އެމްޑީޕީ ރިޔާސީ ޕްރައިމަރީ ކޮމިޓީ އެކުލަވާލައިފި
ރިޔާސީ ޕްރައިމަރީ އިންތިޚާބު ކޮމިޓީއަށް ފަސް މެންބަރުން ވަނީ އައްޔަނުކޮށްފައި
އެމްޑީޕީ ޤައުމީ މަޖިލީހުގެ ޖަލްސާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން އަންނަ އަހަރު ބާއްވަން ތައްޔާރުވަމުން އަންނަ ރިޔާސީ ޕްރައިމަރީއަށް ތައްޔާރުވުމުގެ ގޮތުން އެކަމަށް ހާއްސަ ކޮމިޓީ އެކުލަވާލައިފިއެވެ.
މި ކޮމިޓީ އެކުލަވާލާފައިވަނީ ހޯމަ ދުވަހުގެ ރޭ ތާޖުއްދީން ސްކޫލުގައި ބޭއްވި އެމްޑީޕީގެ ޤައުމީ މަޖިލީހުގެ ޖަލްސާގައެވެ. މި ޖަލްސާގައި ކޮމިޓީއަށް ފަސް މެންބަރުން ވަނީ އައްޔަނުކޮށްފައެވެ.
އެމްޑީޕީގެ ހިންގާ ގަވާއިދުގެ ހަވަނަ މާއްދާގެ (ހ) ގެ ދަށުން އެކުލަވައިލި މި ކޮމިޓީއަށް ހޮވިފައިވަނީ އެ ޕާޓީގެ ޑެޕިއުޓީ ޗެއަރޕާސަން އިބްރާހިމް ވަހީދު (އިބުރޭ) އާއި ކުރީގެ ސެކްރެޓަރީ ޖެނެރަލް އަދި މިހާރު އެ ޕާޓީގެ ތަރުޖަމާނު އަނަސް އަބްދުއްސައްތާރު އާއި މަތި އުތުރު ޕްރޮވިންސްގެ ރައީސް އަކްރަމް ކަމާލުއްދީން އާއި އެ ޕާޓީގެ ޤާނޫނީ މަޖިލީހުގެ ކުރީގެ މެންބަރު އަހުމަދު އަބްދުﷲ އަފީފް އަދި ކެނދިކުޅުދޫ ދާއިރާގެ ރައީސް މުޙައްމަދު އީމާންއެވެ.
މި ފަސް ބޭފުޅުންގެ އިތުރުންވެސް އިތުރު ނަންތަކެއް ކޮމިޓީއަށް ހުށަހެޅުމަށް ބައެއް މެންބަރުން ވަނީ ޤައުމީ މަޖިލީހުގެ ޖަލްސާގައި ހުށަހަޅައިފައެވެ. ނަމަވެސް ޗެއަރޕާސަން ފައްޔާޒް އިސްމާއިލް ވިދާޅުވީ އެގޮތަށް އެކަން ނުކުރެވޭނެ ކަމަށެެވެ. އެއާއެކު ބައެއް މެންބަރުން ވަނީ ޖަލްސާ ދޫކޮށް ވަޑައިގަންނަވާފައެވެ.
އެމްޑީޕީގެ ރިޔާސީ ޕްރައިމަރީގެ ތައްޔާރީތައް ވަމުން އަންނައިރު އެ ޕާޓީން ޕްރައިމަރީގައި ވާދަކުރަން ބޭނުންވާ ކެންޑިޑޭޓުންނަށް ހުޅުވާލި ފުރުސަތު ވަނީ ހަމަވެފައެވެ. މުއްދަތު ހަމަވިއިރު ފޯމު ހުށަހެޅުއްވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު އާއި އެމްޑީޕީގެ ރައީސް، ރައީސް މުޙައްމަދު ނަޝީދުއެވެ.
ރިޔާސީ ޓިކެޓަށް ވާދަކުރާ އިންތިޚާބު ބޭއްވުމަށް އެމްޑީޕީން ނިންމާފައިވަނީ 28 ޖެނުއަރީ 2023 ގައެވެ.
