ރަޝިއާއާއި މޮރޮކޯއަށް ނޮން-ރެޒިޑެންޓް ސަފީރުން އައްޔަނުކުރަން ރައީސް ހުށަހެޅުއްވި ދެ ބޭފުޅުންނަށް މަޖިލީހުން ރުހުން ދީފި

ރަޝިއަން ފެޑަރޭޝަން އަދި ކިންގްޑަމް އޮފް މޮރޮކޯއަށް ދިވެހިރާއްޖެއިން ކަނޑައަޅުއްވާ ނޮން-ރެޒިޑެންޓް ސަފީރުކަމަށް އައްޔަނުކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައްޔިތުންގެ މަޖިލީހަށް ނަން ހުށަހެޅުއްވި ދެބޭފުޅުންނަށް ރައްޔިތުންގެ މަޖިލީހުން ރުހުން ދީފިއެވެ.

ހޯމަ ދުވަހުގެ ރައްޔިތުން މަޖިލީހުގެ ޖަލްސާގައި ވަނީ ވޯޓަށް އަހާފައެވެ.

އެގޮތުން ތުރުކީއަށް ރާއްޖެއިން ކަނޑައަޅުއްވާފައިވާ ސަފީރު، ޗީފް އޮފް ޑިފެންސް ފޯސްގެ މަގާމުގައި ކުރިން ހުންނެވި ގ.ކަނޑިތޮޅިއާގެ ލެފްޓިނެންޓް ޖެނެރަލް (ރިޓަޔާޑް) އަބްދުއްރަހީމް އަބްދުއްލަތީފް، ރަޝިއަން ފެޑަރޭޝަން ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށް ފެންނަ ކަމަށް 65 މެންބަރުން ވަނީ ވޯޓު ދެއްވާފައެވެ.

މީގެ އިތުރުން ސައުދީ އަރަބިއްޔާއަށް ރާއްޖެއިން ކަނޑައަޅުއްވާފައިވާ ސަފީރު، މ.ވެއްސައިޑް އަހުމަދު ސަރީރު، ކިންގްޑަމް އޮފް މޮރޮކޯއަށް ރާއްޖެއިން ކަނޑައަޅާ ނޮން-ރެޒިޑެންޓް ސަފީރުކަމަށް އައްޔަނުކުރުމަށް 64 މެންބަރުން ވަނީ ވޯޓު ދެއްވާފައެވެ.

އަބްދުއްރަހީމް އަބްދުއްލަތީފް ސިފައިންގެ ޚިދުމަތާ ދުރަށް ވަޑައިގެންފައި ވަނީ 39 އަހަރުގެ ޚިދުމަތަށްފަހު އުމުރުފުޅުން 60 އަހަރުވުމުންނެވެ. އަދި ސަރީރު ވަނީ މީގެ ކުރިންރާއްޖޭގެ ފޮރިން ދާއިރާގެ އެކި މަގާމުތައް ފުރުއްވާފައެވެ. އޭނާ ވަނީ ފޮރިން އެފެއާޒް އެންޑް ޓްރޭޑް ދާއިރާއިން މާސްޓާސް ޑިގްރީ ހާސިލްކުރައްވާފައެވެ.