އަންޗެލޮޓީ ބުނަނީ މެޗުގައި ރެއާލްގެ އެއްވެސް ކުޅުންތެރިޔަކަށް ނުކުޅެވޭ ކަމަށް

ސްޕެނިޝް ސުޕަ ކަޕްގެ ފައިނަލްގައި ވާދަވެރި ބާސެލޯނާ އަތުން ބަލިވި މެޗުގައި ރެއާލް މެޑްރިޑުގެ އެއްވެސް ކުޅުންތެރިޔަކަށް ނުކުޅެވޭ ކަމަށް ކާލޯ އަންޗެލޮޓީ ބުނެފި އެވެ.

ރެއާލްގެ ކޯޗު އަންޗެލޮޓީ މިހެން ބުނީ ފައިނަލަށްފަހު ވާހަކަ ދައްކަމުންނެވެ. އޭނާ ބުނީ މެޗުގައި ފެނުނީ ރެއާލުން ބާސެލޯނާ އަށް "ހަދިޔާ" އެއް ގޮތުގައި ކަންކަން ދެމުން އައި ކަހަލަ މަންޒަރެއް ކަމަށެވެ. އެގޮތުން މެޗު ފަށައިގެން އައި އިރު ވެސް ރެއާލްގެ ކުޅުންތެރިންގެ ފަރާތުން މެޗުގެ ޖޯޝު މާ ބޮޑަށް ނުފެންނަ ކަމަށާއި، ބާސެލޯނާ އަށް ފަސޭހައިން ދެ ލަނޑު ކުރީ ކޮޅު ޖެހުނީ އެހެންވެ ކަމަށެވެ. އަންޗެލޮޓީ ބުނީ ކުރިއަށް އޮތް ތަނުގައި ރެއާލުން މުޅި ޓީމުގެ ފިޒިކަލް ހާލަތު ރަނގަޅު ކުރަން ޖެހޭނެ ކަމަަށާއި، އެއަށްފަހު ޓީމެއްގެ ގޮތުގައި ކުޅެން މަސައްކަތް ކުރަން ޖެހޭ ކަމަށެވެ. އަދި މެޗުގައި ހެދުނީ ވަރަށް އާދައިގެ ގޯސްތަކެއް ކަމަށާއި، އެއްވެސް ކުޅުންތެރިޔަކަށް ކުޅެވުނީ އެންމެ ރަނގަޅު މެޗެއް ނޫން ކަމަށެވެ. އަންޗެލޮޓީ ބުނީ ރެއާލްގެ ކުޅުންތެރިންނަށް އެއަށްވުރެ ރަނގަޅަށް ކުޅެވެން ޖެހޭނެ ކަމަށެވެ.

އަންޗެލޮޓީ ބުނީ މިއީ ރެއާލަށް ސީރިއަސް ވަގުތެއް ނޫން ކަމަށެވެ. ނަމަވެސް މިއީ މުޅި ޓީމަށް ވެސް އުނދަގޫ ވަގުތެއް ކަމަށާއި، ބުނެދޭން ވެސް ދަތި ވަގުތެއް ކަމަށެވެ. އެގޮތުން ބައެއް ސީޒަންތަކުގައި މިފަދަ ހާލަތްތައް ވެސް ކުރިމަތިވާނެ ކަމަށާއި، އެންމެ ފުރަތަަމަ ދުވަހުން ފެށިގެން އެކަން އެނގޭ ކަމަށެވެ. އަންޗެލޮޓީ ބުނީ އެކަން ހައްލު ކުރެވޭނީ ކުޅުންތެރިންނާއި އެންމެ ގުޅިގެން ފުރިހަމަ އެއްބާރުލުމެއް ލައިގެން ކަމަށެވެ. އަދި މުޅި ޓީމަށް ވެސް މިއީ ހިތާމަވެރި ވަގުތެެއް ކަމަށާއި، ސަބަބަކީ ރެއާލް އަކީ އާންމު ގޮތެއްގައި ފައިނަލްގައި ބަލިވާ ޓީމަކަށް ނުވުމުން ކަމަށެވެ. އޭނާ ބުނީ މެޗުތަކުގައި އެނބުރި އަންނާނެ ހުރިހާ ވަސީލަތެއް ރެއާލްގައި އޮތް ކަމަށާއި، ރެއާލް އެނބުރި އަންނާނެ ކަމަށެވެ. އަންޗެލޮޓީ ވަނީ އެއްވެސް ސަޕޯޓަރަކު އެކަމާ ޝައްކު ނުކުރަން އެދިފަ އެވެ.

ސްޕެނިޝް ސުޕަ ކަޕްގެ ފައިނަލުން ބަލިވުމުން ރެއާލަަށް ވަނީ މި ސީޒަންގައި ހަ ތަށި ކާމިޔާބު ކުރުމުގެ ފުރުސަތު ގެއްލިފަ އެވެ. މި ސީޒަންގެ މިހާތަނަށް އެ ޓީމުން ވަނީ ޔުއެފާ ސުޕަ ކަޕް ކާމިޔާބުކޮށްފަ އެވެ. ދެން އެ ޓީމަށް އޮތީ ފީފާ ކުލަބް ވޯލްޑް ކަޕެވެ. ސްޕެނިޝް ލީގުގައި ބާސެލޯނާއާ ވާދަކުރަމުން އަންނައިރު، ޔުއެފާ ޗެމްޕިއަންސް ލީގާއި ކޮޕަ ޑެލް ރޭ މުބާރާތުގައި ވެސް އެ ޓީމު އެބަ އޮތެވެ.