އެކި ބާވަތްތަކުގެ ވެލައަކީ ދުނިޔޭގެ ކޮންމެ ހިސާބަކަށް ބެލި ކަމުގައި ވީ ނަމަވެސް ނެތި ދިއުމުގެ އިންތިހާ ބިރާ ކުރިމަތިލާން ޖެހިފައިވާ އެއްޗެކެވެ. ވެލާގެ އާބާދީ ދިރުވާ އާލާ ކުރުމަށް ހިންގާ މަޝްރޫއުތަކުގެ ޢަދަދުވެސް މަދެއް ނޫނެވެ. އެ ގޮތުން ފާހަގަ ކުރެވޭ، އެންމެ ޢަދަޔާ ޚިލާފު އެއް މަޝްރޫއު ކުރިއަށް ގެންދާ އެއް ބަޔަކީ ވައިލްޑް ލައިފް ކޮންޒަރވޭޝަން ސޮސައިޓީ ނުވަތަ ޑަބްލިއުސީއެސްއެވެ.

ޑަބްލިއުސީއެސް ޖަމާއަތުން ދާދި ފަހުން ވަނީ، ބްރެޒީލްއާއި ބޮލީވިއާ ހިއްސާ ކުރާ ބޯޑަރު ސަރަޙައްދުގައި ދެމިގެންދާ ކޯރުގެ އައްސޭރިފަށުގައި އާލާކުރި ވެލާ ބިސްތަކުން އުފަންވި ސައުތު އެމެރިކަން ރިވަރ ޓަރޓްލްތައް ބިހުން ނުކުމެ، އެ ވެލާތަކުގެ ދިރިއުޅުމާ ކުރިމަތިލާން ދިޔަ މަންޒަރު ފެންނަ ވީޑިއޯއެއް އާންމު ކޮށްފައެވެ.

ސާފު ފެނުގައި ދިރިއުޅޭ ވެލާތަކުގެ ތެރެއިން، ލެޓިން އެމެރިކާ ސަރަޙައްދަށް ބަލާއިރު އެންމެ ބޮޑު ބަވަތުގެ ވެލާތައް، އެމެޒޯން ބޭސިންގެ ހުޅަނގު ފަރާތު އައްސޭރީގައި ދެމިގެންދާ ވެލީގެ ގޮނޑުދޮށަށް ބިސް އަޅަމުންދާ އެ ސަރަޙައްދަކީ، މުޅި ދުނިޔޭގެ ނިސްބަތުން ބަލާއިރުވެސް، އެއް ބާވަތެއްގެ އެންމެ ގިނަ ޢަދަދެއްގެ ވެލާ، އެއްތަނަކުން ފެންނަ ސަރަޙައްދެވެ.

ސެޕްޓެމްބަރު މަސް ނިމޭއަތަށް އެޅުމުން، އެތައް ހާސް ވެލައެއް އެ ގޮނޑުދޮށްތަކަށް ޖަމާވެ، ވަޅުކޮނެ، ބިސް އެޅުމުގެ މަސައްކަތް ފަށައެވެ. އަންދާޒާ ކުރެވޭ ގޮތުގައި، 80000 އެއްހާ ވެލާ، އެ ގޮނޑުދޮށްތަކަށް ބިސް އަޅައެވެ.

ޑަބްލިއުސީއެސްގެ ކޮންޒަރވޭޝަން ޕާޓްނަރ، އިކޯވޭލްއިން އާންމުކޮށްފައި ވާ މަންޒަރުތަކުން ފެންނަ ގޮތުގައި، މުޅި ގޮނޑުދޮށް ފުރާލާފައިވަނީ، ޅަ ވެލާތަކުންނެވެ. އެ ޢަދަދުތައް ހާހުން ގުނާލެވޭނެއެވެ. ބިހުން ނުކުމެ، ކޯރަށް ފައިބައިގެން ދިއުމުގެ ކުރިން، އެ ޅަ ވެލާތައް ވެލިގަނޑު މަތީގައި ފިރުކެމުންދާ މަންޒަރަކީ، ބާލަލި ކޮންމެ މީހެއްގެ ހިތަށްވެސް ހަމަޖެހުން ގެނުވާނެ މަންޒަރެއްކަން ޔަޤީނެވެ.

ބިހުގެ ތޮށިގަނޑު ފަޅާލުމަށްފަހު ވެލާތައް ނުކުންނަން ފަށާފައި ވަނީ ޑިސެމްބަރު މަހުގެ މެދަކާ ހިސާބުގައެވެ. ޖެނުއަރީ މަހުގެ ކުރީކޮޅާ ހިސާބަށް އެކަން ދެމިގެން ދިޔައެވެ.

ޖަޔަންޓް ސައުތު އެމެރިކަން ރިވަރ ޓަރޓަލްގެ ނަން ދީފައި ވާ މި ވެލައަކީ، ލެޓިން އެމެރިކާ ސަރަޙައްދުގައި ދިރިއުޅޭ ފްރެޝް ވޯޓަރ ޓަރޓަން ނުވަތަ ސާފު ފެނުގައި ދިރިއުޅޭ ވެލާތަކުގެ ތެރެއިން އެންމެ ބޮޑު ބާވަތުގެ ވެލައެވެ. މި ބާވަތުގެ ވެލާ، 1.07 މީޓަރަށް ބޮޑު ވާއިރު، ބަރުދަންވެސް 90 ކިލޯގްރާމަށް އަރައެވެ.

ވެލައަކީ ޤުދުރަތީ ދިރުންތަކުގެ ބެލަންސް ދެމެހެއްޓުމުގައި މުހިންމު ދައުރެއް އަދާ ކުރާ ބައިވެރިއެކެވެ. ވަކިން ހާއްސަކޮށް، އެއްތަނުން އަނެއް ތަނަށް އޮށްތައް އުފުލާ، ކޯރުތަކުގެ ހުރިހާ ހިސާބެއްގައި ގަސްގަހާގެހި ތިޔާގި ކުރުމުގައި މި ވެލާތަކުން އަދާ ކުރާ ދައުރު ބޮޑެވެ.

ޖަޔަންޓް ސައުތު އެމެރިކަން ރިވަރ ޓަރޓަލްގެ އާބާދީ ހިމާޔަތް ކުރުމަށް، ޑަބްލިއުސީއެސްއިން ދަނީ ބްރެޒީލްއާއި ބޮލީވިއާއާ ގުޅިގެން މަސައްކަތްތަކެއް ކުރަމުންނެވެ. ސަބަބެއް ނެތިއެއް ނޫނެވެ. މީގެ ކުރިން، މި ބާވަތުގެ އެތައް މިލިއަން ވެލައެއް އުޅުނު ކަމުގައި ވީ ނަމަވެސް، އެ ޢަދަދު މިހާރު ވަނީ އިންތިހާއަށް ދަށްވެފައެވެ. ޖަޔަންޓް ސައުތު އެމެރިކަން ރިވަރ ޓަރޓަލްގެ އާބާދީ ދަށްވާން ދިމާވި ސަބަބުތަކުގެ ތެރޭގައި، ތެލާއި މަހުގެ އިތުރުން ވިޔަފާރީގެ ބޭނުމަށް މިފަދަ ވެލާތައް ހިފާ، މެރުން ހިމެނެއެވެ.

ޑަބްލިއުސީއެސްއަށް އެއްބާރުލުން ދޭ ފަރާތްތަކުން ދަނީ، ވެލާ ބިހަށް ފާރަލާ ފަރާތްތަކުގެ ކިބައިން އެ ބިސްތައް ސަލާމަތް ކުރުމަށް މަސައްކަތް ކުރަމުންނެވެ. އަދި ބޯހިމަނާ އުސޫލުން، ބިސް އަޅަން އަރާ ވެލާތަކުގެ ތަފާސް ހިސާބުތައް ބަލަހައްޓައެވެ. އެއީ މި ބާވަތުގެ ވެލާ ދިރުވާ އާލާ ކުރުމުގެ މަސައްކަތަށް ލުއިފަސޭހަ ކަން ހޯދުމަށް ކުރާ ކަމެކެވެ.