ރައީސް ނަޝީދުގެ މަޖާޒީ ހިސާބު: " ގޯލެއް ޖަހަން ނަގަނީ ސިކުންތެއް"

އެއީ އާދިއްތަ ދުވަހުގެ ރޭ ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ދެއްވި ޕްރެސްގައި ދެއްކެވި ވާހަކަފުޅެވެ. އެއީ ކުރިއަށް އޮތް ޕްރައިމަރީއާމެދު އެމަނިކުފާނު ޖައްސަވާ ހިސާބުތަކުގެ ވާހަކައެވެ. މުޅި ޕްރެސް ޚުލާސާކޮށްލާއިރު އެމަނިކުފާނުގެ ހިސާބުތައް މައިގަނޑުގޮތެއްގައި ހުރީ ދެތިން ދިމާއެއްގައެވެ. އެމްޑީޕީގެ ޕްރައިމަރީއާއި ޕާޓީގެ ކުރިމަގާއި ބަރުލަމާނީ ނުވަތަ ވެރިކަމުގެ ނިޒާމްގެ ވާހަކައަށެވެ. އާއްމުގޮތެއްގައި ވަރަށް ސީދާސާދާ ބަސްމަގު ޚިޔާރުކުރައްވާ ރައީސް ނަޝީދުގެ ވާހަކަފުޅު މި ޕްރެސްގައި ކޮންމެވެސް ވަރަކަށް ތަފާތެވެ.

ސުވާލުތަކަށް ވަރަށް ޖެހިލުންކުޑަ ޖަވާބުތަކެއް އާއްމުކޮށްދެއްވާ ރައީސް ނަޝީދު އެ ޕްރެސް ކޮންފަރެންސްގައި ބައެއް ސުވާލުތަކަށް ޖަވާބު ނުދެއްވުން ބުއްދިވެރިކަމަށް ދެކިވަޑައިގެންނެވިއިރު، އަނެއްބައި ސުވާލުތަކަށް ދެއްވީ ޑިޕްލޮމެޓިކް، އެހެނަސް ވަރަށް މާނަފުން ޖަވާބުތަކެކެވެ. ޕްރެންސްކޮންފަރެންސްގައި ނޫސްވެރިންގެ ސުވާލުތަކަށް ޖަވާބުދެއްވައި، ޕްރެސްކޮންފަރެންސް ނިމުމަކާ ގާތްވެފައި ވަނިކޮށް ރައީސް ނަޝީދު ވަނީ މަޖާޒީ ގޮތަކަށް "ގޯލެއް ޖަހަން ނަގަނީ ސިކުންތެއް" ކަމަށް ތަކުރާރުކޮށް ވިދާޅުވެފައެވެ.

ސުވާލަކީ ރައީސް ނަޝީދު އެ ވިދާޅުވާ ގޯލަކީ ކޮބައިތޯއެވެ؟ ހަގީގަތުގައި ރައީސް ނަޝިދު އެ ވިދާޅުވި ބަސްފުޅުގެ ސީދާ މާނަ އެނގިވަޑައިގަންނަވާނީ ހަމަ އެމަނިކުފާނަށެވެ. އެހެންނަމަވެސް އެ ނޫސްވެރިންގެ ބައްދަލުވުުމުގައި އެމަނިކުފާނު ދެއްކެވި ވާހަކަފުޅުތަކަށް ބަލާއިރު، އެ ވިދާޅުވާ ގޯލަކީ ކޮބައިކަން ފަހުމުކުރެވިދާނެ ދެތިން ގޮތެއް ނޫސްވެރިންގެ ބައްދަލުވުމުގައި އިން ނޫސްވެރިއެއްގެ ހައިސިއްޔަތުން އަޅުގަނޑަށް ކުރެވުނެވެ.

އެއްކަމަކީ ޕާޓީގެ ޕްރައިމަރީއާއި ޕާޓީގެ ހާލަތެވެ. ޕްރެސް ކޮންފަރެންސްގައި ރައީސް ނަޝީދާ ގާތްކޮށް އުޅުއްވި ބޭފުޅުން އެމަނިކުފާނާ ފެއަށް ޖެހިވަޑައިގަތް ސަބަބާމެދު އެމަނިކުފާނު ދެއްކެވި ވާހަކަފުޅުތަކެވެ. ނޫސްވެރިންގެ ސުވާލާއެކު ރައީސް ނަޝީދު ވަނީ، އެ މަނިކުފާނާއެކު ކުރިން ތިއްބެވި ބޭފުޅުން މިހާރު އެކުގައި ނެތީ އެ ބޭފުޅުން ތިއްބެވި މަގާމުގެ ސަބަބުން ކަމަށް ވިދާޅުވެ، އެފަދަ ބޭބޭފުޅުން ދިފާއުކުރައްވާފައެވެ. އަދި ބާރު އޮތްތަނަކަށް އަބަދުވެސް މީހުން ދާނެކަމަށާއި އެ ބާރުތަކަށް ދެމިގެން ނުދާނީ ޝަޚުސިއްޔަތު ވަރުގަދަ މީހުން ކަމަށް ވިދާޅުވިއެވެ. އެހެންކަމަށް ވާނަމަ، "ގޯލެއް ޖަހަން ނަގާނީ ސިކުންތެއް" ކަމަށް އެ ވިދާޅުވި ވިދާޅުވުމަކީ ސިޔާސީ ހާލަތު ބަދަލުވާން މާގިނަ ވަގުތެއް ނުނަގާނެކަން ދޭހަކޮށްދިނުމަށް ވިދާޅުވި ވާހަކަފުޅަކަށް ވެދާނެއެވެ.

އަދި އެއީ އިންތިޚާބާމެދު އޮތް ޔަގީންކަން ހާމަކޮށްދެއްވުމަށް ވިދާޅުވި ވާހަކަފުޅަކަށް ވުން އެކަށީގެންވެއެވެ. ސަބަބަކީ ނޫސްވެރިންގެ ބައްދަލުވުމުގައި ރައީސް ނަޝީދު ވަނީ އެމަނިކުފާނަށް ލިބިވަޑައިގަންނަވާނެ ކަމަށް ބެލެވޭ ވޯޓުގެ ހިސާބު އަދަދުތަކެއް ހިއްސާކުރައްވާފައެވެ. 70،000ށްވުރެ ގިނަ ވޯޓު ހޯއްދަވައި، ރިޔާސީ އިންތިޚާބުވެސް ކާމިޔާބުކުރެއްވޭނެ ކަމަށް ދެކިވަޑައިގެން ހުންނެވިކަން ރައީސް ނަޝީދު ވަނީ ފާހަގަކުރައްވާފައެވެ. އެހެންކަމުން އެ ވިދާޅުވި ގޯލަކީ އެމްޑީޕީގެ ޕްރައިމަރީއާއި ކުރިއަށް އޮތް ރިޔާސީ އިންތިޚާބަށް އިޝާރާތްކުރެއްވި ކުރެއްވުމަކަށް ވެދާނެބާއެވެ؟

ދެން އޮތް ވާހަކައަކީ ބަރުލަމާނީ ނިޒާމްގެ ވާހަކައެވެ. އެ ނޫސްވެރިންގެ ބައްދަލުވުމުން، ސުވާލެއް ނެތް މިންވަރަށް ހާމަވިކަމަކީ ރައީސް ނަޝީދު އުންމީދުކުރައްވާ ގޮތުގައި އެމަނިކުފާނު ދެން އިންތިޚާބެއް ކާމިޔާބުކުރައްވާނީ ބަރުލަމާނީ ނިޒާމެއްގެ ބަދަލާއެކުގައި ކަމެވެ. އެ ބަދަލު ދޫކޮށްލައްވަން ބޭނުންފުޅު ނުވާކަން، ތަކުރާރުކުރެއްވި ވާހަކަތަކުން ސާފުވެއެވެ. އެ މަސައްކަތަކީ މަޝްވަރާގެ މަތިން ނޫނީ ނުކުރެވޭނެ ކަމެއް ކަމަށް ސަރުކާރުން ބުނަމުންދާއިރު އެ މަސައްކަތް މި ދައުރުގެ ތެރޭގައި ކުރަން ޖެހޭ ކަމަށް ރައީސް ނަޝީދު ވަނީ ވިދާޅުވެފައެވެ.

ރައީސް ނަޝީދު އެ ވާހަކަތައް ގުޅުވާލެއްވިއިރު ބަރުލަމާނީ ނިޒާމުގެ ވާހަކަ ގެންނެވިނަމަވެސް، އެއީ އެއަށްވުރެ މާނަފުންކޮށް ދެއްކެވި ވާހަކަތަކެއްކަން އެމަނިކުފާނުގެ އެ ޕްރެސްކޮންފަރެންސްގެ އުސްއަލިތަކަށް ބަލައިލުމުން އެނގެއެވެ. އަދި އެމްޑީޕީގެ ތެރޭގައި ފެކްޝަންތައް އުފެދި ޕާޓީ ރޫޅިދާނެ ކަަމަށް ދެކިގެން ތިބި ފަރާތްތަކަށް އެމަންޒަރު ނުފެންނާނެ ކަމަށްވެސް ވިދާޅުވިއެވެ. އެމްޑީޕީގެ ހާލަތު ގޯސްކަމަށް ބަޔަކު ދުށްނަމަވެސް މީގެ ކުރިންވެސް ޚިޔާލުތަފާތުވުމާއެކު އެމްޑީޕީގެ ތެރޭގައި މަސައްކަތްކުރިކަމާއި، ރައީސް އިބްރާހީމް މުހައްމަދު ސާލިހާއި ރައީސް ނަޝީދު އުނދަނގޫ ދަނޑިވަޅުތަކުގައި އެކުގައި ތިއްބެވިކަން ފެންނާން އެބަހުއްޓެވެ. އެހެންކަމުން ރައީސް ނަޝީދު އެ ވިދާޅުވާ ގޯލުގެ ވާހަކައަކީ ހަމައެކަނި ބަރުލަމާނީ ނިޒާމާއި، އިންތިޚާބުގެ ތެރޭގައި ހަވާސާވެފައިވާ ވާހަކައެއް ކަަމަށް ނުވުން އެކަށީގެންވެއެވެ.