މެސީ ހޯދުމުގެ ޝައުޤުވެރިކަން ސައުދީގެ ދެ ކުލަބަކުން ގެންގުޅޭ

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ އާޖެންޓީނާގެ ކެޕްޓަން ލިއޮނަލް މެސީ ހޯދުމުގެ ޝައުޤުވެރިކަން ސައުދީ އަރަބިޔާގެ ދެ ކުލަބަކުން ގެންގުޅޭ ކަމަށް މީޑިއާ ރިޕޯޓުތައް ބުނެފި އެވެ.

ރިޕޯޓުތައް ބުނާ ގޮތުން މެސީ ހޯދުމުގެ ޝައުޤުވެރިކަން ސައުދީގެ އަލް-ޙިލާލް އިން ގެންގުޅެމުން ދަނިކޮށް، އަލް-އިއްތިޙާދު ވެސް ވަނީ އެ ޝައުޤުވެރިކަން ފާޅުކޮށްފައިވާ ކަމަށެވެ. އެގޮތުން އަލް-ޙިލާލް އިން މެސީ އަށް 245 މިލިއަން ޕައުންޑުގެ މުސާރައެއް ހުށަހެޅުމުގެ ވާހަކަތައް އަންނަނީ ދެކެވެމުން ކަމަށް ރިޕޯޓުތައް ބުނެ އެވެ. ނަމަވެސް އޭގެ ފަހުން އަލް-އިއްތިޙާދުން ވެސް އެ މަސައްކަތް ކުރަމުން އަންނަ ކަމަށާއި، އެ ކުލަބުން އޮތީ މެސީ ހޯދުމުގެ ރޭހަށް ވަންނަން ތައްޔާރަށް ކަމަށް ވެސް ރިޕޯޓުތައް ބުނެ އެވެ. ދެ ކުލަބުން ވެސް މެސީ އަށް ގާތް ގަނޑަކަށް ސީޒަނަކު ޖުމުލަ 306 މިލިއަން ޕައުންޑު ލިބޭ މުސާރައެއް ހުށަހަޅަން ތައްޔާރުވަމުން އަންނަ ކަމަށް ވެސް ރިޕޯޓުތައް ބުނެ އެވެ.

ނަމަވެސް ރިޕޯޓުތަކުގައިވާ އެ ދެ ކުލަބަށް މެސީ ހޯދޭނީ މި ސީޒަން ނިމުމުންނެވެ. ސަބަބަކީ ކުލަބު ހިންގުމުގައި ހުރި މައްސަލަތަކެއްގެ ސަބަބުން ފީފާ އިން ފިޔަވަޅު އަޅާފައިވުމުން ކަމަށް ވެސް ރިޕޯޓުތައް ބުނެ އެވެ. މީގެ އިތުރުން މި ސީޒަންގެ ނިޔަލަށް މެސީ ޕީއެސްޖީއާއެކު ހަދާފައިވާ އެއްބަސްވުން ހަމަވި ނަމަވެސް، އިތުރު އެއް އަހަރަށް އެ އެއްބަސްވުން އައު ކުރުން ގާތް ކަމަށް ރިޕޯޓުތައް ބުނެ އެވެ. އެކަމުގެ މަޝްވަރާތައް ޕީއެސްޖީ އާއި މެސީއާ ދެމެދު ކުރެވެމުންދާ ކަމަށް އެ ކުލަބުން ވެސް ވަނީ ޔަގީންކޮށްދީފަ އެވެ. މެސީގެ އިތުރުން ސައުދީ ލީގުގެ ޓީމުތަކުން ވަނީ ސްޕެއިންގެ ރެއާލް މެޑްރިޑަށް ކުޅެމުން އަންނަ ލޫކާ މޮޑްރިޗާއި، އިޓާލިއަން ލީގުގެ ޔުވެންޓަސް އަށް ކުޅެމުން އަންނަ އެންހެލް ޑި މާރިއާ އާއި ފްރާންސްގެ ޕީއެސްޖީ އަށް ކުޅެމުން އަންނަ ސާޖިއޯ ރާމޯސް ހޯދުމުގެ މަސައްކަތް ކުރަމުން ކަމަށް ވެސް ރިޕޯޓުތައް ބުނެ އެވެ.

މެސީ ހޯދުމުގެ މަސައްކަތް އަލް-ޙިލާލް އާއި އަލް-އިއްތިޙާދުން ކުރަމުން އަންނަނީ އެ ލީގުގައި ކުޅެމުން އަންނަ އަލް-ނަޞްރުން ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ހޯދުމާ ގުޅިގެންނެވެ. އަލް-ނަޞްރުން ރޮނާލްޑޯ ހޯދީ ބޮޑު އަގަކަށެވެ. ރިޕޯޓްތައް ބުނާ ގޮތުން އެކުލަބުން ވަނީ ރޮނާލްޑޯ އަށް މުސާރައިގެ ގޮތުގައި 200 މިލިއަން ޑޮލަރަށް ވުރެ ބޮޑު އަގެއް ދިނުމަށް އެއްބަސްވެފަ އެވެ.