އެމްޑީޕީ އިން ބޭނުންވާ ތާހިރު ދިރިއުޅުން ހޯދާދެވޭނެ ބޭފުޅަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރޮޒައިނާ އެފަދައިން ވިދާޅުވީ ބުދަ ދުވަހުގެ ރޭ، ކުރިއަށް އޮތް އެމްޑީޕީ ރިޔާސީ ޕްރައިމަރީގައި ރައީސް ޞާލީހު އަށް ތާއީދުކުރާ ފަރާތްތަކުން ބޭއްވި ޖަލްސާގައި ވާހަކަދައްކަވަމުންނެވެ. ރޮޒައިނާ ވަނީ އެމްޑީޕީގެ ޕްރައިމަރީގައި ވާދަކުރައްވާ ކުރީގެ ރައީސް މުހައްމަދު ނަޝީދު އަށް ފާޑު ވިދާޅުވެފައެވެ. އެގޮތުން "ފިކުރެއްގެ ދިރުމުގެ" ނަމުގައި އުޅުއްވަނީ ކޯޗެއް ދިރުވަންތޯ ސުވާލު އުފެދޭ ކަމަށް ރޮޒެެއިނާ ވިދާޅުވިއެވެ. އެމްޑީޕީ އަކީ އަސާސީ ޚިދުމަތްތަައް ހަމަހަމަކަމާއެކު ދޭން ވައުދުވާ ޕާޓީއެއް ކަަމަށާއި އެމްޑީޕީގެ ސިޔާސަތަކީ ވެސް އެއީ ކަމަށް ރޮޒެއިނާ ވިދާޅުވިއެވެ. އެ ފިކުރު ނުދިރުވާ ނަމަ ދެން ދިރުވަން އުޅެނީ ކޮން ފިކުރެއްތޯ ރޮޒެއިނާ ވަނީ ސުވާލު އުފައްދަވާފައެވެ.
އިތުރަށް ވާހަކަދައްކަވަމުން، އޭނާ ވިދާޅުވީ އެމްޑީޕީގެ ޚާއްސަކަމަކީ އެމްޑީޕީ އަކީ ގައުމު ކުރިއަރުވަން ރަނގަޅު ނިޔަތުގައި ޕާޓީ އަށް ވަންނަ ކޮންމެ މީހަކަށް މަރުޚަބާ ކިޔާ ޕާޓީއަކަށް ވުން ކަމަށެވެ. އެގޮތުން އެމްޑީޕީ އަކީ ތައްމިނަށް ހުޅުވިފައި ހުރި ޕާޓީއެއް ކަމަށާއި އެ ޕާޓީ ކުރިއަށް ގެންދެވޭނީ ގުޅިގެން މަސައްކަތްކުރުމުގެ ވިސްނުން ހުރި ބޭފުޅަކަށް ކަމަށް ރޮޒައިނާ ވިދާޅުވިއެވެ. އެމްޑީޕީ އަކީ އެންމެ ބޮޑު ސިޔާސީ ޕާޓީކަމަށް ވާއިރު ގައުމުގެ ކުރިމަގު ބިނާކުރަން ވެރިކަމުގައި އެމްޑީޕީ އޮތުން މުހިންމު ކަމަށް ވެސް އޭނާ ވިދާޅުވިއެވެ.
މީގެ އިތުރުން ރޮޒައިނާ ވަނީ ރައީސް ސާލިހުގެ ސިޔާސަތުތަކަށް ތައުރީފުކުރައްވާފައެވެ. އެގޮތުން ކުޑަ ރަށެއް ބޮޑު ރަށެއް ބެލުމެއް ނެތި ތަރައްްޤީގެ ކަންކަން ކޮށްދެއްވުމަށް ރައީސް ދެއްވާ އިސްކަން ރޮޒެއިނާ ފާހަގަކުރެެއްވިއެވެ. އެމްޑީޕީގެ ރިޔާސީ ކެނޑިޑޭޓު ހޮވުމަށް ބާއްވާ ޕްރައިމަރީ ބޭއްވުމަށް ހަމަޖެހިފައި ވަނީ މި ހިނގާ ޖެނުއަރީ މަހުގެ 28 ވަނަ ދުވަހުއެވެ.
