ރިޔާސީ އިންތިޚާބަށް ރީ-ރަޖިސްޓްރީވުމަށް ޕޯޓަލްއެއް

ރިޔާސީ އިންތިޚާބަށް ރީ-ރަޖިސްޓްރީވުމަށް ޕޯޓަލް ހެދުމުގެ މަސައްކަތް ކުރަމުންދާ ކަމަށް އިލެކްޝަންސް ކޮމިޝަނުން ބުނެފިއެވެ.

ރާއްޖެއެމްވީއަށް މައުލޫމާތު ދެއްވަމުން އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް ވިދާޅުވީ ޕޯޓަލްގެ މަސައްކަތް ކުރަމުންދާއިރު ބައި-އިލެކްޝަންތަކުގައި މި ޕޯޓަލް ބޭނުންކޮށްފައި ވާކަމަށެވެ. ޕޯޓަލްގެ މަސައްކަތް އިތުރަށް ފުރިހަމަ ކުރުމަށް ބަޔަކާ ހަވާލުކޮށްފައިވާކަމަށާއި، ޕޯޓަލަށް ގެންނަންޖެހޭ ބަދަލުތައް ގެނެސް، ރައްޔިތުންނާ ހަމައަށް ފޯރުކޮށްދޭނީ އިތުބާރު އެއްޗެއްގެ ގޮތުގައި ކަމަށް ހަބީބް ވިދާޅުވިއެވެ. އަދި ބިޑަށް ހުޅުވާލައިގެން އޮޑިޓެއް ހަދަން ނިންމާފައިވާކަންވެސް ފާހަގަކުރެއްވިއެވެ.

ހަބީބް އިތުރަށް ވިދާޅުވީ، މެއި މަހުގެ ތެރޭގައި ރީ-ރަޖިސްޓްރޭޝަންގެ މަސައްކަތް ފެށޭނެކަމަށް ލަފާކުރައްވާ ކަމަށާއި އީސީގެ އައު އިމާރާތައް ވަނުމަށްފަހު ޓްރެއިނިންގ ފެށުމަށް ނިންމާފައިވާ ކަމަށެވެ.

ކޮންމެ ތަނެއްގައި ހުންނަ މީހަކަށްވެސް އަމިއްލައަށް ރަޖިސްޓްރީވުމުގެ ފުރުސަތު މި ޕޯޓަލްއިން ލިބިގެންދާނެއެވެ.

ރާއްޖެގައި ބާއްވާ ކޮންމެ އިންތިޚާބެއްގައިވެސް ވޯޓުލުމުގެ ހައްގު ލިބިގެންވާ ފަރާތްތަކަށް ރަޖިސްޓަރީވެފައިވާ ތަން ނޫން އެހެން ތަނެއްގައި ވޯޓުލުމަށްޓަކައި ރީ-ރަޖިސްޓަރ ވުމުގެ ފުރުސަތު ހުޅުވާލައެވެ. ކުރިން މިކަން އޮތީ ރީ-ރަޖިސްޓްރީ ވުމަށް ފޯމް ފުރުމަށްފަހު މާލޭގައި ނަމަ އިންތިޚާބާބެހޭ މައި މަރުކަޒަށް ހުށައަޅާގޮތަށެވެ. އަތޮޅުތަކުގައި ރަށު ކައުންސިލް އިދާރާތަކުންނާއި ސިޓީ ކައުންސިލްތަކަށް އެ ފޯމް ހުށަހަޅަންޖެހެއެވެ.

އަންނަ އަހަރު ބޭއްވުމަށް ހަމަޖެހިފައިވާ ރިޔާސީ އިންތިޚާބަށް އިލެކްޝަންސް ކޮމިޝަން (އީސީ)ން ވަގުތީ މުވައްޒަފުންވެސް ހޯދާފައިވެއެވެ. ރިޔާސީ އިންތިޚާބާ ގުޅިގެން ކޮމިޝަނުގެ އެކިއެކި މަސައްކަތްތަކަށް 11 މުވައްޒަފުން ބޭނުންވާކަމަށް އިލެކްޝަންސް ކޮމިޝަނުން ބުނެފައިވެއެވެ. ރިޔާސީ އިންތިޚާބުގައި ވޯޓުފޮށި ބަހައްޓާނީ 150ށްވުރެ ގިނަ މީހުން ވޯޓުލުމަށް ރަޖިސްޓްރީކުރާ ގައުމުތަކުގައި އެކަންޏެވެ.

ފޮރިން މިނިސްޓްރީއާއެކު މަޝްވަރާކޮށްގެން ދިވެހިން ގިނައިން އުޅޭ ގައުމުތައް ދެނެގަތުމުގެ މަސައްކަތް ކުރަމުންދާކަމަށް އީސީން މީގެ ކުރިން ބުނެފައިވެއެވެ. ކުރިން ވޯޓު ފޮށި ބަހައްޓާ ގައުމުތަކުގެ ތެރެއިން އިންޑިއާ، ލަންކާ، ސިންގަޕޫރު އަދި މެލޭޝިއާ ފަދަ ގައުމުތަކުގައިވެސް ވޯޓުފޮށި ބަހައްޓާނެއެވެ. ނަމަވެސް ވޯޓު ފޮށި ބަހައްޓާ ގައުމުތަކުގެ ޖުމުލަ އަދަދު އެނގޭނީ ރެޖިސްޓްރޭޝަންގެ މަރުހަލާ ނިމުމުންކަމަށް އީސީން ބުނެއެވެ.