ސްޕެއިންގެ ރެއާލް މެޑްރިޑަށް ކުޅެމުން އަންނަ އޮސްޓްރިއާގެ ޑިފެންޑަރު ޑޭވިޑް އަލަބާ އާއި ފްރާންސްގެ ޑިފެންސިވް މިޑްފީލްޑަރު އައުރެލިން ޗުއަމިނީ އަށް އަނިޔާވެއްޖެ އެވެ.

މިކަން ހާމަކޮށްފައިވަނީ ރެއާލުން ހޯމަ ދުވަހު އެވެ. އެ ކުލަބުން އާންމުކުރި މެޑިކަލް ރިޕޯޓުތަަކުން ބުނަނީ އެ ދެ ކުޅުންތެރިންނަށް ވެސް އަނިޔާވެފައިވާ ކަމަށެވެ. އެގޮތުން ހޯމަ ދުވަހު ކުރިއަށް ގެންދިޔަ ޓެސްޓުތަކުން ފެންނަ ގޮތުގައި ދެ ކުޅުންތެރިންގެ ވެސް ފައިގެ ކުޑަ ކަޅުވާ މަސްގަނޑަށް އަނިޔާވެފައިވާ ކަމަށެވެ. ދެ ކުޅުންތެރިންނަށް ވެސް އަނިޔާވެފައިވަނީ ސްޕެނިޝް ލީގުގައި ރެއާލުން އެންމެ ފަހުން ކުޅުނު މެޗުުގަ އެވެ. ވިލަރެއާލް އަތުން 2-1 އިން ބަލިވި މެޗުގެ 64 ވަނަ މިނެޓުގައި ޗުއަމިނީ ވަނީ ބަދަލުކޮށްފަ އެވެ. ދެ ކުޅުންތެރިންނަށް ލިބުނު އަނިޔާގެ ސަބަބުން ކުޅުމާ ދުރުގައި ތިބެން ޖެހޭނީ ކިހާ މުއްދަތަކަށް ކަމެއް ހާމަކޮށްފައެއް ނުވެ އެވެ.

އަލަބާ އާއި ޗުއަމިނީ އަކީ ވެސް ރެއާލްގައި މޮޅު ކުޅުމެއް ދައްކަމުން އަންނަ މުހިންމު ދެ ކުޅުންތެރިންނެވެ. އެންމެ އަވަހަށް ރެއާލްގެ މެޗެއް ދެން އޮތީ މި މަހުގެ 12 ވަނަ ދުވަހު އެވެ. ސްޕެނިޝް ސުޕަ ކަޕްގެ ސެމީ ފައިނަލްގައި ވެލެންސިއާއާ ދެކޮޅަށް ކުޅޭ މެޗުގައި މި ދެ ކުޅުންތެރިންނަށް ނުކުޅެވޭނެ ކަމަށް ރިޕޯޓުތައް ބުނެ އެވެ.