑު ކުރަން ޖެހުނީ އެހެންވެގެން ކަމަށް ނަޝީދު ވިދާޅުވިއެވެ. އަދި ތަކެތީގެ އަގު ބޮޑުވެފައިވާ ކަމަށާއި މަޝްރޫއުތައް ލަސްކުރަން ޖެހޭ ކަމަށް ވިދާޅުވެ ރައީސް ޞާލިހު އަށް ނަޝީދު ވަރަށް ބޮޑަށް ފާޑު ވިދާޅުވިއެވެ. އިގްތިސާދީ ވާހަކަތައް ރައީސް ދައްކަވަނީ ދެބައިކުޅަ އެއްބައި ކަމަށް ސިފަކުރައްވާ މިނިސްޓަރ އަމީރު މެދުވެރިކޮށް ފިލޯސޮފީތަކާއި މެދު މަޝްވަރާކުރުމަށް ފޮނުއްވުމަށް ވެސް ނަޝީދު ވަނީ ގޮވާލައްވާފައެވެ.

މީގެ އިތުރުން އެމްޑީޕީގައި ރައީސް ޞާލިހު އަކީ މަގްބޫލު ބޭފުޅެއް ނޫން ކަމަށް ނަޝީދު ވަނީ ސިފަކުރައްވާފައެވެ. އެގޮތުން ރައީސް ޞާލިހު އަކީ އެމްޑީޕީ އިން ފުރަތަމަ ދިޔަ ދަތުރުތަކުގައި ވަޑައިގަންނެވި ބޭފުޅެއް ނޫން ކަމަށާއި ޖަލަށް ވެސް ވަޑައިގަތީ ފަހު ވަގުތުގައި ކަމަށް ވިދާޅުވިއެވެ.