ލޭބަރ ކުއާޓާގައި ދިރިއުޅުނު އެންމެން ހަމަ، އެންމެންގެ ހާލުވެސް ރަނގަޅު
ބަނގްލަދޭޝްގެ 165 މީހުންނާއި އިންޑިއާގެ ރައްޔިތެއް އެތަނުގައި ދިރިއުޅޭ
ނީލަން ފިހާރަތައް ހުންނަ ސަރަޙައްދުގައި ހުރި އެކޮމެޑޭޝަން ބްލޮކުގައި ދިރިއުޅޭ މީހުން
ނީލަން ފިހާރައާއި ޖެހިގެން ހުންނަ ލޭބަރ ކުއާޓަރގައި ދިރިއުޅެމުންދިޔަ އެންމެންވެސް ހަމަކަމަށާއި އެއެންމެންގެ ހާލުވެސް ރަނގަޅުކަމަށް މާލެ ސިޓީ ކައުންސިލުން ބުނެފިއެވެ.
އަލިފާނުގެ ހާދިސާ އާއި ގުޅިގެން އެމްއެންޑީއެފުން ބުނީ ނީލަން ފިހާރައާއި ޖެހިގެން ހުންނަ ލޭބަރ ކުއާޓަރގައި ދިރިއުޅެމުންދިޔައީ ރާއްޖެއިން ބޭރުގެ މީހުންނެވެ. އޭގެ ތެރޭގައި ބަނގްލަދޭޝްގެ 165 މީހުންނާއި އިންޑިއާގެ ރައްޔިތެއް އެތަނުގައި ދިރިއުޅެއެވެ. އަދި މިހުރިހާ މީހުންނަކީ މާލެ ސީޓީ ކައުންސިލުގެ ބެލުމުގެ ދަށުން މަސައްކަތް ކުރަމުންއަންނަ މީހުންނެވެ. މިމީހުންގެ އެންމެން ހަމަކަމަށާއި އަދި އެ އެންމެންގެ ހާލުވެސް ރަނގަޅުކަމަށް މާލެ ސިޓީ ކައުންސިލުން މަޢުލޫމާތު ދެއްވާކަމަށެވެ.
ލޭބަރ ކުއާޓަރގައި ދިރިއުޅެމުންދިޔަ ރާއްޖެއިން ބޭރު މީހުންގެ ބޯހިޔާވަހިކަމުގެ ކަންކަން ހަމަޖައްސައިދިނުމުގައި މާލެ ސިޓީ ކައުންސިލާއި ގުޅިގެން ނޭޝަނަލް ޑިޒާސްޓަ މެނޭޖްމަންޓް ސެންޓަރުން އަންނަނީ މަސައްކަތް ކުރަމުންނެވެ.
މީގެއިތުރުން އެމްއެންޑީއެފުން ބުނީ މިހާދިސާ އާއި ގުޅިގެން ނީލަން ފިހާރައިގެ އުތުރުގައި މީހުން ދިރިއުޅުނު ލޭބަރ ކުއާޓަރގައި ރޯވި އަލިފާން ކޮންޓްރޯލްވުމުން، ފަޔަރމަނުން އެތަނަށްވަދެ ބެލި ބެލުމުން އެތަނުން އެއްވެސް މީހަކު ފެނިފައިނުވާކަމަށެވެ.
މި ހާދިސާގެ ރިޕޯޓް އެމްއެންޑީއެފް ފަޔަރ އެންޑް ރެސްކިޔު ސަރވިސްއަށް ހޯމަ ދުވަހުގެ ފަތިހު 05:43 ހާއިރު ލިބުމާއެކު އެފްއާރުއެސްގެ ފަޔަރމަނުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ވަގުތުން ވަނީ ފަށާފައެވެ. މިހާދިސާގައި އެންމެ ފުރަތަމަ އަލިފާން ރޯވެފައި ވަނީ ނީލަން ފިހާރަ ހުރި ސަރަހައްދުގައެވެ. މީގެ އިތުރުން އަލިފާން އިތުރަށް ފެތުރި ނީލަން ފިހާރައިގެ އުތުރުގައި ހުރި މީހުން ދިރިއުޅޭ ލޭބަރކުއާޓަރެއްގައި ވެސް ވަނީ އަލިފާން ރޯވެފައެވެ.
މިހާދިސާގައި ފަޔަރ އެންޑް ރެސްކިޔު ސަރވިސްގެ ފަޔަމަނުންނާއި މޯލްޑިވިސް އެއަރޕޯޓް ކޮމްޕެނީ ލިމިޓެޑްގެ ފަޔަރމަނުން ކުރި މަސައްކަތުން ނީލަން ފިހާރައިގެ އުތުރުގައި އިމާދުއްދީން ސްކޫލާއި ދިމާލުގައި ފެތުރެމުންދިޔަ އަލިފާން ހެނދުނު 07:35 ހާއިރު ވަނީ ކޮންޓްރޯލް ކޮށްފައެވެ. އަދި ނީލަން ފިހާރައިގެ އިރުމަތިން ފެތުރެމުންދިޔަ އަލިފާން ކޮންޓްރޯލްކުރެވިފައި ވަނީ ހެނދުނު 08:30 ހާއިރުއެވެ.
ހާދިސާ ހިނގި ސަރަހައްދަށް ނައިބު ރައީސް ފައިސަލް ނަސީމް އާއި ޑިފެންސް މިނިސްޓަރު މާރިޔާ އަހުމަދު ދީދީ ވަޑައިގެންނެވިއެވެ. އެ ސަރަޙައްދު ބައްލަވާލެއްވުމަށްފަހު ނޫސްވެރިންނާ ވާހަކަ ދައްކަވަމުން ނައިބްރައީސް ވިދާޅުވީ، އެ ސަރަޙައްދުގެ ސަލާމަތާއި ރައްކާތެރިކަން އިތުރަށް ކަށަވަރު ކުރުމުގެ ކަންކަން މިހާރު ކުރިއަށްދާ ކަމަށެވެ.
ސަރުކާރުގެ ވިސްނުމަކީ މީހުން ދިރިއުޅޭ ސަރަޙައްދުން މިފަދަ ޙާދިސާއެއް ހިނގުމަށް މެދުވެރިވެދާނެ ފަދަ ތަންތަން ވީހާވެސް ދުރުކުރުންކަމަށް ނައިބްރައީސް ވިދާޅުވިއެވެ.
އަދި މި ޙާދިސާއާ ގުޅިގެންވެސް އަޅަންޖެހޭ ފިޔަވަޅުތައް ސަރުކާރުން އަޅާނެކަމަށް ނައިބްރައީސް ވިދާޅުވިއެވެ.
ނީލަން ފިހާރަ ސަރަޙައްދުގައި މީގެ ކުރިންވެސް އަލިފާނުގެ ޙާދިސާތައް ހިނގާފައިވާއިރު، މިފަހަރުވެސް އެތަނުގައި އަލިފާން ހިފާ ޒާތުގެ އެކި ކަހަލަ ސާމާނުތައް ހުރިކަމަށް ސިފައިން މައުލޫމާތު ދެއެވެ.
ކެމިކަލް ގުދަނުގެ އަލިފާނުގެ ޙާދިސާއާ ގުޅިގެން ޤަވާއިދުތައް އެކުލަވާލައި، ގުދަންތައް އާންމުން ދިރިއުޅޭ ސަރަޙައްދުން ދުރަށް ގެންދިއުމުގެ މަސައްކަތްތައް ކުރިއަށް ގެންދިޔަ ގޮތަށް، ނީލަން ފިހާރަ ސަރަޙައްދުގެ ކަންކަންވެސް ރެގިއުލޭޓު ކުރެވެން ޖެހޭކަމަށް އެ ސަރަަޙައްދުގައި ހުންނަވައި ރާއްޖެޓީވީއާ ވާހަކަދައްކަވަމުން ޑިފެންްސް މިނިސްޓަރު މަރިޔާ އަހުމަދު ދީދީ ވިދާޅުވިއެވެ.
ނީލަން ފިހާރައިގައި މީގެ ކުރިންވެސް މިފަދަ އަލިފާނުގެ ޙާދިސާތައް ހިނގާފައިވާއިރު، މިއީ އަވަހަށް ޙައްލު އަންނަންޖެހޭ ކަމެއްކަން މިނިސްޓަރ ފާހަގަ ކުރެއްވިއެވެ.
