ވިޔަފާރިވެރިންނަށް މިހާރަށްވުރެ ލުއި ފަސޭހަ ގޮތްތައް ހޯދައިދިނުމަށް މަސައްކަތްކޮށްދިނުމަށް އެދިވަޑައިގެންނެވި
ބީއެމްއެލްގެ 40 ވަނަ އަހަރީދުވަހުގެ ހަފްލާގައި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވާހަކަފުޅު ދައްކަވަނީ
ވިޔަފާރިވެރިންނާއި ޢާންމު ރައްޔިތުން އެމީހުން ބުރަ މަސައްކަތުން ހޯދާ ފައިސާ ރައްކާކުރަން ބޭންކާ ޙަވާލުކުރަނީ، ބޭންކާމެދު ވަރަށް ބޮޑު އިތުބާރެއް ކުރާތީކަމަށާއި އެފައިސާ އަމާނާތްތެރިކަމާއެކު ރައްކާތެރިކޮށް ބެލެހެއްޓުމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އެދިވަޑައިގެންފިއެވެ.
ބޭންކު އޮފް މޯލްޑިވްސް (ބީއެމްއެލް)ގެ 40 ވަނަ އަހަރީ ދުވަސް ފާހަގަކުރުމަށް ބޭއްވި ހަފްލާގައި ވާހަކަފުޅު ދައްކަވަމުން ރައީސް ވިދާޅުވީ އެފައިސާ އަމާނާތްތެރިކަމާއި ފަރުވާތެރިކަމާއެކު ރައްކާތެރިކޮށް ބެލެހެއްޓުމަކީ ބޭންކުގެ އެންމެ އިސް ޒިންމާކަމަށެވެ.
މީގެއިތުރުން ރައީސް ވަނީ ބީއެމްއެލްއަށް 40 އަހަރު ފުރިގެންދާއިރު ވިޔަފާރިވެރިންނަށް މިހާރަށްވުރެ ލުއި ފަސޭހަ ގޮތްތައް ހޯދައިދިނުމަށް މަސައްކަތްކޮށްދިނުމަށް އެދިވަޑައިގަންނަވާފައެވެ.
ރައީސް ވިދާޅުވީ ބީއެމްއެލް އަކީ ދިވެހިންގެ ވަރަށް ފޮނި އުންމީދުތަކަކާ ގުޅިފައިވާ ބޭންކެއްކަމަށެވެ. މިއީ ދިވެހިންގެ ބޭންކު ކަމަށާއި އެހެންކަމުން، ބޭންކުގެ އެންމެ އިސް ޒިންމާއަކަށް ވާންޖެހޭނީ، ރައްޔިތުންގެ ހިތުގައި ބޭންކާމެދު އިތުބާރާއި ޔަޤީންކަން އުފައްދައި ދެމެހެއްޓުން ކަމަށް ރައީސް ވިދާޅުވިއެވެ.
ބީއެމްއެލް ހުޅުވީ 1982 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހުއެވެ.
