ރާއްޖޭގެ އުފެއްދުންތައް ރާއްޖެއިން ބޭރުގެ ބާޒާރަށް އެކްސްޕޯޓްކުރާ ފަރާތްތަކަށް ލުއިފަސޭހަތަކެއް ދިނުމުގެގޮތުން، އެކްސްޕޯޓް ކޮންޓެއިނަރުތަކުން ނަގާ އަގުތައް 1 ޖެނުއަރީ 2023ން ފެށިގެން ކުޑަކުރުމަށް ނިންމާފައިވާކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް)އިން ބުނެފިއެވެ.

މި ބަދަލަކީ ރާއްޖެއިން މުދާ އެކްސްޕޯޓްކުރާ ފަރާތްތަކަށް ވާދަވެރި އަގުތަކެއްގައި ބައިނަލްއަގުވާމީ ބާޒާރުގައި ދިވެހި އުފެއްދުންތައް ވިއްކުމުގެ މަގު ފަހިކޮށްދިނުމާއި، ރާއްޖޭގެ އެކްސްޕޯޓް ވިޔަފާރި އިތުރަށް ކުރިއަރުވައި، މި ވިޔަފާރީގައި ވާދަކުރާ ފަރާތްތަކަށް ލުއި ފަސޭހަތަކެއް ހޯދައިދިނުމުގެގޮތުން ގެނައި ބަދަލެއްކަމަށް އެމްޕީއެލްއިން ބުނެފައިވެއެވެ.

މި ބަދަލާއެކު، މިހާރު ނަގަމުންދާ އަގުތައް ގާތްގަނޑަކަށް 75 އިންސައްތައަށް ކުޑަކުރެވިފައިވާކަމަށް އެމްޕީއެލްއިން ބުނެފައިވެއެވެ. މިގޮތުން 20 ފޫޓުގެ ކޮންޓެއިނަރަކުން މިހާރު ނަގަމުން އަންނަ 4،419.03 ރުފިޔާގެ ފީ 1،132.08 ރުފިޔާއަށް ކުޑަވާނެއެވެ. އަދި 40 ފޫޓުގެ ކޮންޓެއިނަރަކުން ނަގަމުންއައި 8،767.51 ރުފިޔާގެ ފީ 2،264.15 ރުފިޔާއަށް ކުޑަކުރެވިގެންދާނެ ކަމަށް އެމްޕީއެލްއިން ބުނެފައިވެއެވެ.

މި ބަދަލާ ގުޅޭގޮތުން އެކުންފުނީގެ ސީއީއޯ ޝާހިދު އަލި ވިދާޅުވީ، މި ބަދަލު ގެނެސްފައިވަނީ މިހާރު ނަގަމުންދާ އަގުތަކާމެދު އެކްސްޕޯޓަރުން މީގެ ކުރިންވެސް ކަންބޮޑުވުން ފާޅުކޮށްފައިވާތީ އެ ފަރާތްތަކަށް ލުޔެއް ދިނުމުގެ ގޮތުން ކަމަށެވެ. އެކުންފުނީގެ އަމާޒަކީ އެކްސްޕޯޓަރުންނަށްވެސް ވިޔަފާރި ހިންގުމަށް ފަސޭހަ މަގުތަކެއް ކޮށައިދިނުމަށް ކަމަށާއި، މާލޭ ކޮމަރޝަލް ހާބަރުގައި ދިމާވެފައިވާ ޖާގައިގެ ދަތިކަމާ ގުޅިގެން ކުރިމަތިވެފައިވާ ގޮންޖެހުންތަކާއެކުވެސް، އެމީހުންނަށް ދިމާވެފައިވާ ދަތިތައް ހައްލުކުރުމަށް މަސައްކަތް ކުރެވެމުންދާކަމަށް ޝާހިދު ވިދާޅުވިއެވެ.