އިތުރުވަގުތާއެކު 7 މިނެޓުގެ ތެރޭގައި ދެ ލަނޑު ޖަހައިގެން ރޯމާއިން މިލާނު ހުއްޓުވައިފި
ދެވަނައަށް ޖެހިލަން މިލާނަށް ލިބުނު ފުރުޞަތު ބޭނުން ނުކުރެވުން
ރޯމާގެ ދެވަނަ ގޯލް ޖެހުމަށްފަހު އަބްރަހަމް
އިޓާލިއަން ސެރީ އޭ ގައި 2-0 ން އޭސީ މިލާން މޮޅުވާން ދަނިކޮށް, މެޗުގެ ފަހު ވަގުތު ދެ ގޯލް ޖަހައިގެން ރޯމާއިން މިލާން ހުއްޓުވައިފިއެވެ.
ފުރަތަމަ ހާފްގައި 30 ވަނަ މިނެޓުގައި ކަލުލޫ ޖެހި ގޯލާއި, 77 ވަނަ މިނެޓުގައި ޕޮބޭގާ ޖެހި ގޯލުން މިލާން 2-0 ން ލީޑަކާއެކު ތިން ޕޮއިންޓްގެ ހިތްހަމަ ޖެހުން ހޯދިއެވެ. އެކަމަކު ރޯމާއިން ވަނީ 87 ވަނަ މިނެޓުގެ އިބަނޭޒްގެ ލަނޑުން އުއްމީދެއް ހޯދުމަށްފަހު, އިތުރު ވަގުތުގެ ތިންވަނަ މިނެޓުގައި ނަތީޖާ ހަމަހަމަކޮށްފައެވެ. ނަތީޖާ ހަމަހަމަކޮށްދިނީ ޓަމީ އަބްރަހަމްއެވެ.
މިނަތީޖާއާއެކު ރޯމާ ވަނީ 31 ޕޮއިންޓާއެކު ހަ ވަނާގައެވެ. ފަސްވަނާގައި ލާޒިއޯވެސް އޮތީ 31 ޕޮއިންޓާއެކުއެވެ. ހަތަރުވަނާގައި އިންޓަރ މިލާން އޮތީ 34 ޕޮއިންޓާއެކުއެވެ. އޭސީ މިލާން ތިންވަނާގައި އޮތީ 37 ޕޮއިންޓާއެކުއެވެ. ދެވަނާގައި އޮތް ޔުވެންޓަސްއަށްވެސް ލިބިފައިވަނީ 37 ޕޮއިންޓެވެ. އެއްވަނާގައި ނަޕޯލީ އޮތީ 44 ޕޮއިންޓާއެކުއެވެ.
