އިޓާލިއަން ލީގުގައި ސަމްޑޯރިއާއާ ދެކޮޅަށް ކުޅުނު މެޗުން މޮޅުވެ ނަޕޯލީން އެއް ވަނައިގައި ލީޑު ފުޅާކޮށްފި އެވެ.

އާދިއްތަ ދުވަހުގެ ރޭ ސަމްޑޯރިއާގެ ދަނޑުގައި ކުޅުނު މެޗު ނަޕޯލީން ކާމިޔާބުކުރީ 2-0 އިންނެވެ. މެޗު ފަށައިގެން ހަ ވަނަ މިނެޓުގައި ނަޕޯލީ އަށް ވަނީ ޕެނަލްޓީއެއް ލިބިފަ އެވެ. އެއީ ސަމްޑޯރިއާގެ އޭރިޔާ ތެރެއިން އެ ޓީމުގެ ނިކޮލާ މުރޫ ނަޕޯލީގެ އަންދްރޭ ޒަންބޯ އަންގިސާ އަށް ކުރި ފައުލަކަށް ވީއޭއާރު ބެލުމަށްފަހު ރެފްރީ ދިން ޕެނަލްޓީއެކެވެ. ނަޕޯލީގެ ޕެނަލްޓީ މަޓެއޯ ޕޮލިޓާނޯ ފޮނުވާލި ނަމަވެސް، ބޯޅަ އަމާޒުވީ ގޯލުގެ އަރިމަތީ ދަނޑި އަށެވެ. އޭގެ ފަހުން މެޗުގެ 19 ވަނަ މިނެޓުގައި ނަޕޯލީ އަށް ލީޑު ނަގައިދިނީ ވިކްޓާ އޮސީމެން އެވެ. ސަމްޑޯރިއާގެ އޭރިޔާ ބޭރުން މާރިއޯ ރުއީ ހުރަސްކޮށްދިން ބޯޅައެއް އޭރިޔާ ތެރޭގައި ޑިފެންޑަރެއް ކައިރީ ހުރެ އޮސީމެން ވަނީ ފައިން ޖަހައި ގޯލަށް ވައްދާލާފަ އެވެ. ނަޕޯލީގެ ފަހު ލަނޑަކީ ޕެނަލްޓީއެއްގައި އެލްޖިފް އެލްމާސް ޖެހި ލަނޑެކެވެ. އެއީ ސަމްޑޯރިއާ ކުޅުންތެރިޔެއްގެ އަތުގައި އޭރިޔާ ތެރެއިން ބޯޅަ ޖެހުމުން ރެފްރީ ދިން ޕެނަލްޓީއެކެވެ.

މި މޮޅާއެކު ނަޕޯލީން ލީގު ތާވަލްގެ އެއް ވަނައިގައި އޮތީ ކުޅުނު 17 މެޗުން 44 ޕޮއިންޓު ހޯދައިގެންނެވެ. މި ސީޒަންގެ އިޓާލިއަން ލީގުގައި މިހާތަނަށް ނަޕޯލީ ބަލިވެފައިވަނީ އެންމެ މެޗަކުންނެވެ. ނަޕޯލީގެ ފަހަތުން ދެ ވަނައިގައި އޮތް ޔުވެންޓަސް އަށް ލިބެނީ 37 ޕޮއިންޓެވެ.