ފައިނަލްގައި ކުޅެން ނުޖެހޭ ފަސް ކުޅުންތެރިޔަކު ކުޅުނު ކަމަށް ޑެޝޯމްޕްސް ބުނެފި
އޭނާ ބުނީ މެޗުގެ ފުރަތަމަ 11 ގައި ތިބި ކުޅުންތެރިންގެ ތެރެއިން ފަސް ކުޅުންތެރިޔަކީ ވަކި ސަބަބަކާ ހުރެ ކުޅެން އަރުވަން ޖެހުނު ކުޅުންތެރިން ކަމަށް
ފީފާ ވޯލްޑް ކަޕްގެ ފައިނަލް މެޗުގައި ޑެޝޯމްޕްސް
މިދިޔަ އަހަރު އޮތް ފީފާ ވޯލްޑް ކަޕް މުބާރާތުގެ ފައިނަލްގައި ފްރާންސް ޓީމުގައި ކުޅެން ނުޖެހޭ ފަސް ކުޅުންތެރިޔަކު ކުޅުނު ކަމަށް އެ ޓީމުގެ ކޯޗު ޑިޑިއޭ ޑެޝޯމްޕްސް ބުނެފި އެވެ.
ތަށި ދިފާއު ކުރުމަށް ކުޅުނު ފައިނަލް މެޗުގައި ފްރާންސް ބަލިވީ އާޖެންޓީނާ އަތުން ޕެނަލްޓީގައި އެވެ. މިއީ ފައިނަލަށް ފަހު ޑެޝޯމްޕްސް މިފަދަ ވާހަކައެއް ދެއްކި ފުރަތަމަ ފަހަރެވެ. ފްރާންސް އިން ވަނީ އެ ޓީމުގެ ކޯޗުކަމުގެ މަޤާމުގައި ޑެޝޯމްޕްސް ބެހެއްޓުމަށް ވެސް ނިންމައިފަ އެވެ. އެއްބަސްވުން އައުކުރުމާއެކު ޑެޝޯމްޕްސް ދެއްކި މި ވާހަކަ އިން ގިނަ ބަޔަކަށް ވަނީ ހައިރާން ކަމެއް ލިބިފަ އެވެ. ޑެޝޯމްޕްސް ބުނީ ފައިނަލްގައި ފްރާންސް ފެނުނީ އެއްވެސް ޓާސްކެއް ނެތް ގޮތަށް ކަމަށެވެ. އެގޮތުން އެއް ކުޅުންތެރިޔެއްގެ މައްސަލަ އޭނާ ދައްކަން ބޭނުންނުވާ ކަމަށާއި ނަމަވެސް މެޗުގެ ފުރަތަމަ 11 ގައި ތިބި ކުޅުންތެރިންގެ ތެރެއިން ފަސް ކުޅުންތެރިޔަކީ ވަކި ސަބަބަކާ ހުރެ ކުޅެން އަރުވަން ޖެހުނު ކުޅުންތެރިން ކަމަށެވެ. އަދި އެ ކުޅުންތެރިންނަކީ ފައިނަލް މެޗު ކަހަލަ މެޗެއްގައި ކުޅޭ ފެންވަރުގެ ކުޅުންތެރިން ނޫން ކަމަށް ވެސް އޭނާ ބުންޏެވެ.
ޑެޝޯމްޕްސް މިފަދައިން ބުނި ނަމަވެސް، އޭނާ އެއްވެސް ކުޅުންތެރިޔެއްގެ ނަން ހާމަކޮށްފައެއް ނުވެ އެވެ. ޑެޝޯމްޕްސް ބުނީ އޭނާ ކޮންމެހެން މާ ވަރުގަދަ ބަސްތަކެއް ބުނަން ބޭނުންނުވާ ކަމަށާއި، ނަމަވެސް ފައިނަލް މެޗުގައި ފްރާންސް ކުޅުނީ ރަނގަޅު ކުޅުމެއް ނޫން ކަމަށެވެ. އަދި އެކަމުގެ ހެއްކަކީ މެޗުގެ 70 މިނެޓާ ހަމައަށް އާޖެންޓީނާ އިން މެޗު ކޮންޓްރޯލްކޮށްގެން ކުޅުން ކަމަށެވެ. ޑެޝޯމްޕްސް ބުނީ ފްރާންސް ފަހަތުން އަރައި ނަތީޖާ ހަމަހަމަ ކުރި ކަމަށާއި، އެއީ ކުރަން ވެސް ޖެހުނު ކަމެއް ކަމަށެވެ.
މިއަހަރުގެ މުބާރާތުގެ ފައިނަލުން ފްރާންސް ބަލިވުމުން ޑެޝޯމްޕްސް ބުނީ މުސްތަޤުބަލާ މެދު ގޮތެއް ނިންމާނީ ފްރާންސް ފުޓުބޯޅަ ފެޑެރޭޝަންގެ ރައީސާ މަޝްވަރާކުރުމަށްފަހު ކަމަށެވެ. ފްރާންސް އިން މިހާރު ވަނީ 2026 ވަނަ އަހަރުގެ ވޯލްޑް ކަޕާ ހަމައަށް ޑެޝޯމްޕްސްގެ އެއްބަސްވުން އައުކޮށްފަ އެވެ.
