2019 ވަނަ އަހަރުގެ އޮޑިޓް ރިޕޯޓު ހުށަހަޅާފައި ނުވާތީ, އިލެކްޝަންސް ކޮމިޝަނުން، މޯލްޑިވްސް ރިފޯމް މޫވްމަންޓް (އެމްއާރްއެމް) ޖޫރިމަނާކޮށްފައިވަނީ ގާނޫނާ ޚިލާފަށް ކަމަށް އެޕާޓީން ބުނެފައިވާއިރު، އެ ޕާޓީ ޖޫރިމަނާކޮށްފައިވަނީ ގަވާއިދާ ޚިލާފަށް ނޫންކަމަށް އިލެކްޝަންސް ކޮމިޝަން (އީސީ)ގެ ރައީސް ފުއާދު ތައުފީގު ވިދާޅުވެއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ފުއާދު ވިދާޅުވީ، އެމްއާރްއެމް އުފެދުނީ 2019 އަހަރުގެ ނޮވެމްބަރު މަހުގެ ފަހުކޮޅު ކަމަށެވެ. އަދި އޮޑިޓް ރިޕޯޓް ހުށަހަޅަން ޖެހޭނެތޯ އެ ޕާޓީން ސުވާލުކުރުމުން، އަހަރު ނިމެން ކުޑަ ދުވަސްކޮޅެއް އޮތަސް އޮޑިޓް ރިޕޯޓް ހުށަހަޅަން ޖެހޭނެ ކަމަށް ބުނެފައިވާ ކަމަށް ވިދާޅުވިއެވެ.

އެމްއާރްއެމްއިން 2020 ވަނަ އަހަރާއި 2019 ވަނަ އަހަރުގެ ރިޕޯޓް ގޮތުގައި ހުށަހަޅާފައިވަނީ، 2020 ވަނަ އަހަރުގެ ރިޕޯޓް ކަމަށް ބުނެ ކަމަށްވެސް ފުއާދު ވިދާޅުވިއެވެ. އަދި އެގޮތަށް ރިޕޯޓް ހުށަހެޅިޔަސް، އެއީ ގާނޫނުގައި ކަނޑައެޅިފައި އޮންނަ ގޮތަށް ރިޕޯޓް ހުށަހެޅުން ނޫން ކަމަށް ފުއާދު ފާހަގަކުރެއްވިއެވެ.

ފުއާދު އިތުރަށް ވިދާޅުވީ، ޕާޓީތައް ޖޫރިމަނާކުރުމަކީ އެއްވެސް ގޮތަކަށް ކުރައްވަން ބޭނުންފުޅުވާ ކަމެއް ނޫން ކަމަށެވެ. ބޭނުންފުޅުވަނީ ހުރިހާ ޕާޓީތައްވެސް ސިޔާސީ ޕާޓީތަކުގެ ގާނޫނަށް އަމަލުކުރަން ކަމަށް ވިދާޅުވިއެވެ.

އެމްއާރްއެމްއިން ނެރުނު ނޫސްބަޔާނެއްގައި ބުނެފައިވަނީ، 20،000 ރުފިޔާއިން އެޕާޓީ ޖޫރިމަނާކޮށްފައިވަނީ ގާނޫނާ ޚިލާފަށް ކަމަށް ދެކޭތީ، އިލެކްޝަންސް ކޮމިޝަންގެ ނިންމުން މުރާޖައާކުރުމަށް އެދޭކަމަށެވެ.

އެމްއާރްއެމްއިން ބުނިގޮތުގައި، އެޕާޓީ ރަޖިސްޓްރީކޮށްފައިވަނީ ނޮވެމްބަރު 20، 2019ގައި ކަމަށްވާތީ، އެ އަހަރުގެ 42 ދުވަހުގެ ހިސާބު 2020 ވަނަ އަހަރުގެ ހިސާބާ އެއްކޮށް ހުށަހެޅުމުގެ ހުއްދައަށް އިލެކްޝަންސް ކޮމިޝަންގައި އޭރު އެދިފައި އޮންނާނެކަމަށެވެ. އެހެން އެދިފައި ވަނިކޮށް ކޮވިޑުގެ ހާލަތު އައިސް، އާންމު ނުރައްކަލުގެ ކުއްލި ހާލަތުގެ ގާނޫނު ގެޒެޓް ކުރުމުން، އެގާނޫނުގެ ދަށުން، ވަކި މުއްދަތެއްގެ ތެރޭގައި ކުރުން ލާޒިމު ކަންކަން ކޮމިޝަނުން ފަސްކޮށްދިން ކަމަށެވެ.

އެހެންކަމުން އަލުން މުއްދަތު ގުނަންފަށާނީ އާންމު ސިއްހަތުގެ ކުއްލި ނުރައްކަލުގެ ހާލަތު ނިމުމަކަށް ގެންނަ ތާރީޚުން ފެށިގެންކަން ކަމަށްވެސް އެމްއާރްއެމްގެ ބަޔާނުގައި ފާހަގަކޮށްފައިވެއެވެ. އެހެންކަމުން އެމްއާރްއެމްއިން 2019 ވަނަ އަހަރުގެ އޮޑިޓް ރިޕޯޓް، 2020 ވަނަ އަހަރުގެ އޮޑިޓް ރިޕޯޓާއެކު (ސިއްހީ ކުއްލި ނުރައްކަލުގެ ހާލަތު މާރިޗު 13، 2022ގައި ނިމުމަކަށް ގެނައުމުގެ ކުރިން) މާރިޗު 31، 2021ގައި އިލެކްޝަންސް ކޮމިޝަނަށް ފޮނުވާފައި ވާނެކަމުގައިވެސް އެމްއާރްއެމްއިން ބުންޏެވެ.

މީގެއިތުރުން، 2021 ވަނަ އަހަރުގެ އޮޑިޓް ރިޕޯޓުވެސް، ގާނޫނުގައި ބުނާ މުއްދަތު ހަމަވުމުގެ ކުރިން ކޮމިޝަނަށް ހުށަހަޅާފައި ވާނެކަމަށްވެސް އެމްއާރްއެމްއިން ބުނެފައިވެއެވެ.

އޮޑިޓް ރިޕޯޓްތައް ފޮނުވާފައި ވަނިކޮށް، އެ ޕާޓީން 2019 ވަނަ އަހަރުގެ އޮޑިޓް ރިޕޯޓު ހުށަނާޅާ ކަމަށް ބުނެ ޖޫރިމަނާކުރިކަމަށް އަންގައި، މިދިޔަ މަހުގެ 29 ވަނަ ދުވަހު އިލެކްޝަންސް ކޮމިޝަނުން އެޕާޓީއަށް ސިޓީއެއް ފޮނުވާފައިވާކަމަށްވެސް ބަޔާނުގައި ފާހަގަކޮށްފައިވެއެވެ. އަދި އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް ޓުވިޓަރގައި މިމައުލޫމާތު ހާމަކުރައްވާފައިވަނީ، ކަންކަން ބައްލަވަންޖެހޭ މިންވަރަށް ނުބައްލަވައި ކަމަށްވެސް އެމްއާރްއެމްއިން ބުނެއެވެ.

މާލީ ރިޕޯޓް ހުށަހަޅާފައި ނުވާތީ ހަތް ސިޔާސީ ޕާޓީއެއް ޖޫރިމަނާކުރިއެެވެ. އެއީ އަދާލަތު ޕާޓީއާއި ދިވެހި ރައްޔިތުންގެ ޕާޓީ (ޑީއާރްޕީ)އާއި މޯލްޑިވްސް ނެޝަނަލް ޕާޓީ (އެމްއެންޕީ)އާއި މޯލްޑިވްސް ރިފޯމް މޫވްމަންޓް (އެމްއާރްއެމް)އާއި ޕީއެންސީއާއި އެމްއެސްއެލްޑީޕީގެ އިތުރުން މޯލްޑިވްސް ތަރޑްވޭ ޑިމޮކްރަޓިކް (އެމްޓީޑީ)އެވެ. އެއިން ކޮންމެ ޕާޓީއެއް ޖޫރިމަނާކޮށްފައިވަނީ 20،000 ރުފިޔާއިންނެވެ.