ޔުވެންޓަސް ބަލިކޮށް ނަޕޯލީ އަށް 10 ޕޮއިންޓުގެ ލީޑެއް

އިޓާލިއަން ލީގުގައި ޔުވެންޓަސްއާ ދެކޮޅަށް ކުޅުނު މެޗު ކާމިޔާބުކޮށް، ނަޕޯލީން ލީގު ތާވަލްގެ އެއް ވަނައިގައި 10 ޕޮއިންޓުގެ ލީޑެއް ނަގައިފި އެވެ.

ނަޕޯލީގެ އަމިއްލަ ދަނޑުގައި އެ ޓީމުން ކުޅުނު މެޗު ކާމިޔާބުކުރީ 5-1 އިންނެވެ. މެޗުގެ 14 ވަނަ މިނެޓުގައި ނަޕޯލީ އަށް ލީޑު ނަގައިދިނީ  ވިކްޓާ އޮސީމެން އެވެ. އެއީ ރީ ބައުންސަށް ނިކުތް ބޯޅައެއް ބޮލުން ގޯލަށް ފޮނުވާލައިގެންނެވެ. އޭގެ ފަހުން މެޗުގެ 39 ވަނަ މިނެޓުގައި ނަޕޯލީ އަށް ލީޑު ފުޅާކޮށްދިނީ ކްރަވަޝްކޭލިއާ އެވެ. އެއީ ފުރަތަމަ ލަނޑު ޖެހި އޮސީމެންގެ އެހީތެރިކަމާއެކު އޭނާ ޖެހި ލަނޑެކެވެ. ނަމަވެސް އޭގެ ތިން މިނެޓު ފަހުން ޔުވެންޓަސްގެ އެންހެލް ޑި މާރިއާ ވަނީ ލަނޑެއް ޖަހައި، އެ ޓީމަށް އުންމީދެއް ހޯދައިދީފަ އެވެ.

ދެ ވަނަ ހާފަށް ނިކުމެ ނަޕޯލީން ވަނީ ތިން ލަނޑު ޖަހައި، އެ ޓީމުގެ ފެންވަރު ދައްކާލާފަ އެވެ. ދެ ވަނަ ހާފު ފަށައިގެން 55 ވަނަ މިނެޓުގައި ނަޕޯލީގެ ތިން ވަނަ ލަނޑު ޖެހީ، އާމިރް ރަހްމާނީ އެވެ. އޭގެ 10 މިނެޓު ފަހުން އޮސީމެން ވަނީ ނަޕޯލީގެ ހަތަރު ވަނަ ލަނޑު ޖަހައިފަ އެވެ. ނަޕޯލީގެ ފަހު ލަނޑު 72 ވަނަ މިނެޓުގައި ޖެހީ އެލްޔިފް އެލްމާސް އެވެ.

މި ސީޒަންގެ އިޓާލިއަން ލީގުގައި ނަޕޯލީން މޮޅު ކުޅުމެއް ދައްކަމުން އަންނައިރު، އެ ޓީމު ބަލިވެފައިވަނީ އެންމެ މެޗަކުންނެވެ. ލީގުގައި ކުޅުނު 18 މެޗުން 47 ޕޮއިންޓާއެކު ނަޕޯލީ އޮތީ އެއް ވަނައިގަ އެވެ. ދެ ވަނައިގައި އެންމެ ފަހުގެ ޗެމްޕިއަން އޭސީ މިލާން އޮތީ 17 މެޗުން 37 ޕޮއިންޓާއެކު އެވެ. ނަޕޯލީ އަތުން ބަލިވި ޔުވެންޓަސް އޮތީ 18 މެޗުން 34 ޕޮއިންޓާއެކު ތިން ވަނައިގަ އެވެ.