ކޮޅުފުއްޓަށް ދިމާވެފައިވާ ބޯހިޔާވަހިކަމުގެ ދަތިކަމަށް ވަރަށް އަވަހަށް ޙައްލު ހޯދާނަން: ރައީސް
ހައުސިންގ މަޝްރޫޢު އެހެން ބަޔަކާ ޙަވާލުކުރުމުގެ މަސައްކަތް މިހާރު އެބަ ކުރިއަށްދޭ
އެއްބައިވަންތަކަމުގެ ދުވަސް ފާހަގަކުރުމަށް ކޮޅުފުށީގައި ހޯމަ ދުވަހުގެ ހެނދުނު ބޭއްވި ޖަލްސާގައި ރައީސް ވާހަކަފުޅުދައްކަވަނީ
މ ކޮޅުފުއްޓަށް ދިމާވެފައިވާ ބޯހިޔާވަހިކަމުގެ ދަތިކަމަށް ވަރަށް އަވަހަށް ޙައްލު ހޯދަވައިދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
މިއަހަރުގެ އެއްބައިވަންތަކަމުގެ ދުވަސް ފާހަގަކުރުމަށް ކޮޅުފުށީގައި ހޯމަ ދުވަހުގެ ހެނދުނު ބޭއްވި ޖަލްސާގައި ވާހަކަފުޅުދައްކަވަމުން ރައީސް ވިދާޅުވީ، ރައީސްކަމުގެ މަޤާމުގައި މިހާތަނަށް ހޭދަކުރެއްވި 1500ށް ވުރެ ގިނަ ދުވަހުގެ ތެރެއިން ކޮންމެ ދުވަހަކީ، ދިވެހި ރައްޔިތުންގެ އެއްބައިވަންތަކަން ދެމެހެއްޓުމަށް މަސައްކަތްކުރެއްވި ދުވަހެއްކަމަށެވެ.
ރައްޔިތުންނަށް ޚިދުމަތް ކުރައްވަން ނުކުންނެވިއިރު އެމަނިކުފާނުގެ ކުރިފުޅުމަތީގައި އޮތް އެންމެބޮޑު އެއްކަމަކީވެސް، ހަމަޖެހުމާއި ޞުލްޙަޔާއި އެއްބައިވަންތަކަން ގެއްލި، ބައިބައިވެފައި އޮތް އޮތުމަށް ޙައްލު ގެނައުންކަމަށް ރައީސް ވިދާޅުވިއެވެ. އެގޮތުން ސިޔާސީ ބޭނުންތަކަށްޓަކައި ވަކި ބަޔަކު ގަސްދުގައި ހަމަޖެހުން ނަގާލަމުން ގޮސްފައިވާކަން ރައީސްގެ ވާހަކަފުޅުގައި ފާހަގަ ކުރެއްވިއެވެ.
ބޯފެނާއި ނަރުދަމާ ނިޒާމުގެ މަޝްރޫޢު މި ސަރުކާރުން ފެށީ ރާއްޖޭގައި މީހުން ދިރިއުޅޭ ހުރިހާ ރަށެއްގައި، އެ ޚިދުމަތް ޤާއިމުކޮށްދޭންކަމަށް ރައީސް ވިދާޅުވިއެވެ.
އޭގެ އިތުރުން، ލަފާފުރުމުގެ މައްސަލަ ޙައްލުކުރުމަށް ބަނދަރުތައް ހަދަނީވެސް، މުޅި ރާއްޖެއަށް އަމާޒުކޮށްގެންކަން ފާހަގަ ކުރައްވައި ރައީސް އިތުރަށް ވިދާޅުވީ، އަތޮޅުތަކުގައި ދަތުރުފަތުރުގެ ޚިދުމަތް ފުރިހަމަކުރަމުން އަންނަނީވެސް މުޅި ރާއްޖޭގައި އެ ޚިދުމަތް ދޭން ކަމަށެވެ.
މ ކޮޅުފުއްޓާއި އެ އަތޮޅުގެ ހުރިހާ ރަށެއްގައިވެސް، އެ ޚިދުމަތްތައް ފުރިހަމަކުރުމުގެ މަޝްރޫޢުތައް މިހާރު ކުރިއަށްދާކަމަށް ރައީސް ވިދާޅުވިއެވެ.
ރައީސް ވަނީ އެ ރަށަކީ ކުރީގައި އޮތް ކޮޅުފުށްޓަށް ބަދަލުކުރުމަށްޓަކައި އަދި އެއަށްވުރެ ރަނގަޅަށް ޚިދުމަތްތައް ފޯރުކޮށްދިނުމަށްޓަކައި ކުރެވެންހުރި ހުރިހާ ކަމެއް އެ ރަށަށް ކޮށްދެއްވާނެކަމަށްވެސް ވިދާޅުވެފައެވެ.
ރައީސް އިތުރަށް ވިދާޅުވީ، އެ ރަށުގައި ޤާއިމުކުރާ 100 ހައުސިންގ ޔުނިޓުގެ މަސައްކަތްވެސް، މިދިޔަ މަހު މެދުކަނޑާލަންް ޖެހުނީ، މަސައްކަތް ހަވާލުކުރި ފަރާތުން އެކަމުގައި ކުރިއަށް ނުދެވިގެން ކޮންޓްރެކްޓް ބާޠިލްކުރަން ޖެހުމުން ކަމަށެވެ.
އެހެން ނަމަވެސް، އެ މަޝްރޫޢު އެހެން ބަޔަކާ ޙަވާލުކުރުމުގެ މަސައްކަތް މިހާރު އެބަ ކުރިއަށްދާކަމަށް ރައީސް ވިދާޅުވިއެވެ.
އަދި ލަސްތަކެއްނުވެ އެ މަސައްކަތް ފަށައި، އެ ރަށަށް ބޭނުންވެފައިވާ ބޯހިޔާވަހިކަމުގެ ދަތިކަމަށް ވަރަށް އަވަހަށް ޙައްލެއް ގެނެސްދެއްވާނެކަން ރައީސްގެ ވާހަކަފުޅުގައި ފާހަގަ ކުރެއްވިއެވެ.
ރައީސް ވިދާޅުވީ، ސަރުކާރުން މަސައްކަތް ކުރަމުން ދަނީ އަސާސީ ހުރިހާ ޚިދުމަތެއް، ރާއްޖޭގެ އެކި ރަށްރަށުގައި ދިރިއުޅޭ ހުރިހާ ރައްޔިތުންނަށް ތަފާތުކުރުމެއްނެތި ފޯރުކޮށްދިނުމަށް ކަމަށެވެ.
