ބެންފީކާ އަށް ކުޅެމުން އަންނަ އެންޒޯ ފެނާންޑޭޒްގެ ކުރިމަގާ މެދު ވާނެ ގޮތެއް ބުނަން ނޭނގޭ ކަމަށް އެ ޓީމުގެ ކޯޗު ރޮޖާ ޝްމިތު ބުނެފި އެވެ.
އޭނާ މިހެން ބުނީ އެންޒޯ ހޯދުމަށް ބައެއް ކުލަބުތަކުން ބޭނުންވާ ކަމަށް ރިޕޯޓުތައް ބުނެފައިވާ ވަގުތެއްގަ އެވެ. މިއަހަރުގެ ފީފާ ވޯލްޑް ކަޕް މުބާރާތުގައި އެންޒޯ ދެއްކި މޮޅު ކުޅުމުގެ ސަބަބުން އޭނާ ހޯދަން ކުލަބުތަކުން އަންނަނީ މަސައްކަތް ކުރަމުން ކަމަށް ވެސް ރިޕޯޓުތައް ބުނެ އެވެ. އެގޮތުން އޭނާ ހޯދުމުގައި އެންމެ ކުރީގައި އޮތީ ޕްރިމިއާ ލީގުގެ ޗެލްސީ ކަމަށް ރިޕޯޓުތައް ބުނެ އެވެ.
އެސްސީ ބްރަގާއާ ދެކޮޅަށް ކުޅުނު މެޗުގައި އެންޒޯ ވަނީ ކުޅެފަ އެވެ. ނަމަވެސް އެ މެޗުން ބެންފީކާ ބަލިވީ 3-0 އިންނެވެ. މެޗަށްފަހު ވާހަކަ ދައްކަމުން ޝްމިތު ބުނީ، ބެންފީކާ އިން ކުޅުނީ އެންޒޯގެ އެންމެ ފަހު މެޗުކަމާމެދު އެއްޗެއް ބުނަން އޭނާ އަށް ނޭނގޭ ކަމަށެވެ. މެޗުން ބަލިވި ނަމަވެސް އެންޒޯ މެޗުގައި މޮޅު ކުޅުމެއް ދެއްކިކަން އޭނާ ފާހަގަކުރި އެވެ. މީގެ އިތުރުން އޭނާ ބުނީ ފުޓުބޯޅައިގައި ބައެެއް ހާލަތްތަކުގައި ކަންތައް ވާނީ އެކި ގޮތްތަށް ކަމަށާއި، ނިންމުން ނިންމަން ޖެހޭނީ އެ ކުޅުންތެރިޔަކު ކަމަށެވެ. އޭނާ ބުނީ އެންޒޯއާ މެދު ކަންތައް ވާނެ ގޮތެއް ކުރިޔަށް އޮތް ހަފްތާތަކުގައި ބަލަން ޖެހޭ ކަމަށެވެ.
މިއަހަރުގެ މުބާރާތުގެ ތަށި އާޖެންޓީނާ އިން ހޯދުމުގައި އޭނާގެ ހިއްސާ ވެސް ބޮޑެވެ. އެންޒޯ ވަނީ މުބާރާތުގެ އެންމެ މޮޅު ޒުވާން ކުޅުންތެރިޔާގެ މަގާމު ވެސް ހޯދާފަ އެވެ.
