ފްރާންސްގެ ޕެރިސް ސެއިންޓް ޖާމަން (ޕީއެސްޖީ)ގެ ފަރިތަކުރުންތަކަށް އާޖެންޓީނާގެ ކެޕްޓަން ލިއޮނަލް މެސީ ގުޅޭނެ ކަމަށް އެ ޓީމުގެ ކޯޗު ކްރިސްޓޮފާ ގަލްޓިއޭ ބުނެފި އެވެ.

ގަލްޓިއޭ މިހެން ބުނީ ވޯލްޑް ކަޕަށްފަހު ފްރާންސް ލީގުގައި ޕީއެސްޖީން ބުދަ ދުވަހުގެ ރޭ ކުޅޭ މެޗުގެ ކުރިން ވާހަކަ ދައްކަމުންނެވެ. އެ މެޗުގައި މެސީ ނުފެންނާނެ އެވެ. މިވަގުތު މެސީ ހުރީ އޭނާގެ އާއިލާއާއެކު ޗުއްޓީގަ އެވެ. އެއީ ޤަތަރުގައި ނިމުނު ފީފާ ވޯލްޑް ކަޕް މުބާރާތަށްފަހު ރެސްޓެއް ކުރުމަށެވެ. ގަލްޓިއޭ ބުނީ ޕީއެސްޖީން ވެސް ބޭނުންވަނީ ވޯލްޑް ކަޕް ކާމިޔާބު ކުރުމަށްފަހު މެސީ އަރާމު ކުރުމަށްފަހު، ޓީމާ ގުޅެން ކަމަށެވެ. އެގޮތުން ޖެނުއަރީ އެއް ވަނަ ދުވަހާ ހަމަ އަށް މެސީ ޓީމާ ދުރުގައި ހުންނާނެ ކަމަށެވެ. ގަލްޓިއޭ ބުނީ އޭނާ އާއި މުޅި ޓީމުން ވެސް ބޭނުންވަނީ މެސީ އޭނާގެ އެންމެ ރަނގަޅު ފޯމުގައި ކުޅެން ކަމަށާއި، ވޯލްޑް ކަޕަށްފަހު މެސީގެ ފަރާތުން އާދަޔާ ޚިލާފު ކުޅުމެއް ފެންނާނެ ކަމަށް އުންމީދު ކުރާ ކަމަށެވެ.

ވޯލްޑް ކަޕްގެ ފައިނަލަށްފަހު ކީލިއަން އެމްބާޕޭ ވަނީ ޕީއެސްޖީގެ ފަރިތަކުރުންތަކާ ގުޅިފަ އެވެ. ގަލްޓިއޭ ބުނީ އެމްބާޕޭ ޓީމާ ގުޅުމަކީ ވެސް ބޮޑު އުފަލެއް ކަމަށާއި، ރެސްޓެއް ނަގަން އެމްބާޕޭ ބޭނުންނުވީ ކަމަށެވެ. އަދި ބްރޭކަކަށްފަހު ލީގު އަލުން ފަށާއިރު، ޕީއެސްޖީން ބޭނުންވަނީ ކުޅުންތެރިން އެ ކުޅުންތެރިންގެ އެންމެ ރަނގަޅު ފޯމުގައި ފެންނަން ކަމަށެވެ. އޭނާ ބުނީ ޓީމާ ގުޅި އެމްބާޕޭ ވެސް އަންނަނީ ފަރިތަކުރުންތަކުގައި ބައިވެރިވަމުން ކަމަށެވެ. އަދި ޕީއެސްޖީން މި ސީޒަނަށް ކަނޑައެޅި ޓާގެޓުތަކެއް އޮންނާނެ ކަމަށާއި، މަސައްކަތް ބައްޓަން ކުރަނީ އެކަންކަން ހާސިލުކުރުމަށް ކަމަށެވެ.

ފްރާންސް ލީގުގައި ބުދަ ދުވަހުގެ ރޭ ރާއްޖެ ގަޑިން ދަންވަރު އެކެއް ޖާހައިރު ޕީއެސްޖީ ނުކުންނާނީ، ސްޓްރަސްބާގާ ދެކޮޅަށެވެ.