ހިޔާ ސަރަހައްދުގެ މޮބައިލް ކަވަރޭޖް ރަނގަޅުކުރުމަށް ޓަވަރުތަކެއް ޖަހަނީ
ޓަވަރ 2 އަދި 3ގެ އިމާރާތުގެ މަތީގައި ސެލިއުލަރ ރޫފްޓޮޕް ޓަވަރުތަކެއް އިންސްޓޯލްކޮށް އޮޕަރޭޓް ކުރާނެ
އެޗްޑިސީއާއި ދިރާގާ ދެމެދު އެއްބަސްވުމުގައި ސޮއި ކުރަނީ
ހިޔާ ސަރަހައްދުގެ މޮބައިލް ކަވަރޭޖް ރަނގަޅުކުރުމަށް ޓަވަރުތަކެއް ޖަހަން ދިރާގާއެކު ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެއްބަސްވުމެއްގައި ސޮއިކޮށްފިއެވެ.
ބުރާސްފަތި ދުވަހު ސޮއިކުރި މި އެއްބަސްވުމުގެ ދަށުން ހިޔާ ފްލެޓުގެ ޓަވަރު 2 އަދި 3ގެ އިމާރާތުގެ މަތީގައި ސެލިއުލަރ ރޫފްޓޮޕް ޓަވަރުތަކެއް އިންސްޓޯލްކޮށް އޮޕަރޭޓް ކުރާނެއެވެ. މި ޓަވަރުތަކުގެ ސަބަބުން ހިޔާ ސަރަހައްދުގެ މޮބައިލް ކަވަރޭޖް މިހާރަށްވުރެ އިތުރަށް ރަނގަޅު ވެގެންދާނެ ކަމަށް އެޗްޑީސީން ބުންޏެވެ.
އެޗްޑީސީން ބުނީ ހިޔާ ސަރަހައްދުގައި ހުރި ހުރިހާ މައްސަލަތަކަށް އަވަސް ހައްލެއް ހޯދުމަށް އެ ސަރަހައްދުގައި ދިރިއުޅޭ ރައްޔިތުންނާ ގާތުން އެޗްޑީސީން ދަނީ މަސައްކަތްކުރަމުން ކަމަށެވެ. އެގޮތުން އެ ކުންފުނީގެ މެނޭޖިންގ ޑިރެކްޓަރ އަހުމަދު އާތިފު ހިޔާގައި ދިރިއުޅޭ ރައްޔިތުންނާއި ބައްދަލުކޮށް އެ ފަރާތްތަކުގެ ކަންބޮޑުވުންތައް އަޑުއަހާ އިތުރަށް ރަނގަޅުކުރެވިދާނެ ކަންކަން ބަލާފައިވާ ކަމަށާއި އެ ކޯޕަރޭޝަންގެ އަމާޒަކީ ހިޔާ ސަރަހައްދުގައި ދިރިއުޅޭ ފަރާތްތަކަށް އެންމެ އެދޭގޮތަށް ކަންކަން ނިންމާ ކުރިޔަށް ގެންދިއުން ކަމަށްވެސް ބުންޏެވެ.
ހިޔާ ފުލެޓު ސަރަހައްދާއި އަދި ހުޅުމާލޭގެ ދެވަނަ ފިޔަވަހީގެ މިނޫންވެސް ސަރަހައްދުތަކުގައި މޮބައިލް ކަވަރޭޖް ރަނގަޅުކޮށް އިތުރަށް ފުރިހަމަ ކުރުމުގެ ކަންކަން އެޗްޑީސީން ދަނީ ކުރަމުންނެވެ. އަދި ހިޔާ ސަރަހައްދުގައި މީހުން ދިރިއުޅެން ފެށުމުގެ ކުރިންވެސް އެޗްޑީސީން ވަނީ ހިޔާ ސަރަހައްދުގައި މުއާސަލާތީ ހިދުމަތްދޭ ހުރިހާ ފަރާތަކަށް ބޭނުން ކުރެވޭގޮތަށް ހަތަރު މުއާސަލާތީ ޓަވަރު ގާއިމުކޮށްފައެވެ. މި ޓަވަރުތައް މެދުވެރިކޮށް ދިރާގު އަދި އުރީދޫގެ މޮބައިލް ކަވަރޭޖް ހިދުމަތް މިހާރުވެސް އެ ސަރަހައްދުގައި ދަނީ ފޯރުކޮށްދެމުންނެވެ.
ހުޅުމާލޭގެ ދެވަނަ ފިޔަވަހީގައި މުއާސަލާތީ އިންފްރާސްޓްރަކްޗަރ ގާއިމު ކުރުމުގެ އެންމެހާ ކަންކަމަކީ އެޗްޑީސީގެ ޒިންމާތަކުގެ ތެރޭގައި ހިމެނޭ ކަންކަމެކެވެ. އެގޮތުން، މި ޑިސެމްބަރު މަހުގެ 13 ވަނަ ދުވަހު ކޮމިއުނިކޭޝަންސް އޮތޯރިޓީ އޮފް މޯލްޑިވްސްއިން ދޫކުރާ ޓެލެކޮމިއުނިކޭޝަން އިންފްރާސްޓްރަކްޗަރ ލައިސަންސް ވަނީ ރަސްމީކޮށް އެ ކުންފުންޏަށް ދީފައެވެ. އަދި ހުޅުމާލޭގައި މުއާސަލާތީ އިންފްރާސްޓްރަކްޗަރ ފުޅާކޮށް އިތުރަށް ހަރުދަނާ ކުރުމުގެ ގޮތުން ކުރަންޖެހޭ މަސައްކަތްތައް މިފަދަ ހިދުމަތްތައް ދޭ ފަރާތްތަކާއެކު އެޗްޑީސީން އަންނަނީ ކުރަމުންނެވެ.
އެޗްޑިސީން ބުނީ ހުޅުމާލެއަކީ ހުރިހާ ގޮތަކުންވެސް ރައްޔިތުންނަށް ލުއިފަސޭހަ ސިޓީ އަކަށް ހެދުމަށް ގިނަގުނަ މަސައްކަތްތަކެއް އަބަދުވެސް ކުރަމުން އަންނަ ކަމަށެވެ. އަދި ހުޅުމާލެއަކީ ރާއްޖޭގެ އެންމެ ފުރަތަމަ ސްމާޓް ސިޓީއަކަށް ހެދުމުގެ މަޝްރޫޢުގެ ދަށުން ހުޅުމާލޭގެ މުއާސަލާތީ ކަންކަން ހަރުދަނާ ކުރުމަކީ ކުންފުނީގެ އެއް އަމާޒު ކަމަށް ވެސް ބުންޏެވެ.
މުއާސަލާތީ ޓަވަރުތަކުގެ އިތުރުންވެސް ސްމާޓް ސިޓީއަކަށް ވާސިލުވުމަށް ބޭނުންވާ ޑިޖިޓަލް އިންފްރާސްޓްރަކްޗަރގެ މައިގަނޑު އެއް އަސާސް ކަމަށްވާ އޯޕަން އެކްސެސް ނެޓުވޯކެއް އެޗްޑީސީން ވަނީ ހުޅުމާލޭގައި ގާއިމުކޮށްވައެވެ. އަދި، ހިޔާ ފްލެޓުތައް، ސްޓެލްކޯ، އެމްއޭސީއެލް އަދި އެނޫންވެސް ހުޅުމާލޭގެ ދެވަނަ ފިޔަވަހީގައި ދިރިއުޅޭ ފަރާތްތަކަށް މި ވިއުގަ މެދުވެރިކޮށް، ދިރާގާއި އުރީދޫއާއި، މީޑިއާނެޓު އަދި އާރުއޯއެލްގެ ހިދުމަތްތައް ދަނީ ފޯރުކޮށްދެމުންނެވެ.
