ރާއްޖޭގެ އުފެއްދުންތައް ރާއްޖެއިން ބޭރުގެ ބާޒާރަށް އެކްސްޕޯޓްކުރާ ފަރާތްތަކަށް ލުއިފަސޭހަތަކެއް ދިނުމުގެގޮތުން، އެކްސްޕޯޓް ކޮންޓެއިނަރުތަކުން ނަގާ އަގުތައް އާދީއްތަ ދުވަހުން ފެށިގެން ކުޑަކޮށްފިއެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ގެނައި މި ބަދަލަކީ ރާއްޖެއިން މުދާ އެކްސްޕޯޓްކުރާ ފަރާތްތަކަށް ވާދަވެރި އަގުތަކެއްގައި ބައިނަލްއަގުވާމީ ބާޒާރުގައި ދިވެހި އުފެއްދުންތައް ވިއްކުމުގެ މަގު ފަހިކޮށްދިނުމާއި، ރާއްޖޭގެ އެކްސްޕޯޓް ވިޔަފާރި އިތުރަށް ކުރިއަރުވައި، މި ވިޔަފާރީގައި ވާދަކުރާ ފަރާތްތަކަށް ލުއި ފަސޭހަތަކެއް ހޯދައިދިނުމުގެގޮތުން ގެނައި ބަދަލެއްކަމަށް އެ ކުންފުނިން ބުނެއެވެ.

މި ބަދަލާއެކު، މިހާރު ނަގަމުންދާ އަގުތައް ގާތްގަނޑަކަށް 75 އިންސައްތައަށް ކުޑަކުރެވިފައިވާކަމަށް އެމްޕީއެލްއިން ބުނެފައިވެއެވެ. އެގޮތުން 20 ފޫޓުގެ ކޮންޓެއިނަރަކުން މިހާރު ނަގަމުން އަންނަ 4،419.03 ރުފިޔާގެ ފީ 1،132.08 ރުފިޔާއަށް ކުޑަވާނެއެވެ. އަދި 40 ފޫޓުގެ ކޮންޓެއިނަރަކުން ނަގަމުންއައި 8،767.51 ރުފިޔާގެ ފީ 2،264.15 ރުފިޔާއަށް ކުޑަކުރެވިގެންދާނެ ކަމަށް އެމްޕީއެލްއިން ބުނެފައިވެއެވެ.

މި ބަދަލާ ގުޅޭގޮތުން އެމްޕީއެލްގެ ސީއީއޯ ޝާހިދު އަލި ވިދާޅުވީ، މި ބަދަލު ގެނެސްފައިވަނީ މިހާރު ނަގަމުންދާ އަގުތަކާމެދު އެކްސްޕޯޓަރުން މީގެ ކުރިންވެސް ކަންބޮޑުވުން ފާޅުކޮށްފައިވާތީ އެ ފަރާތްތަކަށް ލުޔެއް ދިނުމުގެ ގޮތުން ކަމަށެވެ.

އެކުންފުނީގެ އަމާޒަކީ އެކްސްޕޯޓަރުންނަށްވެސް ވިޔަފާރި ހިންގުމަށް ފަސޭހަ މަގުތަކެއް ކޮށައިދިނުން ކަމަށާއި، މާލޭ ކޮމަރޝަލް ހާބަރުގައި ދިމާވެފައިވާ ޖާގައިގެ ދަތިކަމާ ގުޅިގެން ކުރިމަތިވެފައިވާ ގޮންޖެހުންތަކާއެކުވެސް، އެމީހުންނަށް ދިމާވެފައިވާ ދަތިތައް ހައްލުކުރުމަށް މަސައްކަތް ކުރެވެމުންދާކަމަށް ވެސް ޝާހިދު ވިދާޅުވިއެވެ.