މިނިސްޓަރ ޝައުނާގެ ލަފަޔާއި އެކު ވެމްކޯ އިން މާލެތެރެ ސާފުކުރަން ޚާއްސަ އޮޕަރޭޝަން އެއް ފަށައިފި
30 ޑިސެމްބަރު 2022 | ހުކުރު 14:05އެ މަސައްކަތް އަލުން ވެމްކޯ އިން ފަށާފައި ވަނީ ހުކުރު ދުވަހު
މާލޭ މަގުމައްޗަށް ޖަމާކޮށްފައިހުރި ކުނި
މާލެ ސަރަހައްދުގެ މަގުތަކުގައި ކުނި ޖަމާވެ އާއްމުންގެ ޝަކުވާ އިންތިހާ އަށް ބޮޑުވެފައި ވަނިކޮށް ވެމްކޯ އިން މާލެ ސާފުކުރުމަށް ޚާއްސަ އޮޕަރޭޝަނެއް ފަށައިފިއެވެ.
މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޖް އެންޑް ޓެކްނޮލޮޖީ އާމިނަތު ޝައުނާގެ ލަފާގެ މަތިން އެ މަސައްކަތް ވެމްކޯ އިން ފަށާފައި ވަނީ ހުކުރު ދުވަހުއެވެ. އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު ވިދާޅުވީ ބައެއްގެ "އީގޯ" އަށް ވުރެ މާލޭ ރައްޔިތުންގެ ސިއްހަތު މާ މުހިންމު ކަމަށް މިނިސްޓަރ ޝައުނާ ދެކެވަޑައިގަންނަވާ ކަމަށެވެ. ވެމްކޯ އިން މާލޭގެ މަގުތަކުގައި ހުރި ކުނިތައް ނެގުމުގެ މަސައްކަތް ކުރަމުންދާކަން އެ ކުންފުނިންވެސް ވަނީ ހާމަކޮށްފައެވެ.
މާލޭގެ މަގުތަކާއި އާންމު ތަންތަނުގައި ހުންނަ ކުނި ނަގަން ވެމްކޯއާ އެކު ހަދާފައިވާ އެއްބަސްވުން އާ ނުކުރަން ސިޓީ ކައުންސިލުން ނިންމުމާއި އެކު މިދިޔަ ހޯމަ ދުވަހުން ފެށިގެން މަގުތަކުން ކުނި ނެގުން ވެމްކޯއިން ވަނީ ހުއްޓާލައިފަ އެވެ. އެއާއި އެކު މާލެ މަގުތަކުގައި ކުނި އިތުރުވެ އެކަން އާއްމުންނަށް ތަކުލީފަކަށް ވަނީ ވެފައެވެ.
ވެމްކޯ އިން މީގެ ކުރިން ބުނެފައި ވަނީ ސިޓީ ކައުންސިލަށް ކުނި ނެގުމުގެ ކަންކަން ކުރިއަށް ނުގެންދެވުމުން އެކަމުގެ ޝަކުވާ އާއްމުން އިންތިހާ އަށް ކުރަމުންދާ ކަަމަށެވެ. މާލެ އާއި ވިލިމާލޭގެ މަގުތަކާއި މައިޒާންތައް ސާފުކުރުމަށް ވެމްކޯއާ އެކު ވެފައިވާ އެއްބަސްވުން އާ ނުކުރަން ނިންމީ އެ ކުންފުނިން އެ ކަން ގަވާއިދުން ނުކުރާތީ ކަމަށް ސިޓީ ކައުންސިލުން ވަނީ ބުނެފައެވެ. ނަމަވެސް އެ މަސައްކަތް ވެމްކޯ އިން ކުރަމުން އައީ ވަރަށް ސަމާލުކަން ދީގެން ރަނގަޅަށް ކަަމަށް އެ ކުންފުނިން ބުނެއެވެ.
