އަލިފުށީގައި އެއާޕޯޓު އެޅިދާނެ ކަމަށް ގިނަ ބަޔަކު ގަބޫލު ނުކުރޭ، މިއީ ގޮންޖެހުން ބޮޑު މަސައްކަތެއް: ބިގޭ
އަލިފުށީ އެއާޕޯޓުގެ މަސައްކަތަކީ ވަރަށް ގިނަ ސިޔާސީ ގޮންޖެހުންތަކާއި އެކު ކުރި މަސައްކަތެއް
ރ. އަލިފުށީ އެއަރޕޯޓްގެ ޓަރމިނަލްގެ ބިންގާ އެޅުމުގެ ރަސްމިއްޔާތުގެ ތެރެއިން
އަލިފުށީގައި އެއާޕޯޓު އެޅިދާނެ ކަމަށް ގިނަ ބަޔަކު ގަބޫލު ނުކުރާ ކަމަށާއި އެއީ ގޮންޖެހުން ބޮޑު މަސައްކަތެއް ކަމަށް އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
އޭނާ އެހެން ވިދާޅުވީ ރ. އަލިފުށީ އެއަރޕޯޓްގެ ޓަރމިނަލްގެ ބިންގާ އެޅުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.
އަލިފުށީ އެއާޕޯޓުގެ މަސައްކަތަކީ ވަރަށް ގިނަ ސިޔާސީ ގޮންޖެހުންތަކާއި އެކު ކުރި މަސައްކަތެއް ކަމަށް އޭނާ ވިދާޅުވިއެވެ. އެ މަސައްކަތަކީ ބަޖެޓްގައި ނެތް މަސައްކަތެއް ކަމަށް ބުނެ ވަރަށް ގިނަ ފާޑުކިޔުންތައް އަމާޒުވިކަން ފާހަގަކުރައްވާ އޭނާ ވިދާޅުވީ އެ މަސައްކަތް ކުރިއަށް ދަނީ ބަޖެޓުގައި ހިމަނައިގެން ކަމަށެވެ. އަލިފުށީގައި އެއާޕޯޓް އެޅުމުގެ ވާހަކަ ދެއްކުމުން އެކަން ކުރެވިދާނެ ކަމަށް ގަބޫލު ނުކުރެވޭ ކަމަށް ގިނަ ބަޔަކު ބުނި ކަމަށް އޭނާ ވިދާޅުވިއެވެ. އެ ރަށުގައި އެއާޕޯޓު އެޅޭނެ ކަމުގެ ޔަގީންކަން އަބަދުވެސް އޮތް ކަމަށާއި އެ މަސައްކަތް ކުރެވުނީ ރައީސް އިބްރާޙިމް މުހައްމަދު ޞާލިހު އެކަމަށް ދެއްވާ އެއްބާރުލުމުގެ ސަބަބުން ކަަމަށް އޭނާ ވަނީ ވިދާޅުވެފައެވެ. މި އަހަރުގެ ތެރޭގައި އެއާޕޯޓުގެ މަސައްކަތް ނިމޭނެ ކަަމަށް އުންމީދުކުރައްވާ ކަމަށް އޭނާ ވަނީ ވިދާޅުވެފައެވެ.
ބުރާސްފަތި ދުވަހު ބޭއްވި ޚާއްސަ ރަސްމިއްޔާތެއްގައި ޓަރމިނަލް އިމާރާތުގެ ބިންގާ އަޅުއްވައިދެއްވީ މި މަޝްރޫއުގެ މަސައްކަތް ހަވާލުކޮށްފައިވާ ކުންފުނި ކަމަށްވާ އެމް.ޓީ.ސީ.ސީގެ ސީއީއޯ އާދަމް އާޒިމްއާއި ރައްޔިތުންގެ މަޖިލީހުގެ އަލިފުށީ ދާއިރާގެ މެމްބަރ މުހައްމަދު ރަޝީދު ހުސައިނާއި ކައުންސިލްގެ ރައީސް އާދަމް އިމްރާނެވެ. އަލިފުށީ އެއަރޕޯޓް ތަރައްގީކުރުމަށް އެމް.ޓީ.ސީ.ސީއާ ހަވާލުކުރީ ފާއިތުވި އަހަރުގެ ސެޕްޓެމްބަރުމަހުގެ 1 ވަނަ ދުވަހުއެވެ. އެ މަޝްރޫއުގެ ދަށުން އަލިފުށީގެ ބިންހިއްކުމާއި، އެއަރޕޯޓް ތަރައްގީކުރުމުގެ މަސައްކަތް ކުރުމަށް ވަނީ ހަމަޖެހިފައެވެެ. އެގޮތުން މިދިޔަ އޮގަސްޓް މަހު ބިން ހިއްކުމުގެ މަސައްކަތް ވަނީ ފަށާފައެވެ. މީގެ އިތުރުން މި ޕްރޮޖެކްޓްގެ ދަށުން އަލިފުށިން 50.5 ހެކްޓަރުގެ ބިން ހިއްކުމަށް ހަމަޖެހިފައިވާކަމަށް އެމްޓީސީސީން ވަނީ ބުނެފައެވެެ. އަދި އެ މަސައްކަތް ނިމެމުންދާވަރަކަށް، އެއަރޕޯޓްގެ އަމަލީ މަސައްކަތްތައް ފަށަމުންދާކަން އެ ކުންފުނިން ފާހަގަކުރެއެވެ.
އަލިފުށިން ހިއްކާ 50 ހެކްޓަރު ބިމުގެ %80 ޖާގައަކީ އެއަރޕޯޓް ސަރަހައްދަށް ބޭނުންކުރާ ޖާގައެވެ. ބާކީ 10 ހެކްޓަރު ބޭނުންކުރާނީ އެ ސަރަހައްދުގެ ބޯހިޔާވަހިކަމާއި، ރަށުގައި އިގްތިސާދީ މަސައްކަތަކަށް ބިން ދޫކުރުމަށެވެ
