ރާއްޖެ ޓީވީއަކީ ހިތްވަރުގަދަ ޖަރނަލިސްޓުންތަކެއް މަސައްކަތް ކުރާ ޓީވީ ސްޓޭޝަނެއްކަމާ މެދު އެއްވެސް ދިވެހި ރައްޔިތަކު ޝައްކު ނުކުރާނެ: މަހުލޫފު
28 ޑިސެމްބަރު 2022 | ބުދަ 02:19ރާއްޖެޓީވީ އަކީ އެ ޓީވީއެއްގެ ނަން ބުނުމުން އިތުރު ތަފްސީލަކަށް ބޭނުން ނުވާ ޓީވީ ސްޓޭޝަނެއްކަން ފާހަގަކުރެއްވި
ޔޫތު މިނިސްޓަރު އަހުމަދު މަހުލޫފު
ރާއްޖެ ޓީވީއަކީ ހިތްވަރުގަދަ ޖަރނަލިސްޓުންތަކެއް މަސައްކަތް ކުރާ ޓީވީ ސްޓޭޝަނެއްކަމާ މެދު އެއްވެސް ދިވެހި ރައްޔިތަކު ޝައްކު ނުކުރާނެ ކަމަށް ޔޫތު މިނިސްޓަރު އަހުމަދު މަހުލޫފު ވިދާޅުވެއްޖެއެވެ.
މިނިސްޓަރު މަހުލޫފު މިފަދައިން ވިދާޅުވީ ރާއްޖެ ޓީވީގެ 12 ވަނަ އަހަރީ ދުވަހާ ގުޅިގެން އަންގާރަ ދުވަހުގެ ރޭ ބޭއްވި ސްޓާފް އެވޯޑު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ. އެގޮތުން، ރާއްޖެ ޓީވީއާއެކު ވަރަށް ގާތުން މަސައްކަތް ކުރެވިފައިވާ ކަމަށާއި ރާއްޖެޓީވީ އަކީ އެ ޓީވީއެއްގެ ނަން ބުނުމުން އިތުރު ތަފްސީލަކަށް ބޭނުން ނުވާ ޓީވީ ސްޓޭޝަނެއްގެ ގޮތުގައި އޭނާ ފާހަގަކުރެއްވިއެވެ.
މަހުލޫފު ވިދާޅުވީ ޔޫތު މިނިސްޓްރީއާއެކުގައި ރާއްޖެޓީވީން ކުރި މަސައްކަތްތަކަކީ ވެސް ވަރަށް ކާމިޔާބު މަސައްކަތްތަކެއް ކަމަށެވެ. އެގޮތުން، މިހާތަނަށް ރާއްޖޭގައި ބޭއްވުނު އެންމެ ބޮޑު އަދި އެންމެ ކާމިޔާބު އިވެންޓު ކަމުގައިވާ މޯލްޑިވްސް ސްޕޯޓްސް އެވޯޑްސްއަކީ ވެސް ރާއްޖެޓީވީއާއި ޔޫތު މިނިސްޓްރީއާ ގުޅިގެން ކުރިއަށްގެންދިޔަ މަސައްކަތެއްކަން އޭނާ ފާހަގަކުުރެއްވިއެވެ. މި އިވެންޓް 50 މިލިއަނަށްވުރެ ގިނަ މީހުންނާ ހަމައަށް ފޯރުކޮށްދެވުނު ކަން ވެސް މިނިސްޓަރު ފާހަގަކުރެއްވިއެވެ.
ރާއްޖެ ޓިވީއާއެކު ކުރާ މަސައްކަތްތައް ކާމިޔާބުކަން ފާހަގަކުރައްވައި ކައިރި މުސްތަގުބަލެއްގައި ވަރަށް ތަފާތު، އަދި ވަރަށް ބޮޑު ކަމަކަށް ރާއްޖެޓީވީއާއެކު މަސައްކަތް ކުރުމަށް ތައްޔާރުވަމުން އަންނަކަމަށް މިނިސްޓަރު ވިދާޅުވިއެވެ.
ރާއްޖެ ޓީވީގެ މަސައްކަތްތައް ރައްޔިތުންނާ ހަމައަށް ފޯރުކޮށްދީ ޚިދުމަތްތައް ފުރިހަމައަށް ގެނެސްދިނުމަށް ޗެއަރމަން އަކްރަމް ކަމާލުއްދީން އާއި މެނޭޖިންގ ޑިރެކްޓަރު އަހުމަދު ސަލީމް އަދި އެހެނިހެން ވެރިންނާއި މުވައްޒަފުން ކުރަމުން އަންނަ މަސައްކަތް ފާހަގަކުރައްވައި މިނިސްޓަރު މަހުލޫފު ވަނީ އެ ފަރާތްތަކަށް ޝުކުރު އަދާކުރައްވާފައެވެ.
