އިއްޒުއްދީން ފާލަން ސަރަހައްދަށް ތެޔޮ އެޅުން: ޖުމްލަ 15 ފީފާގެ ތެޔޮ ނަގާފައިވޭ
4 ޖެނުއަރީ 2023 | ބުދަ 05:52އެމްއެންޑީއެފުން ލަފާކުރާ ގޮތުގައި އެސަރަހައްދަށް 1000 ލީޓަރުގެ ކަޅުތެޔޮ އެޅިފައިވޭ
ފަޅުތެރެއަށް އެޅުނު ތެޔޮ ސާފުކުރަނީ | އެމްއެންޑީއެފް
ރަސްމީ ފާލަމާ ދިމާއިން ފަޅުތެރެއަށް އެޅިފައިވާ ކަޅުތެޔޮ އެސަރަހައްދުން ނަގައި ނިންމާލި އިރު ޖުމުލަ 15 ފީފާގެ ތެޔޮ ނަގާފައިވާ ކަމަށް އެމްއެންޑީއެފް އިން ބުނެފިއެވެ.
އެމްއެންޑީއެފް ކޯސްޓްގާޑް އޮއިލް ރެސްޕޮންސް ޓީމާއި މާލޭ އޭރިއާ ސިފައިން ގުޅިގެން, ރަސްމީ ފާލަމާ ދިމާއިން ފަޅުތެރެއަށް އެޅިފައިވާ ކަޅުތެޔޮ އެސަރަހައްދުން ނަގައި ނިންމާލާފައި ވަނީ އަންގާރަ ދުވަހުއެވެ. އެ މަސައްކަތް ނިންމާލި ނަމަވެސް އެސަރަހައްދުގައި ތެޔޮ ހުރިތޯ ބަލަމުންދާނެކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ބުނިގޮތުގައި ރަސްމީ ފާލަން ސަރަހައްދަށް އެޅުނު ތެޔޮ ނެގުމު މަސައްކަތް ނިންމާލާފައި ވަނީ އަންގާރަ ދުވަހުގެ މެންދުރު 13:35 ހާއިރެވެ. އެކަމާއި ގުޅޭ އިތުރު މައުލޫމާތު ހިއްސާކުރައްވަމުން އެމްއެންޑީއެފްގެ މީޑިޔާ އޮފިޝަލް ވިދާޅުވީ، ފަޅުތެރެއަށް އެޅިފައިވާ ކަޅުތެޔޮ ސާފުކުރުމަށް ފެށި އޮޕަރޭޝަން ނިންމާލި ނަމަވެސް ފާލަން ސަރަހައްދަށް ތެޔޮ ވަދޭތޯ ބަލަމުން ދާނެކަމަށެވެ. އެގޮތުން ބުދަ ދުވަހުވެސް ތެޔޮ ނެގުމުގެ ކަންކަން ކުރިޔަށްގެންދާނެ ކަމަށް އެމްއެންޑީއެފް އިން ބުނެއެވެ.
އެ ސަރަހައްދަށް ކަޅުތެޔޮ އެޅިފައިވާކަމުގެ މައުލޫމާތު މެރިޓައިމް ރެސްކިޔު ކޯޑިނޭޝަން ސެންޓަރު، އެމް.އާރް.ސީ.ސީއަށް ލިބިފައިވަނީ މިދިޔަ އާދިއްތަ ދުވަހުގެ ހެނދުނު 09:10 ހާއިރު ކަމަށް އެމްއެންޑީއެފުން ވަނީ ބުނެފައވެެ. އެމްއެންޑީއެފުން ލަފާކުރާ ގޮތުގައި އެސަރަހައްދަށް 1000 ލީޓަރުގެ ކަޅުތެޔޮ އެޅިފައިވެއެވެ.
ތެޔޮ ސާފުކުރުމުގެ މަސައްކަތުގައި ހަރަކާތްތެރިވީ އެމްއެންޑީއެފް ކޯސްޓްގާޑްގެ ޑައިވަރުންނާއި އޮއިލް ޕޮލިއުޝަން ރެސްޕޮންސް ޓީމަށް އެހީތެރިކަން ފޯރުކޮށްދިނުމަށް، އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރަނާއި މާލޭ އޭރިއާ މެރީންސްއާއި، މެރިން ޕޮލިސްގެ އިތުރުން، މާލޭ ސިޓީ ކައުންސިލުން ހަރަކާތްތެރިވި ކަމަށް އެމްއެންޑީއެފުން ބުނެއެވެ.
އެންވަޔަރަމަންޓަލް ޕްރޮޓެކްޝަން އެޖެންސީ (އީޕީއޭ)އިން ވަނީ އެ ސަރަހައްދަށް ތެޔޮއެޅިފައިވަނީ ކިހިނެއްތޯ ބެލުމުގެ މަސައްކަތް ކުރަމުންދާކަމަށް ބުނެފައެވެ.
