ކޯޓުގެ ޙުކުމަށް "ޙަރާމް ޙުކުމް" ކިޔާނަމަ، ކޯޓުގެ ޙުރުމަތް ކެނޑިކަމަށް ބަލައި ފިޔަވަޅު އެޅޭނެ
ޔާމީނުގެ މައްޗަށް އިއްވި 11 އަހަރުގެ ޙުކުމާއެކު، "ހަރާމް ހުކުމް"ގެ ނަމުގައި މުޒާހަރާ ކުރުމަށް ވަނީ ނިންމާފައި
ޕީޕީއެމް ސަޕޯޓަރުން ކްރިމިނަލް ކޯޓު ސަރަޙައްދަށް އެއްވެފައި
ވ އާރަށު ހިޔާނާތުގެ މައްސަލައިގައި ކުރީގެ ރައީސް އަބްދުﷲ ޔާމީނުގެ މައްޗަށް އިއްވާފައިވާ ޙުކުމަކީ ޙަރާމް ޙުކުމެއްކަމަށް އިދިކޮޅު ސިޔާސީ ޕާޓީގެ އިތުރުން، އިދިކޮޅު ފަރާތްތަކުން ގެންދަނީ ބުނަމުންނެވެ.
ކޯޓަކުން ނިންމާ ނިންމުމަކަށް އަމަލު ކުރުން ފަސްކުރުމަށް އެ ކޯޓަކުން، ނުވަތަ އެ މައްސަލައެއް އިސްތިއުނާފު ކުރާ ކޯޓަކުން ނާންގާހާ ހިނދަކު، ކޮންމެ ކޯޓެއްގެ ނިންމުމަކީ ދައުލަތުގެ 3 ބާރުންނާއި، މުސްތަޤިއްލު މަޤާމުތަކާއި ދައުލަތުގެ މަޤާމުތަކުގައި ތިއްބެވި ފަރާތްތަކުގެ އިތުރުން، ސަލާމަތީ ބާރުތަކާއި އެންމެހާ ރައްޔިތުންވެސް އެއަށް ތަބާވުން ލާޒިމު ނިންމުމެއްކަމަށް ދިވެހިރާއްޖޭގެ ކޯޓުތަކާ ބެހޭ ޤާނޫނުގެ 77 ވަނަ މާއްދާގައި ބަޔާންކޮށްފައިވެއެވެ.
އެހެންނަމަވެސް، ރައީސް އަބްދުﷲ ޔާމީނުގެ މައްޗަށް އިއްވި 11 އަހަރުގެ ޖަލު ޙުކުމާއެކު، "ހަރާމް ހުކުމް"ގެ ނަމުގައި އިދިކޮޅުން ހުރިހާ ރަށެއްގައި މުޒާހަރާ ކުރުމަށް ވަނީ ނިންމާފައެވެ.
އަދި ރައީސް ޔާމީނުގެ ސިޔާސަތުތައް ފަތުރުއްވާ ޓީވީ ޗެނަލްތަކުންވެސް ގެންދަނީ "ހަރާމް ހުކުމުގެ" ނަމުގައި، ކަވަރޭޖްތައް ގެނެސްދެމުންނެވެ.
އެކަމާ ގުޅިގެން ރާއްޖެއެމްވީން ސުވާލުކޮށްލުމުން ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ބުނީ، ޝަރުޢީ ކޯޓުތަކުގެ ޙުރުމަތް ކެނޑޭފަދަ ގޮތަށް އާންމު ތަންތަނުގައި ހިންގާ ހަރަކާތްތަކާއި، މީޑިއާތަކުގައި ގެނެސްދޭ މައުލޫމާތާއި ޝާއިޢުކުރާ ލިޔެކިޔުންތައް އެ ޑިޕާޓްމަންޓުން ކުށްވެރިކުރާ ކަމަށެވެ.
ޝަރުޢީ ކޯޓުތަކުގެ ޙުރުމަތް ކެނޑޭފަދަ ގޮތަށް އެއްވެސް ފަރާތަކުން ހިންގާ އަމަލުތަކަކީ އެއްވެސް ހާލެއްގައި ބަލައިގަނެވޭނެ އަމަލުތަކެއް ނޫންކަމަށްވެސް ޑީޖޭއޭއިން ބުނެއެވެ.
އޭގެ އިތުރުން، ޝަރުޢީ ކޯޓުތަކުގެ ޙުރުމަތް ކެނޑޭފަދަ ގޮތަށް މީޑިއާތަކުން މައުލޫމާތު ގެނެސްދޭނަމަ، އެ ޑިޕާޓްމަންޓްގެ ފަރާތުން އެފަދަ މައްސަލަތައް، މޯލްޑިވްސް މީޑިއާ ކައުންސިލް އަދި މޯލްޑިވްސް ބްރޯޑްކާސްޓިންގ ކޮމިޝަން ފަދަ ކަމާގުޅުންހުރި މުއައްސަސާތަކުގެ ސަމާލުކަމަށް ގެންނާނެކަމަށްވެސް ޑީޖޭއޭއިން ރާއްޖެއެމްވީއަށް މައުލޫމާތު ދެމުން ބުނެފައިވެއެވެ.
ޑީޖޭއޭއިން އިތުރަށް ބުނީ، ފަނޑިޔާރުންނާއި ކޯޓުތަކަށް އަމާޒުކޮށްގެން އާންމު ތަންތަނުގައި ހިންގާ ކޯޓުގެ ޙުރުމަތް ކެނޑޭފަދަ އަމަލުތައް ތަޙްޤީޤު ކޮށްދެއްވުން އެދި އެ ޑިޕާޓްމަންޓްގެ ފަރާތުން މޯލްޑިވްސް ޕޮލިސް ސަރވިސްއަށް ހުށަހަޅާނެ ކަމަށެވެ.
އަދި ފަނޑިޔާރުންނާއި ކޯޓުތަކަށް އަމާޒުކޮށްގެން ކޯޓުގެ ޙުރުމަށް ކެނޑޭފަދަ އަމަލުތައް ހިންގާނަމަ، 'ކޯޓުތަކުގެ ޙުރުމަތް ރައްކާތެރިކުރުމާބެހޭ ގަވާއިދު' ގެ ދަށުން، އެކަންކަމަށް ވަގުތުން ފިޔަވަޅު އަޅާނެކަންވެސް ޑީޖޭއޭއިން ފާހަގަ ކުރެއެވެ.
އެކަމާ ގުޅިގެން ރާއްޖެއެމްވީއާ ވާހަކަ ދައްކަވަމުން ކްރިމިނަލް ކޯޓުގެ މީޑިއާ އޮފިޝަލަކު ވިދާޅުވީ، އެއީ ކޯޓުން އެއްގޮތަކަށްވެސް ބަލައިގަންނަ އަދި ތަރުހީބުދޭ ކަމެއްވެސް ނޫން ކަމަށެވެ.
ކޯޓުތަކުގެ ހުކުމްތަކާމެދު ހިތްހަމަ ނުޖެހޭނަމަ އިސްތިއުނާފު ކުރުމުގެ ހައްގު މައްސަލައިގައި ހިމެނޭ ކޮންމެ ފަރާތަކަށްވެސް ލިބިގެންވާ ކަމަށް އޭނާ ވިދާޅުވިއެވެ.
އަދި އެކަމުގައި އަމަލުކުރާނެ ގޮތަކާމެދު، ކޯޓުން މިހާރު މަޝްވަރާ ކުރަމުންދާކަމަށް އޭނާ ވިދާޅުވިއެވެ.
އެކަމާ ގުޅިގެން ރާއްޖެއެމްވީއާ ވާހަކަ ދައްކަވަމުން އިލެކްޝަންސް ކޮމިޝަނުގެ މެމްބަރު އިސްމާއީލް ހަބީބް ވިދާޅުވީ، ސިޔާސީ ޕާޓީތަކުން ސިޔާސީ ޙަރަކާތްތައް ހިންގަންޖެހޭނީ ޤާނޫނުތަކާއި ޤަވާއިދުތަކާ ޚިލާފުނުވާ ގޮތުގެ މަތިން ކަމަށެވެ. އެފަދަ މައްސަަލައެއް ކޮމިޝަނަށް ހުށައެޅިއްޖެނަމަ، އެކަމެއް ކޮމިޝަނުން ބަލާނެކަމަށް އޭނާ ވިދާޅުވިއެވެ.
ރައީސް ޔާމީނުގެ މައްޗަށް ރ ފުއްގިރި ހިޔާނާތާއި ގުޅިގެން އުފުލާފައިވާ ދައުވާތަކާ ގުޅޭގޮތުންވެސް އިދިކޮޅު ފަރާތްތަކުން ދަނީ އެ މޭރުމުން ވާހަކަ ދައްކަމުންނެވެ.
އެހެންނަމަވެސް، ހިނގަމުންދާ ޝަރީއަތަކާ ގުޅިގެން ކޯޓުގެ ޙުރުމަތް ކެނޑޭ ފަދަ ކަމެއް ކޮށްފިނަމަ، ޤާނޫނު ނަންބަރު 12/2016 (ޖިނާއީ އިޖުރާއަތުގެ ޤާނޫނު) ގެ 170ވަނަ މާއްދާގެ (ހ) ގެ ދަށުން، 15 ދުވަހުގެ މުއްދަތަށް ޖަލަށް ލެވޭނެއެވެ.
ކޯޓުގެ ޙުރުމަތް ކެނޑުމާއި ގުޅޭ ކުށްތަކަށް ޖިނާއީ އިޖުރާއަތުގެ ޤާނޫނުގައި އޮންނަނީ 15 ދުވަހަށްވުރެ ދިގުނޫން މުއްދަތަކަށް ޖަލަށް ލުމެވެ.
