ވެރިކަމުގެ ނިޒާމް ބަދަލުކުރުމުގެ މަސައްކަތް މި ދައުރުގެ ތެރޭގައި ކުރަންޖެހޭ: ރައީސް ނަޝީދު

ވެރިކަމުގެ ނިޒާމް ބަދަލުކުރުމުގެ މަސައްކަތް މި ދައުރުގެ ތެރޭގައި ކުރަންޖެހޭ ކަމަށް, ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލިހުގެ ރައީސްކަންވެސް ކުރައްވަމުންގެންދަވާ ނަޝީދު އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުމެއްގައި ވާހަކަފުޅުދައްކަވަމުން ވިދާޅުވީ، ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުުކުރުމަކީ އަބަދުވެސް އެމްޑީޕީން ވަކާލާތުކުރަމުން އައި ކަމެއް ކަަމަށެވެ. ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކުރުމަށް ކުރަންޖެހޭ މަސައްކަތްތައް ކުރުމަށް އަދިވެސް ތައްޔާރަށް ހުންނެވިކަމަށާއި، އެކަމާގުޅިގެން ކުރަންޖެހޭ މަޝްވަރާތައް ކުރައްވާނެކަމަށް އެމަނިކުފާނު ވަނީ ވިދާޅުވެފައެވެ. ރައީސް ނަޝީދު ވިދާޅުވީ އެފަދަ މަޝްވަރާތަަކަށް އަބަދުވެސް ތައްޔާރަށް ހުންނެވި ކަމަށެވެ.

މީގެ އިތުރުން ކުރިއަށް އޮތް އެމްޑީޕީގެ ޕްރައިމަރީގައި ނާކާމިޔާބީއާ ކުަރިމަތިލައްވަން ޖެހިއްޖެނަމަ އެހާލަތުގައިވެސް ބަރުލަމާނީ ނިޒާމަކަށް ވެރިކަމުގެ ނިޒާމް ބަދަލުކުރަން މަސައްކަތް ކުރައްވާނަންތޯ ނޫސްވެރިޔަކު ދެންނެވުމުން ރަައީސް ނަޝީދު ވިދާޅުވީ، އެމަނިކުފާނު އަބަދުވެސް ތާއީދުކުރައްވަނީ ބަރުލަމާނީ ނިޒާމަކަށް ކަމަށެވެ. އެމަނިކުފާނު ވިދާޅުވީ ޕްރައިމަރީ އެމަނިކުފާނަށް ކާމިޔާބު ނުވެދާނެ ފަދަ ހާލަތެއް އޮތް ކަމަށް ގަބޫލުފުޅު ނުކުރައްވާކަމަށެވެ. އެހެންނަމަވެސް ބަރުލަމާނީ ނިޒާމުގެ މަޝްވަރާތައް ހުއްޓަވައިނުލައްވާނެކަމަށާއި މި ދައުރުގެ ތެރޭގައި އެ މަރުހަލާ ފެށެން ޖެހޭ ކަމަށް ވިދާޅުވިއެވެ.

ރައީސް ނަޝީދު ވަނީ، އެއީ 2018 ވަނަ އަހަރު އެމްޑީޕީން ރިޔާސީ އިންތިޚާބުގައި ވެފައިވާ ވައުދެއް ކަމަށް ވިދާޅުވާ ވާހަކަ ތަކުރާރުކުރައްވާފައެވެ. ރައީސް ނަޝީދު ވިދާޅުވީ މި ދައުރުގައި އަދިވެސް ބާކީ ދުވަސް އެބައޮތް ކަމަށާއި، އެ ދުވަސްތަކުގައި ވެރިކަމުގެ ނިޒާމް ބަދަލުވުމުގެ މަސައްކަތް ކުރަން ޖެހޭ ކަމަށެވެ.

ރައީސް ނަޝީދު މިފަދައިން ވިދާޅުވެފައިވާއިރު، ރައީސް ސާލިހު ވަނީ، މި ދައުރުގެ ތެރޭގައި ބަރުލަމާނީ ނިޒާމްގެ މަސައްކަތް ކުރެވޭނެ ގޮތެއް ނެތް ކަަމަށް ވިދާޅުވެފައެވެ. ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ރައީސް ވިދާޅުވީ، މި ސަރުކާރަކީ ކޯލިޝަން ސަރުކާރެއް ކަމަށާއި ސަރުކާރު ވެރިކަމަށް ގެނައުމަށް އެކުލަވާލި މެނިފެސްޓޯގައި ބަރުލަމާނީ ނިޒާމެއްގެ ވާހަކަ ހިމަނާފައި ނުވާނެ ކަމަށެވެ. އަދި ވެރިކަމުގެ ނިޒާމް ބަދަލުކުރެވޭނީ ކޯލިޝަންގެ މަޝްވަރާގެ މަތިން ކަމަށް ވާއިރު، އެ މަސައްކަތް މި ދައުރުގައި ނުކުރެވޭނެ ކަމަށްވެސް އެމަނިކުފާނު ވަނީ ވިދާޅުވެފައެވެ. އަދި ކުރިއަށް އޮތްތަނުގައިވެސް އެ ކަމާގުޅޭ މަސައްކަތްތައް ކުރާނަމަ އެކަން ކުރަން ޖެހޭނީ މަޝްވަރާގެ އުސޫލުތަކުގެ ދަށުން، ގާނޫނާއި ގަވާއިދުތައް ތަންދޭ ގޮތަށް ކަމަށް ރައީސް ވަނީ ވިދާޅުވެފައެވެ.