މިއަހަރު ނިމުމުގެ ކުރިން މުޅިރާއްޖޭގައި އޭޓީއެމް އަދި ބޭންކިންގ ގެ ޚިދްމަތް ދިނުމުގެ މަޝްރޫޢު ވަރަށް ބާރު ސްޕީޑްގައި ކުރިއަށްދާއިރު، ކުރިއަށްއޮތް ތަނުގައި މާލެ ހުޅުމާލޭގައި މިފަދަ ޚިދްމަތެއް އިފްތިތާޙްކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަށް ދަޢުވަތު ލިބިވަޑައިގެންފިނަމަ އެމަނިކުފާނު ވަޑައިގަންނަވާނެ ކަމަށް ސަރުކާރުގެ ތަރުޖަމާނު، ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ އޭޓީއެމްގެ ޚިދުމަތްތައް ތަޢާރަފްކުރެއްވުމަށް ރައީސް ޑރ. މުހައްމަދު މުއިއްޒު ބައިވެރި ވެވަޑައިގަންނަވަމުން ގެންދަވާތީ މާލެ ސަރަހަހައްދުގައި ބަހައްޓާ އޭޓީއެމްތައް ހުޅުވައިދެއްވުމަށް އެމަނިކުފާނަށް ދައުވަތު ލިބިވަޑައި ނުގަންނަވަނީތޯ ރާއްޖެއެމްވީން ކުރި ސުވާލަކަށް ޖަވާބު ދެއްވަމުންނެއެވެ.

ހީނާ ވިދާޅުވީ މި ޚިދްމަތްތައް ރައީސުލްޖުމްހޫރިއްޔާ އަދި ބައެއް ފަހަރު ވަޒީރުން ވެސް އިފްތިތާޙްކޮށްދެއްވާފައިވާ ކަމަށާއި މިހާރު ކުރިއަށްދާ މަޝްރޫޢު ފެށުނު ފަހުން މާލެ އަދި ހުޅުމާލޭގައި މިފަދަ ޚިދްމަތެއް އިފްތިތާޙް ކޮށްފައި ނުވާ ކަމަށެވެ. އަދި ކުރިއަށްއޮތް ތަނުގައި މާލެ ހުޅުމާލޭގައި މިފަދަ ޚިދްމަތެއް އިފްތިތާޙްކުރެއްވުމަށް ރައީސުލްޖުމްހޫރިއްޔާއަށް ދަޢުވަތު ލިބިވަޑައިގެންފިނަމަ އެމަނިކުފާނު ވަޑައިގަންނަވާނެ ކަމަށްވެސް ހީނާ ވިދާޅުވި އެވެ.

މުޅި ރާއްޖޭގައި ބޭންކިންގެ ނިޒާމް ހަރުދަނާކޮށް ރާއްޖޭގެ ކޮންމެ ރަށެއްގައި އޭޓީއެމް ބެހެއްޓުމުގެ މަސައްކަތް ކުރަމުންދާއިރު، މިއިން ކޮންމެ ރަށެއްގައި ބަހައްޓާ އޭޓީއެމް ޙިދުމަތް ފައްޓަވައި ދެއްވުމުގައި ރައީސް މުއިއްޒު ބައިވެރި ވަޑައިގަންނަވައެވެ.

މިމަޝްރޫއުގެ މަސައްކަތް 2024 ވަނަ އަހަރުގެ ނޮވެމްބަރު މަހުގައި ފެއްޓިގެން ދިޔައިރުވެސް ރާއްޖޭގެ 90 ރަށުގައި 150 އޭޓީއެމްގެ ޚިދުމަތް އަންނަނީ ދެމުންނެއެވެ. ނަމަވެސް މިޚިދުމަތް ދިނުމަށް މީގެ ކުރިން ބޮޑެތި ރަސްމިއްޔާތުތައް ބާއްވާ ހަރަދުތަކެއް ކޮށްފައެއް ނުވެއެވެ.

ބީއެމްއެލްއިން ބުނީ މިއަހަރު ނިމޭއިރު، އޭޓީއެމް ތަކުގެ އަދަދު 250 އަށްވުރެ ގިނަ ވާނެ ކަމަށެވެ.