ސުއަރޭޒް، ބްރެޒިލްގެ ގްރެމިއޯ އަށް ސޮއިކޮށްފި

އުރުގުއޭގެ ފޯވާޑް ލުއިސް ސުއަރޭޒް ބްރެޒިލްގެ ގްރެމިއޯ އަށް ސޮއިކޮށްފި އެވެ.

އެ ކުލަބަށް އޭނާ ސޮއި ކުރީ ފްރީ އެޖެންޓެއްގެ ގޮތުގަ އެވެ. އޭގެ ކުރިން ސުއަރޭޒް ކުޅުނީ އޭނާގެ އެންމެ ފުރަތަމަ ކުލަބް ނަސިއޮނާލަށެވެ. އެއީ ޑިސެމްބަރު މަހު ޤަތަރުގައި ނިމުނު ފީފާ ވޯލްޑް ކަޕް މުބާރާތަށް ތައްޔާރުވުމަށެވެ. ވޯލްޑް ކަޕްގެ ކުރިން ސުއަރޭޒް ވަނީ އެ ކުލަބަށް ކުޅުން ހުއްޓާލަފަ އެވެ. އެއަށްފަހު އޭނާ ގްރެމިއޯ އަށް ގުޅުނީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. ސުއަރޭޒް އެ ކުލަބަށް ގުޅުނުކަން ގްރެމިއޯ އިން ވަނީ ރަސްމީކޮށް ހާމަކޮށްފަ އެވެ. ގްރެމިއޯ އަށް ސުއަރޭޒް ގުޅުނީ އެމްއެލްއެސް އަދި ސައުދީ އަރަބިޔާގެ ކުލަބުތަކުގެ ހުށަހެޅުންތަކެއް ވެސް އޭނާ އަށް ލިބިފައި ވަނިކޮށް ކަމަށް ރިޕޯޓުތައް ބުނެ އެވެ.

ނަސިއޮނާލުން ސީނިއާ ކެރިއަރު ފެށި ސުއަރޭޒް ވަނީ ޔޫރަޕުގެ ބޮޑެތި ކުލަބުތަކަށް ވެސް ކުޅެފަ އެވެ. އޭގެ ތެރޭގައި ޕްރިމިއާ ލީގުގެ ލިވަޕޫލް، ސްޕެނިޝް ލީގުގެ ބާސެލޯނާ، އެތުލެޓިކޯ މެޑްރިޑު ފަދަ ކުލަބުތައް ހިމެނެ އެވެ. އުމުރުން މިހާރު 35 އަހަރުވެފައިވާ ސުއަރޭޒް ވަނީ އޭނާގެ ކެރިއަރުގައި މިހާތަނަށް 22 ތައްޓެއް ކާމިޔާބުކޮށްފަ އެވެ. މިހާތަނަށް އެކި އެކި ކުލަބުތަކަށް ކުޅުނު ސުއަރޭޒް ވަނީ ޖުމުލަ 746 މެޗުން 460 ލަނޑު ޖަހާފަ އެވެ. އުރުގުއޭގެ ޤައުމީ ޓީމަށް އޭނާ ވަނީ 137 މެޗުން 68 ލަނޑު ޖަހާފަ އެވެ. ސުއަރޭޒް ވަނީ ޔޫރަޕުގެ ރަން ބޫޓު ވެސް ހޯދާފަ އެވެ.