އެމް.ޑަބްލިއު.އެސް.ސީން "ނަލަ ދުވާފަރު" ގެ ނަމުގައި ހާއްސަ ކެމްޕޭނެއް
މިއީ ދުވާފަރުގައި ދެމުން ގެންދާ ކުނި މެނޭޖްކުރުމުގެ ޚިދުމަތްތައް އިތުރަށް ހަރުދަނާކުރުމަށް ކުރިއަށްގެންދާ ކެމްޕޭނެއް
އެމް ޑަބްލިއު އެސް ސީ
އެމް.ޑަބްލިއު.އެސް.ސީން "ނަލަ ދުވާފަރު" ގެ ނަމުގައި ރ. ދުވާފަރުގައި ކުނި މެނޭޖް ކުރުމާ ގުޅޭ ހާއްސަ ކެމްޕޭނެއް ފަށައިފިއެވެ.
އެ ކުންފުނިން ބުނިގޮތުގައި މިއީ ދުވާފަރުގައި ދެމުން ގެންދާ ކުނި މެނޭޖްކުރުމުގެ ޚިދުމަތްތައް އިތުރަށް ހަރުދަނާކޮށް، ރައްކާތެރި ގޮތެއްގައި ކުނި ނައްތާލައި، ދުވާފަރުގެ ރައްޔިތުން އެކަމަށް އަހުލުވެރި ކުރުމަށް، ކުރިއަށްގެންދާ ކެމްޕޭނެކެވެ. މިކެމްޕޭން އިފްތިތާހު ކޮށްދެއްވީ ދުވާފަރުގައި ހުކުރު ދުވަހު ބޭއްވި ހާއްސަ ރަސްމިއްޔާތެއްގައި އެމްޑަބްލިއުއެސްސީގެ މެނޭޖިންގ ޑިރެކްޓަރު ޙަސަން ޝާޙު އެވެ. މިރަސްމިއްޔާތުގައި ދުވާފަރު ކައުންސިލާއި މުއައްސަސާތަކުގެ އިސްވެރިންގެ އިތުރުން އެ ކުންފުނީގެ އެގްޒެކެޓިވް މެނޭޖުމަންޓް ޓީމާއި, މުވައްޒަފުން އަދި ރަށުގެ ރައްޔިތުންވެސް ބައިވެރިވިއެވެ.
"ނަލަ ދުވާފަރު" ކެމްޕޭންގެ މައިގަނޑު މަގުސަދަކީ ދުވާފަރަކީ ނަލަ، ސާފު ރަށެއްގެ ގޮތުގައި ބޭއްވުމާއި އަދި ރައްކާތެރި ގޮތުގައި ކުނި މެނޭޖްކުރުމަށް އިރުތަށް ފަސޭހަ ކޮށްދިނުން ކަމަށް އެމް.ޑަބްލިއު.އެސް.ސީން ބުންޏެވެ. އެގޮތުން މި ކެމްޕޭނުގެ ތެރެއިން، ކުނީގެ ބާވަތްތައް ވަކިކުރުމަށް ހާއްސަ ޑަސްބިންތަކެއް، ދުވާފަރުގެ ކޮންމެ ގޭބިސީއަކަށް ހަވާލު ކުރާނެއެވެ. އަދި ދުވާފަރުގެ ރައްޔިތުންގެ މެދުގައި ކުނި މެނޭޖްކުރުމުގެ އުސޫލްތަކަށް އިތުރަށް އަހުލުވެރިކުރުމަށް، ޑޯޓުޑޯ ކެމްޕެއިންވެސް ވަނީ ކުރިއަށް ގެންގޮސްފައެވެ.
މި ކެމްޕެއިން އިފްތިތާހު ކުރުމުގެ ރަސްމިއްޔާތު ނިންމާލީ ދުވާފަރު ގޮނޑުދޮށް ސާފުކުރުމުގެ ޕްރޮގްރާމަކުންނެވެ. އަދި އެ ކެމްޕޭނާއި ގުޅިގެން ދުވާފަރުގެ ކުޑަކުދިންނަށް އަމާޒުކޮށްގެން ހޮނިހިރު ދުވަހު ވަނީ "ކުޑަކުދިންނާއިއެކު އެމް.ޑަބްލިއު.އެސް.ސީ" ގެ ނަމުގައި ކުޑަކުދިންގެ ހަވީރެއް ވެސް ބާއްވައިފައެވެ.
އެމް.ޑަބްލިއު.އެސް.ސީން ބުނި ގޮތުގައި އެ ކުންފުނީގެ އަމާޒަކީ ރައްކާތެރި އަދި ދެމެހެއްޓެނެވި ގޮތެއްގައި ދުވާފަރުގައި ކުނި މެނޭޖްކޮށް ސާފު މާހައުލެއް ފޯރުކޮށްދިނުމެވެ.
އެ ކުންފުނިން އަންނަނީ ފެނާއި ނަރުދަމާގެ ޚިދުމަތުގެ އިތުރުން ކުނި މެނޭޖްކުރުމާއި، ކަރަންޓާއި މަސްވެރިންނަށް ބޭނުންވާ އައިސް ފޯރުކޮށްދިނުމުގެ ޚިދުމަތްވެސް ދުވާފަރުގައި ދެމުންނެވެ.
