ބާލްޑޭގެ އެއްބަސްވުން އައުކުރުމުގެ މަސައްކަތް ދަނީ ކުރިއަށް

ސްޕެއިންގެ ބާސެލޯނާ އަށް ކުޅެމުން އަންނަ ޒުވާން ޑިފެންޑަރު އަލެހަންދްރޯ ބާލްޑޭގެ އެއްބަސްވުން އައު ކުރުމުގެ މަސައްކަތް ކުރަމުން އަންނަ ކަމަށް އޭނާ ބުނެފި އެވެ.

އުމުރުން 19 އަހަރުގެ ޒުވާން ކުޅުންތެރިޔާ ބާސެލޯނާގެ ސީނިއާ ޓީމާ ގުޅުނީ 2021 ވަނަ އަހަރު އެވެ. ބާސެލޯނާގައި ބާލްޑޭ ފާހަގަކޮށްލެވޭ ކުޅުމެއް ދެއްކިއިރު، އޭނާ އަށް ސްޕެއިންގެ ޤައުމީ ޓީމުން ޖާގަ ލިބުނީ ވޯލްޑް ކަޕް ފެށެން ކުޑަތަން ވެފައި ވަނިކޮށެވެ. އެއީ ސްޕެއިންގެ ހޯސޭ ގާޔާ އަށް އަނިޔާވެ ނުކުޅެވޭތީ، އޭނާގެ ބަދަލުގަ އެވެ. ބާސެލޯނާގެ ކޯޗުކަމާ ޒަވީ ހެނާންޑޭޒް ހަވާލުވެ ވަނީ ބާލްޑޭ އަށް ގިނަ މެޗުތަކެއްގައި ކުޅުމުގެ ފުރުސަތު ވެސް ދީފަ އެވެ. ޒަވީ ބުނާ ގޮތުގައި ބާލްޑޭ އަކީ އެއް ފެންވަރެއްގައި ކުޅެވޭ، ބުންވަރު ހުރި، ހުނަރުވެރި ކުޅުންތެރިޔެކެވެ. ގިނަ މެޗުތަކެއްގައި އޭނާ ބާލްޑޭ އަށް ފުރުސަތު ދެނީ އެހެންވެ އެވެ.

ބާސެލޯނާއާއެކު ބާލްޑޭ ހަދާފައިވާ އެއްބަސްވުމުގެ މުއްދަތު ހަމަވާނީ 2024 ވަނަ އަހަރު އެވެ. އައު އެއްބަސްވުމެއްގެ ވާހަކަ ދައްކަމުން ބާލްޑޭ ބުނީ އޭނާގެ އެޖެންޓު މިހާރު އަންނަނީ އެ މަޝްވަރާތައް ކުރަމުން ކަމަށެވެ. އަދި އޭނާ އަބަދުވެސް ބޭނުންވަނީ ބާސެލޯނާގައި މަޑުކުރަން ކަމަށާއި، ނަމަވެސް އެއްވެސް މީހަކަށް މުސްތަޤުބަލުގައި ކަންތައް ހިނގާނެ ގޮތެއް ބުނެދޭން ނޭންގޭނެ ކަމަށެވެ.

ސްޕެއިންގެ މީޑިއާ ރިިޕޯޓުތައް ބުނާ ގޮތުގައި ބާލްޑޭގެ އެޖެންޓާއި ކުރެވެމުން އަންނަ މަޝްވަރާގެ ތެރެއިން ބާސެލޯނާ އަށް ވަނީ އެއްބަސްވުމަކަށް އާދެވިފަ އެވެ. އެއީ ބާލްޑޭގެ އެއްބަސްވުމުގެ މުއްދަތު އިތުރުކޮށް، އޭނާ ކުލަބުގައި ބަހައްޓާށެވެ. އެގޮތުން ބާސެލޯނާ އިން ބާލްޑޭ އަށް އިތުރު ފަސް އަަހަރުގެ އެއްބަސްވުމެއް ހުށަހަޅާނެ ކަމަށް ވެއެވެ. މީގެ އިތުރުން ބާލްޑޭގެ ރިލީސް ކްލޯސް ފީއާ މެދު ވެސް އެއްބަސްވުމަކަށް އާދެވިފައިވެއެވެ.