ދެމެހެއްޓެނިވި ފަތުރުވެރިކަމުގައި މުޅި ދުނިޔޭގެ ލީޑިންގ ޑެސްޓިނޭޝަނަށް ރާއްޖެ ހެދުމަކީ މި ސަރުކާރުގެ އަމާޒުކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމު ވިދާޅުވެއްޖެއެވެ.

ރާއްޖެޓީވީގެ ފަލަސުރުޚީ ޕްރޮގްރާމްގައި ދެއްކެވި ވާހަކަފުޅުގައި ފަތުރުވެރިކަމުގެ ވާދަވެރިކަމަށް އަލިއަޅުވާލައްވައި މިނިސްޓަރ ވިދާޅުވީ، ރާއްޖެއިން ފޯކަސްކުރާ މާކެޓުތަކަކީވެސް ވާދަވެރިކަން ބޮޑު މާކެޓުތަކެއް ކަމަށެވެ.

ރާއްޖެއިންވެސް ޒަމާނީ ފަތުރުވެރިކަމުގެ ޕްރޮޑަކްޓްލައިން ހިފަހައްޓަމުންދާކަން ފާހަގަކުރައްވައި މިނިސްޓަރ އިތުރަށް ވިދާޅުވީ، މާކެޓު ހިފެހެއްޓުމުގައި އަގުތައް މުހިއްމު ރޯލެއް އަދާކުރާކަމަށެވެ.

ވަކިން ޚާއްސަކޮށް ރަށްރަށުގައި ފަތުރުވެރިކަން ފުޅާކުރުމަށް ވިސްނާއިރު، ފެނާއި ކަރަންޓު އަދި ނަރުދަމާގެ ކަންކަން ފުރިހަމަވެފައި ހުންނަންޖެހޭކަމަށް މިނިސްޓަރ ވިދާޅުވިއެވެ.

އޭގެ އިތުރުންވެސް ސިއްހީ ނިޒާމާއި، ދަތުރުފަތުރުގެ ނިޒާމު ފުރިހަމަ ކުރުމަކީވެސް އިސްކަންދޭން ޖެހޭނެ ކަންކަން ކަމަށް މިނިސްޓަރ ވިދާޅުވިއެވެ.

ފަތުރުވެރިކަމުގެ ވަސީލަތްތައް އަންނަން އޮތް ޖީލުތަކަށްވެސް ފޯރުކޮށްދޭން ޖެހޭކަން ފާހަގަކުރައްވައި މިނިސްޓަރ އިތުރަށް ވިދާޅުވީ، ދެމެހެއްޓެނިވި ފަތުރުވެރިކަމެއް ކުރުމަށް އަބަދުވެސް އިސްކަންދޭންޖެހޭ ކަމަށެވެ.

ރާއްޖޭގެ އަމާޒަކީ 2023 ވަނަ އަހަރާއި، ކުރިއަށް އޮތް އަހަރުތަކުގައިވެސް ދެމެހެއްޓެނިވި ފަތުރުވެރިކަމުގައި މުޅި ދުނިޔޭގެ ލީޑިންގ ޑެސްޓިނޭޝަނަށް ވުންކަމަށް މިނިސްޓަރ ވިދާޅުވިއެވެ. ދެމެހެއްޓެނިވި ފަތުރުވެރިކަމަކަށްޓަކައި ތިމާވެށި ހިމާޔަތްކުރުން މުހިއްމުކަން ފާހަގަކުރައްވައި މިނިސްޓަރ އިތުރަށް ވިދާޅުވީ، 2030ގައި ރާއްޖެއިން ނެޓް ޒީރޯއަށް އަމާޒު ހިފާފައިވާއިރު، ފަތުރުވެރިކަމުގެ ސިނާއަތުންވެސް އެކަމާގުޅޭ ގިނަ ކަންތައްތަކެއް ހިއްސާވާކަމަށެވެ. އަދި ވުޒާރާތަކާއެކު މިހާރުވެސް އެކަންކަމާގުޅޭ މަޝްވަރާތައް ކުރިއަށްދާ ކަމަށެވެ.

އޭގެ އިތުރުން، ފަތުރުވެރިކަމުގެ ފައިދާ ރައްޔިތުންނަށް ލިބިދިނުމަކީވެސް ދެމެހެއްޓެނިވި ފަތުރުވެރިކަމެއްގައި އޮންނަންޖެހޭ ކަމެއްކަމަށް މިނިސްޓަރ ވިދާޅުވިއެވެ. މި ހިނގަމުންދާ ސަރުކާރުގައި އެ ބަދަލުތައްވެސް އެބަ ފެންނަމުންދާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، މި އަމާޒުތައް ހާސިލުކުރުމަށްޓަކައި ކުރަންޖެހޭ ކަންކަން ކުރުމަށް ދައުލަތަށް އާމްދަނީ އިތުރުކޮށް، ބަޖެޓު އަދިވެސް ބޮޑު ކުރެވޭނެ ގޮތްތައް ހޯދަންޖެހޭ ކަމަށެވެ.