ވޯލްޑްކަޕްގައި ޤައުމީ ޓީމުން ދެއްކި ގަދަ ކުޅުމާއެކު މޮރޮކޯގެ ޒަމާންވީ އޮޑިވެރިންނަށް އުފާ ފާގަތިކަން

މަޣްރިބްކަރައިގެ ވެރިކަން ކުރާ ރިބާތުއާއި ސަލާ ސިޓީއާ ބައިވާނެހެން ދެމިގެންދާ އަބޫރަޤްރަޤް ކޯރުގެ އެއް އައްސޭރިފަށުން އަނެއް އައްސޭރިފަށަށް ފަސެންޖަރުން ނޫކުލައިގެ ލަކުޑި ބޯޓުފަހަރު ދުއްވަމުން ދާ މަންޒަރަކީ އެ ސަރަޙައްދުން އާންމުކޮށް ފެންނަ، ހިތްގައިމު މަންޒަރެކެވެ. އެކަން އެގޮތަށް ކުރަމުން ދާތާ އެތައް ޒަމާނެއް ވެފައިވާ ކަމެކެވެ.

އޮޑިވެރިން ބުނާ ގޮތުގައި މި ޘަޤާފަތް ދެމެހެއްޓުމަކީ އެމީހުންނަށް ލިބޭ ފަޚްރެކެވެ. އަބޫރަޤްރަޤް ކޯރުގެ އެއް ފަރާތުން އަނެއް ފަރާތަށް، ބޯޓުގައި ކުރާ ދަތުރަކީ، ޒަމާނީ ދަތުރުފަތުރުގެ ވަޞީލަތްތަކާއި ބުރިޖިތަކުގެ ލުއިފަސޭހަކަން ލިބުމުގެ ކުރިންވެސް ދަތުރުފަތުރުކޮށް އުޅުނު އުޅުނުމުގެ ހަނދާން އާ ކޮށްދޭ ދަތުރެއް ކަމަށް އޮޑިވެރިން ސިފަ ކުރެއެވެ.

އަބޫރަޤްރަޤް ކޯރުގެ އެއް ފަރާތުން އަނެއް ފަރާތަށް މީހުން އުފުލުމުގައި އުޅޭ އެކަކީ، ޢުމުރުން 53 އަހަރުގެ އޮޑިވެރިއެއް ކަމަށް ވާ މުޙައްމަދު އަލް-ޔަޛީނީއެވެ. އޭނާ އެކަމުގައި އުޅެނީ ކުޑަދުވަހުއްސުރެ ފެށިގެންނެވެ.

ނޫކުލައިގެ ލަކުޑި ބޯޓުފަހަރުގައި ކޯރު ހުރަސްކުރުމަށް އާންމު ގޮތެއްގައި ޑިމާންޑް ކުރަނީ ފަތުރުވެރިންނެވެ. އެއީ ކައިރީގައިވާ ޒަމާންވީ އާޘާރުތައް ބަލާލުމުގެ ދަތުރެއްގެ ބޭނުމުގައެވެ. ފަތުރުވެރިންގެ އިތުރުން، ކޮންމެ ދުވަހަކުވެސް ޤަވައިދުން ބޯޓުގެ ޚިދުމަތް ހޯދާ، އިޚްލާޞްތެރި ކަސްޓަމަރުން އުޅެއެވެ.

މި ހިތްގައިމު ދަތުރުގެ ކުރިމަގު ވަނީ ބަނަވެފައެވެ. ކޯރުގެ އައްސޭރިފަށުގެ ސަރަޙައްދުގައި އުމްރާނީ ބިނާވެށީގެ މަޝްރޫޢުތައް އިތުރު ވަމުން ދާ ދިއުމުގެ ސަބަބުންނެވެ. އެކަމުގެ އަސަރު، އަބޫރަޤްރަޤް ކޯރުގެ ސަތަޙައަށްވެސް ދަނީ ފޯރަމުންނެވެ.

އުތުރު އެފްރިކާ ސަރަޙައްދަށް ނިސްބަތްވާ މޮރޮކޯ ނުވަތަ ޒަމާނުއްސުރެ ދިވެހިން ކިއާ އުޅޭ ގޮތުންނަމަ މަޣްރިބް ކަރައަކީ ފަތުރުވެރިންގެ މެދުގައި މަޤްބޫލު މަންޒިލެކެވެ. ވަކިން ހާއްސަކޮށް، ދާދި ފަހުން ޤަޠަރުގައި ނިންމާލި 22 ވަނަ ފީފާ ވޯލްޑްކަޕް ފުޓުބޯޅަ މުބާރާތުގައި މޮރޮކޯގެ ޤައުމީ ޓީމުން ދެއްކި އާދަޔާ ޚިލާފު، ވަރުގަދަ ކުޅުމާއެކު، ގިނަ ބައެއްގެ ސަމާލުކަން، މި ދުވަސްވަރު ވަނީ މޮރޮކޯއަށް އަމާޒުވެފައެވެ.

މޮރޮކޯއަކީ މުއްސަނދި ތާރީޚަކާއި ޘަޤާފަތެއްގެ އިތުރު ޤުދުރަތީ ޖިއޮގްރަފީގެ ހިތްގައިމުކަންވެސް ލިބިފައިވާ މަންޒިލެކެވެ.