ޗައިނާގެ ކަންބޮޑުވުންތަކާއެކުވެސް އެމެރިކާއާއި ޖަޕާނުން ސަލާމަތީގުޅުން ވަރުގަދަކޮށްފި

ޗައިނާއާއި އެގައުމުގެ އަވައްޓެރި ގައުމުތަކާ އޮތް ގުޅުން މިވަނީ ވަރަށް ނާޒުކު ފައްތަރެއްގައެވެ. މިފަދަ ވުގުތެއްގައި އަވައްޓެރި ގައުމުތަކާއެކު އެމެރިކާއިން ގުޅުންތައް ވަރުގަދަކުރަމުންދާތީ އެކަމުގެ ކަންބޮޑުވުން ޗައިނާއިން މިދަނީ ފާޅުކުރަމުންނެވެ. ޗައިނާގެ ކަންބޮޑުވުންތަކާއެކުވެސް އެމެރިކާއާއި ޖަޕާނުން މިވަނީ ދެގައުމުގެ ދެމެދުއޮތް ސަލާމަތީ ގުޅުންތައް އިތުރަށް ވަރުގަދަކުރަން ނިންމައި އެކަން އިއުލާނުވެސް ކޮށްފައެވެ.

ޖެނުއަރީ 11 ވަނަ ދުވަހު އެމެރިކާ އާއި ޖަޕާނުން ވަނީ ދެގައުމުގެ ދެމެދު އޮތް ސަލާމަތީ ގުޅުން އިތުރަށް ވަރުގަދަކުރަން ނިންމާފައިވާކަން އިއުލާނުކޮށްފައެވެ. އަދި އެމެރިކާއިން ވަނީ ޖަޕާނުން އެގައުމުގެ ސަލާމަތީ ކަންކަމަށާއި އަސްކަރިއްޔާއަށް ކުރާ ޚަރަދު 2027 ވަނަ އަހަރާ ހަމައަށް ދެގުނަ އިތުރުކުރަން ނިންމާފައިވާތީ އެކަމަށް ތައުރީފުވެސްކޮށްފައެވެ.

ޖަޕާންގެ ވިސްނުމަކީ އެގައުމުން ސަލާމަތީ ކަންކަމާ ކުރާ ޚަރަދު ފަސް އަހަރުގެ ތެރޭގައި ދެގުނަ އިތުރުކޮށް، އެގައުމުގެ ޖީޑީޕީގެ ނިސްބަތުން ދެ އިންސައްތައަށް މިޚަރަދު އިތުރުކުރުމުވެ. އަދި މިމުއްދަތުގެ ތެރޭގައި ކަނޑާއި އެއްގަމަށް ހަމާލާދެވޭ، މަދުވެގެން 600 މޭލަށް ދަތުރުކުރާ މިސައިލް ހޯދުމަކީ ވެސް އެގައުމުގެ އަމާޒެއް ކަމަށް ރިޕޯޓުތައް ބުނެއެވެ.

ޖެނުއަރީ 11 ވަނަ ދުވަހު އެމެރިކާ އަދި ޖަޕާންގެ ފޮރިން މިނިސްޓަރުން ވަނީ ބައްދަލުކުރައްވާ، ހަތަރު ބޭފުޅުން ވަނީ ގުޅިފައިވާ ބަޔާނެއްވެސް ދެއްވާފައެވެ. މިބަޔާނުގައި އެމެރިކާއިން ވަނީ އެގައުމާ ޖަޕާނާ ދެމެދު ގާއިމުކުރެވޭ އެއްބަސްވުންތަކަކީ ސްޓްރެޓެޖިކް ގޮތުން ގައުމުތަކުގެ މެދުގައި އޮންނަ ވާދަވެރިކަން އިތުރުވަމުންދާ ވަގުތު، ގާއިމުކުރެވިގެންދާ ޒަމާނީ ގުޅުމެއްކަމަށް ބުނެފައެވެ.

ނޫސްވެރިންނާ ބައްދަލުކުރައްވާ ވާހަކަދައްކަވަމުން އެމެރިކާގެ ސެކްރެޓަރީ އޮފް ސްޓޭޓް އެންތަނީ ބްލިންކެން ވަނީ އެގައުމާ އެގަމުގެ އެކުވެރި ހުރިހާ ގައުމުތަކުންވެސް، އެގައުމުތަކަށް ސްޓްރެޓެޖީގެ ގޮތުން އޮތް އެންމެ ބޮޑު ގޮންޖެހުމަކީ ޕީޕަލްސް ރިޕަބްލިކޮ އޮފް ޗައިނާކަން ގަބޫލުކުރާކަމަށް ވިދާޅުވެފައެވެ.

މީގެ އިތުރުން، މިބައްދަލުވުމުގައި އެމެރިކާގެ ސެކްރެޓަރީ އޮފް ޑިފެންސް ލޮއިޑް އޮސްޓިން ވަނީ ޖަޕާންގައި މެރިން ލިޓޮރަލް ރެޖިމެންޓެއް ފަށަން ނިންމާފައިވާކަން އިއުލާނުކުރައްވާފައެވެ. މީގެ ސަބަބުން ޖަޕާނުގެ ކަނޑުގެ އަސްކަރިއްޔާއަށް ގިނަ ފައިދާތަކެއް ކުރާނެ ކަމަށް ރިޕޯޓުތަކުން ފާހަގަކުރާއިރު، މިއެއްބަސްވުމުގެ ސަބަބުން އެގައުމަށް އެންޓި-މިސައިލް ޝިޕްވެސް ލިބިގެންދާނެއެވެ.

ޖަޕާންގައި ކުރިއަށްގެންދިއުމަށް އެއްބަސްވެފައިވާ މެރިން ލިޓޮރަލް ރެޖިމެންޓްގެ ދަށުން، އެމެރިކާއިން އެގައުމަށް ފޮނުވާ އެންޓި-ޝިޕް މިސައިލްތަކާއެކު، އެމެރިކާގެ 2،000 ކަނޑުގެ ސިފައިން ޖަޕާނަށް ދާނެކަމަށް އެމެރިކާގެ އޮފިޝަލަކު ވަނީ އޮރިޓަރސްއަށް މައުލޫމާތުދީފައެވެ.

މީގެ އިތުރުން، އެމެރިކާގެ 300 އަސްކަރީ ސިފައިންނާއި 13 އުޅަނދުވެސް މިއަހަރުގެ ބަހާރު މޫސުމުގައި ޖަޕާނަށް ފޮނުވާނެ ކަމަށް އޮފިޝަލް ވިދާޅުވިއެވެ.

މިހާރިވެސް ޖަޕާންގައި އެމެރިކާގެ 18،000 ކަނޑުގެ ސިފައިން ދަނީ ހަރަކާތްތެރިވަމުންނެވެ. މިއީ އެމެެރިކާއިން ބޭރުގައި އެގައުމުގެ ކަނޑުގެ އަސްކަރިއްޔާގެ ސިފައިން މިވަގުތު އެންމެ ގިނައަށް ތިބި ސަރަހައްދެވެ.

ރިޕޯޓުތައް ބުނާގޮތުން ޖަޕާންގައި މިވަގުތު ހަރަކާތްތެރިވާ އެމެރިކާ ސިފައިންގެ އަދަދު 54،000ށް އަރައެވެ.

ދެގައުމުގެ ދެމެދުގައި ގާއިމުކޮށްފައިވާ ސަލާމަތީ އެއްބަސްވުންތައް އިތުރަށް ވަރުގަދަކުރަން ނިންމާފައިވާކަމަށް ބްލިންކެން ވަނީ ވިދާޅުވެފައެވެ.

ދުނިޔޭގެ މިހާރުގެ ހާލަތައް ބަލައި، ޖަޕާނުގައި ހަރަކާތްތެރިވާ އެމެރިކާ އަސްކަރިއްޔާގެ ސިފައިންނާ، އުޅަނދާ އަދި ސާމާނު އިތުރުކަން ޖެހޭކަމަށް ދެގައުމުންވެސް ގަބޫލުކުރާކަމަށް ޖަޕާން އަދި އެމެރިކާއިން ވަނީ ބުނެފައެވެ.

ޖެނުއަރީ 12 ވަނަ ދުވަހު، އެމެރިކާގެ ޑިފެންސް މިނިސްޓަރު ލޮއިޑް އޮސްޓިން އާއި ޖަޕާންގެ ޑިފެންސް މިނިސްޓަރު ޔަސުކަޒު ހަމަޑަ ވަނީ ޕެންޓަގަންގައި ބައްދަލުކުރައްވާފައެވެ. އަދި އެމެރިކާގެ ރައީސް ޖޯ ބައިޑަން އާއި ޖަޕާންގެ ބޮޑުވަޒީރު ފުމިއޯ ކިޝިޑާ ވަނީ ޖެނުއަރީ 13 ވަނަ ދުވަހު ބައްދަލުކުރައްވާފައެވެ.

ދެގައުމުގެ ވެރިންގެ ބައްދަލުވުމުގައި ދެގައުމުގެ ދެމެދު އޮތް ގުޅުން އިތުރަށް ހަރުދަނާކުރުމުގެ މަޝްވަރާތައް ވަނީ ކުރައްވާފައެވެ. އަދި ދެގައުމުގެ ދެމެދު ގާއިމުކޮށްފައިވާ ސަލާމަތީގުޅުން އިތުރަށް ހަރުދަނާކުރުމުގެ މަޝްވަރާތަކުގެ އިތުރުން ދުނިޔޭގެ އިގުތިސާދީ ހާލަޔާ ގުޅޭ މަޝްވަރާތައް ވަނީ ކުރައްވާފައެވެ.

މީގެ އިތުރުން، ބައިޑަން އަދި ކިޝީޑާ ވަނީ ޗައިނާއިން އެކްސްޕޯޓްކުރާ ސެމީކޮންޑަކްޓަރާ ގުޅޭގޮތުންވެސް މަޝްވަރާތައް ކުރައްވާފައެވެ.

ރިޕޯޓުތައް ބުނާގޮތުން، ޖަޕާންއަށް އެމެރިކާގެ ސިފައިން ބޭލުމަކީ، އޭޝިއާގެ އެހެން ގައުމުތަކުގައި އެމެރިކާގެ ސިފައިން ހަރަކާތްތެރިކުރުމަށް އެޅޭ ފިޔަވަޅަކަށް ވުން އެކަށީގެންވެއެވެ. އަދި މިއީ ޗައިނާއިން އޭޝިއާގެ ގައުމުތަކަށް ހަމަލާދިނުމުގެ ވިސްނުން ގެންގުޅޭނަމަ، އެފަދަ ކަމެއް ކުރަން ފަސްޖެހޭނެ ސަބަބަކަށްވެސް ވެގެންދާނެ ކަމެއްކަމަށް ރިޕޯޓުތައް ފާހަގަކުރެއެވެ.

މިފަދަ އެއްބަސްވުމަކަށް އައިސްފައިވާކަން ޖަޕާން އަދި އެމެރިކާއިން އިއުލާނުކޮށްފައި މިވަނީ އަހަރު ދުވަހުގެ މަޝްވަރާތަކަށް ފަހުއެވެ. އަދި ދެވަނަ ބޮޑު ހަނގުރާމައަށް ފަހު ފުރަތަމަ ފަހަރަށް ޖަޕާންގެ އަސްކަރިއްޔާއަށް ކުރާ ޚަރަދު ދެގުނަކޮށ،ް އަސްކަރިއްޔާ ވަރުގަދަކުރުމުގެ ވިސްނުން ގެންގުޅޭކަމަށް 2022 ވަނަ އަހަރުގެ ޑިސެމްބަރު މަހު ޖަޕާނުން އިއުލާނުކުރުންވެސް އެއީ ފާހަގަކުރެވޭ ކަމެކެވެ.

ޖަޕާނުން އެގައުމުގެ އަސްކަރިއްޔާ ވަރުގަދަކުރުމުގެ މަސައްކަތް މިގޮތަށް ކުރަމުން މިދަނީ ދެ ވަނަ ބޮޑު ހަނގުރާމައަށްފަހު، 70 އަހަރު މަޑުމަޑުން އޮންނަ ގައުމެއްގެ ގޮތުގައި އޮތުމަށްފަހުއެވެ. އެގައުމުން ފާހަގާކުރާ ގޮތުގައި މިއީ ޗައިނާގެ އަމަލުތަކުގެ ސަބަބުން ރައްކާތެރިވެ، ކޮންމެ ކަމަކަށްވެސް ތައްޔާރަށް އޮތުމުގެ ގޮތުން އެގައުމުން ކުރާ މަސައްކަތެވެ.

ޗައިނާއިން ޓައިވާން ސަރަހައްދުގައި ހިންގާ އަސްކަރީ ހަރަކާތްތައް އިތުރުކުރުމާއެކު އެކަމުގެ ކަންބޮޑުވުން ޖަޕާނުން ދަނީ ފާޅުކުރަމުންނެވެ. އެމެރިކާއިންވެސް މިކަމުގެ ކަންބޮޑުވުން ފާޅުކޮށްފައިވާއިރު، އެމެރިކާގެ ޑިފެންސް މިނިސްޓަރު އޮސްޓިން ވަނީ ޗައިނާގެ އަސްކަރީ ހަރަކާތްތައް އެސަރަހައްދުގައި އިތުރުވެފައިވީނަމަވެސް ޗައިނާއިން މިވަގުތުން މިވަގުތަށް ޓައިވާނަށް އަރައި އެގައުމު ހިފަން މަސައްކަތްކޮށްފާނެ ކަމަށް ނުބެލެވޭކަމަށް ވިދާޅުވެފައެވެ.