އެންމެ ފުރަތަމަ އަލް ނަސްރަށް ގެންނަން ބޭނުންވީ އާޖެންޓީނާގެ ކެޕްޓަން ލިއޮނަލް މެސީ ކަމަށް އެ ޓީމުގެ ކޯޗު ރޫޑީ ގާސިއާ ބުނެފި އެވެ.

ޕްރެސް ކޮންފަރެންސެއްގައި ވާހަކަ ދައްކަމުން ގާސިއާ ބުނީ، ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯގެ ކުރިން އަލް ނަސްރަށް އޭނާ ގެންނަން ބޭނުންވީ މެސީ ކަމަށެވެ. ގާސިއާ ބުނީ އޭނާ ބޭނުންވީ ސީދާ ޤަތަރުގެ ވެރި ރަށް ދޯހާއިން މެސީ ސައުދީ އަރަބިއާ އަށް ގެންނަން ކަމަށެވެ. އަދި އޭނާ އަކީ މެސީ އަށް ސަޕޯޓު ކުރާ މީހެއް ކަމަށާއި، މެސީ ގެންނަން ބޭނުންވީ އެހެންވެ ކަމަށެވެ. އޭނާ ބުނީ ޤަތަރުގައި ވޯލްޑް ކަޕް ކުރިއަށް ދިޔަ ދުވަސްވަރު އެ ޤައުމަށް ގޮސް، އާޖެންޓީނާއާއެކު މެސީ ކުޅުނު މެޗުތައް ބެލި ކަމަށެވެ.

އަލް ނަސްރުން ވަނީ ރޮނާލްޑޯގެ އެ ކުލަބަށް ގެންގޮސްފަ އެވެ. ރޮނާލްޑޯ އެ ކުލަބަށް ގުޅުނީ ފުޓުބޯޅައިގެ ތާރީޚުގައި ވެސް އެންމެ ބޮޑު މުސާރަ ލިބޭ ކުޅުންތެރިޔާގެ ގޮތުގައި ކަމަށް ރިޕޯޓުތައް ބުނެ އެވެ. ރިޕޯޓުތައް ބުނާ ގޮތުން ރޮނާލްޑޯ އަށް އަހަރަކު މުސާރައިގެ ގޮތުގައި 214 މިލިއަން ޑޮލަރަށްވުރެ ބޮޑު އަދަދެއް ލިބޭނެ އެވެ. ރޮނާލްޑޯގެ ސޮއި ހޯދުމަށްފަހު އަލް ނަސްރުން ބުނީ އެއީ އެ ކުލަބުގެ ތާރީޚު ބަދަލުކޮށްލި ޓްރާންސްފާއެއް ކަމަށެވެ. އެއީ އެކްލަބާއި, އެގައުމާއި, އެގައުމުގެ ކުރިމަގަށް ނުކުންނަން ތިބި ކުޅުންތެރިންނަށް ވެސް ހިތްވަރެއްކަމަށެވެ. ރޮނާލްޑޯ އަށް ފަހު ވެސް އަލް ނަސްރުން ބޭނުންވަނީ މަޝްހޫރު އެހެން ކުޅުންތެރިން އެ ކުލަބަށް ގެންނަން ކަމަށާއި، އޭގެ ތެރޭގައި ސާޖިއޯ ރާމޯސް ހިމެނޭ ކަމަށް ރިޕޯޓުތައް ބުނެ އެވެ.

ދެ އަހަރު ދުވަހުގެ އެއްބަސްވުމެއްގެ ދަށުން އަލް ނަސްރަށް ބަދަލުވި ރޮނާލްޑޯ އެންމެ ފަހުން ކުޅުނީ މެންޗެސްޓަރ ޔުނައިޓެޑަށެވެ. ނަމަވެސް އެ ކުލަބުގެ ވެރިންނާ މައްސަލަ ޖެހި، ކުލަބުން ރޮނާލްޑޯ ދޫކޮށްލީ އެވެ. މިއީ ރޮނާލްޑޯ ޔޫރަޕުން ބޭރުގެ ކުލަބަކާ ގުޅުނު ފުރަތަމަ ފަހަރެވެ. މީގެ ކުރިން ރޮނާލްޑޯ ވަނީ ޔޫރަޕުގެ ހަތަރު ކުލަބަށް ކުޅެފައެވެ. އޭގެ ތެރޭގައި ސްޕޯޓިން، މެންޗެސްޓަރ ޔުނައިޓެޑް، ރެއާލް މެޑްރިޑް، އަދި ޔުވެންޓަސް ހިމެނެއެވެ.