ރަސްމީ ފާލަމާ ދިމާއިން ފަޅުތެރެއަށް އެޅިފައިވާ ކަޅު ތެޔޮ އެޅުނު ސަބަބު ދެނެގަތުމަށްޓަކައި ސާމްޕަލް ނަގައި، ޓެސްޓުކުރަން ފަށައިފިއެވެ.

އިއްޒުއްދީން ފާލަން ނުވަތަ މާލޭ ރަސްމީ ފާލަމާ 3 ނަންބަރު ޖެޓީއާ ދެމެދު ގިނަ އަދަދެއްގެ ކަޅުތެޔޮ އެޅިފައި ހުރިކަމުގެ މައުލޫމާތު މެރިޓައިމް ރެސްކިޔު ކޯޑިނޭޝަން ސެންޓަރ (އެމް.އާރް.ސީ.ސީ)އަށް ލިބުމާގުޅިގެން، އެ ސަރަހައްދު ސާފުކުރުމުގެ މަސައްކަތް ކަމާބެހޭ ފަރާތްތަކުން ވަނީ މިމަހުގެ ފުރަތަމަ ދުވަހުން ފެށިގެން ތިން ދުވަސް ވަންދެން ކުރިއަށްގެންގޮސްފައެވެ. އެ ސަރަހައްދަށް ތެޔޮ އެޅުނު ސަބަބު މިހާތަނަށް އައިއިރު ދެނެގަނެވިފައެއް ނުވެއެވެ.

އެ ސަރަހައްދަށް ތެޔޮ އެޅުނު ގޮތް ހޯދުމަށް މިހާރު މަސައްކަތްކުރަމުން ދާކަމަށް އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)ގެ ޑިރެކްޓަރ ޖެނެރަލް އިބްރާހީމް ނައީމް ވަނީ ވިދާޅުވެފައެވެ. އެގޮތުން ކަޅޮތެޔޮ އެޅުނު ގޮތުގެ އޮއިލް ފިންގަރ ޕްރިންޓިންގ، ނުވަތަ ތެޔޮ އެޅުނު ގޮތް ދެނެގަތުމަށްޓަކައި ސާމްޕަލް ނަގައި ތަހުލީލުކުރުމުގެ މަސައްކަތް ފަށާފައިވާ ކަމަށް އީޕީއޭއިން ބުނެއެވެ. ތެޔޮ އެޅިފައި ހުރި ސަރަހައްދުގެ އިތުރުން، އެ ސަރަހައްދު ބޭރުގައި އަޅާފައިވާ ބޯޓުތަކުންވެސް ސާމްޕަލް ވަނީ ނަގާފައެވެ. މިއީ މިފަދަ ގޮތަކަށް ރާއްޖޭގައި މިގޮތަށް ތެލުގެ ސާމްޕަލް ނަގައިގެން ޓެސްޓްކުރާ ފުރަތަމަ ފަހަރެވެ. އެހެންކަމުން ރާއްޖެއިން އެ ސާމްޕަލް ޓެސްޓް ނުކުރެވިއްޖެ ހާލަތެއްގައި ރާއްޖެއިން ބޭރަށް އެ ސާމްޕަލްތައް ފޮނުވައިގެންވެސް އެކަން ކުރާނެކަމަށް އީޕީއޭއިން ވަނީ ބުނެފައެވެ.

އެމްއެންޑީއެފުން ބުނިގޮތުގައި، އެ ސަރަހައްދަށް ވަނީ 3000 ލީޓަރުގެ ކަޅުތެޔޮ އެޅިފައެވެ. އެ ސަރަހައްދަށް އެޅުނު ތެޔޮ ސާފުކުރުމުގެ މަސައްކަތުގައި ކޯސްޓްގާޑްގެ ޑައިވަރުންނާއި އޮއިލް ޕޮލިއުޝަން ރެސްޕޮންސް ޓީމަށް އެހީތެރިކަން ފޯރުކޮށްދިނުމަށް އެމްއެންޑީއެފް މާލޭ އޭރިއާގެ ކޯސްޓްގާޑް ސްކޮޑްރަނާއި، މާލޭ އޭރިއާގެ މެރީންސްއާއި، މެރިން ޕޮލިސްގެ އިތުރުން، މާލޭ ސިޓީ ކައުންސިލުން ވަނީ ހަރަކާތްތެރިވެފައެވެ.